相信好多人都有被借車揸嘅經驗，即係你朋友冇車又或者想揸你架車同你換車，見老友一場唔好意思推搪就無奈應承。老實講，借車俾人揸就好似借條女俾人玩一樣，特別係你條女樣靚身材正，佢又點會錫住揸？一定出力玩到盡！玩完就算冇表面傷痕完整無缺，你都會隱約Feel到佢曾經有過一陣慘痛經歷但又有口難言講唔到俾你聽。

我係錫車之人，自知自己部車齡唔細，就算車爽都唔敢多踩，寧願慢少少都唔好Chok親佢副偈，一直相安無事相處順利，直至年頭開始感冒起，起初油門唔順有啲lag，後嚟DTC系統不斷跳制，病入膏肓一波上三波好似Cowboy騎牛咁跳嚇跳嚇，三波之後仲role play飛機遇氣流不停打震，危險到要喺東區走廊打住死火燈行慢線，一拐一拐去車房求救。

平時朝早拎去診室夜晚就有得接返走，但今次要全身麻醉開刀做手術再留院觀察三日，醫生話今次有啲棘手，三番四次問我係咪揸得太激進……我話冇佢又唔信，到個維修單打咗出嚟，望住堆舊零件之後我開始猶疑，因為依堆嘢明顯係因為車頭過熱、轉波不良同強行剎車先會磨損嘅零件，自問唔會地板油見紅起步、拖波減速都會俾多啖油落去平衡返個轉數更加唔會拓海上身拉手制甩尾…車房師傅問：「咁你有冇借過部車俾人丫？」呀！依一刻先伍晃榮大悟……

即刻跳返入回憶，喺黑白片之中倒帶隔世追兇，轉身射個三分波回想返邊個借過我部車揸，數返先知依半年總共有四個：

疑兇一：上次驗車去個FD間車房嗰個金毛車房仔

疑兇二：朋友乙婚禮，揸咗我部車去攞花球嘅男家表弟

疑兇三：澳洲女友返咗嚟，借咗我部車揸四日嘅朋友丙

疑兇四：車聚，其中一位會員以交流為由要求試駕

首先，四個疑犯都有同一個反應構成犯罪動機，就係一上車都好興奮咁話：「哇棍仔嚟個喎！」另外又有一個共通技能同共通態度，就係識揸棍波車及同為激進派車手。車房仔就唔使講啦！老細就話怕整親啲客車俾人索償，車房仔打份工怕咩呀？再講，鐘意得車先入汽車維修業，返咗部手波寶馬仲唔借機試圈速？我每次入車房前都會抄低油標同行駛數，入定30L油俾佢哋搞，嗰次佢俾返我嗰陣已經著咗油燈，即係話佢用咗29L油幫我驗一次車。

第二個係朋友乙個表弟，佢係一個富二代，喺澳洲玩開車，鐘意將啲Sunny、Corolla、Galant改到五百幾六百匹嘅玩家。近年佳作係將部萬事得３改到落場咁款，改裝錢可以買到一部馬莎。朋友乙婚禮嗰日有個弱智仔唔記得拎花球去會場，我又要留喺酒店打點，表弟自告奮勇話返去拎，於是揸咗我部車過咗三條隧道 (隧道費當然由Autoroll支付)，夜晚Check車嗰陣發現油耗記錄有異樣，平日返工放工郊遊接送都係10.6km/L，即每L油行到10.6公里。今晚竟然跌到落6km/L，差距近乎一倍。依個現象我就知個o靚仔應該開住八千轉返去拎花球，出住煙咁返嚟會場。

第三個係朋友丙，典型考完車但冇車揸嘅車迷，留學澳洲嘅女友因為家事返港一星期，為咗可以喺女友面前威威所以跪求我借出座駕載女友兜四日風，基於十年友誼Credit推唔甩，只能夠喺交匙一刻叮囑唔好車震，同埋收油時幾住俾啖油拖返個波保護返個波箱，唔好一嘢由二千轉chok到五千轉收車。結果四日之後拎返部車，冇表面傷痕但半個月後死咗波箱，換咗我七千個大洋，追討？點追？

第四個係車會會員丁，佢係我唯一親眼目睹揸我車嘅人，佢本身揸EK3，嗰晚一見我部車就著曬燈係咁話要試，又話百年難得一見又話生活品味云云托曬大腳，唉怕咗佢俾你輕輕揸一圈，佢一坐上司機位哇咗一輪就開車，引擎一著踩低個極力子對眼就發曬光，極力子都未吊起已經踩到五千轉，然後彈射起步，車頭差啲就飛起咗，真係當我依個車主透明……一路上波波盡劈住去，仲問我有冇試過部車個極限，話咩要發揮部車嘅潛能先係真漢子……其實呢，你當住人面揸人架車揸到波波盡真係好冇禮貌囉……雖然只係短短一節西沙公路，但我已經肉赤到喊出嚟，過程就好似睇住自己女朋友俾人九深一淺係咁摧殘至休克反白眼，下車嗰陣成地血。

依部車三年嚟一直相安無事，係間唔時換嚇火咀偈油依啲消耗品，但依一年開始有病痛，車房師傅話寶馬車有一個特點，就係特別記仇。車底每一條Sensor都有記憶，你做過咩佢都會記低，下面三條Sensor就記低咗我曾經波波盡片住去嘅慘痛回憶。依一刻，就好似女朋友話唔舒服我陪佢去睇醫生，醫生話佢唔乾淨有性病，叫我就算出去玩都要小心啲唔好返嚟惹到個女朋友…我一臉無奈硬食一嘢重擊，拖住女朋友離開診所……我真係有反省過：「係咪我夜晚夢遊去咗叫雞自己唔知？」

維修費事小，最心痛係睇見女朋友俾人玩到損手爛腳，依家由頭到腳連私處都係全新原廠件，佢雖然變返三年前初相識新束束，但醫生仍然再三叮囑我：「係錫部車就唔好借俾人揸喇！」知道……我以後唔會再借車俾人揸，理得佢係盧頌之，特以此文為證，引以為鑑。

轉載請註明來源：今天頭條