1. 細心過女人

係HR世界生存就必須要細心，自神創造呀當夏娃已經設定咗女仔比較細心，細心嘅女仔做HR自然比較得心應手。所以如果男仔可以係HR界生存證明佢一定好細心，甚至可能細心過女人。HR每日出街嘅文件大細階唔可以錯、計糧一蚊都不能多也不能少、你試下打錯人地個名即刻俾人插到飛起。如果同咁嘅男仔一齊，你一定唔駛問佢今日你有咩唔同，因為你唔問佢都知道你今日係剪咗腳甲。

2. 超強EQ值

如果你有睇開HR小薯蓉呢條友個page就知道HR會經常遇到見工奇行種，或者成日出現嚇死HR嘅事件。所以要維持正常人狀態，就必須要有好高嘅EQ值先頂得住。包保你唔小心掃走咗佢粒lego都唔會發你脾氣。

3. 好腰好腎好男人

HR通常都係一個充滿女性嘅辦公室，體力勞動嘅工作自然落係男生身上。「冇水喇！」十對眼射住你「啲file好重呀！」十對眼射住你「拎啲糧單去派」十對眼射住你。如果你唔做呢啲體力勞動工作？十對眼射住你「做男人做到咁小家㗎」「次次佢都唔換水㗎！」「明知成office都係女仔㗎啦！」日日舉重，你話點會唔係好腰好腎好男人？

4. 超強記憶力

每位同事入職都一定要經過人事部，所以個個都會認得我地。但問題係有咁多新同事，我地做HR又要記得曬啲名、又要認得曬啲樣真係難過記住亞視啲明星。有人走埋嚟同你吹水，你唔記得人地係乜水，到時真係O曬嘴。所以HR都裝備咗超強記憶力腦袋，你爸爸媽媽朋友或愛人、耶穌佛祖生日佢都記得，1001日紀念一定走唔甩。

5. 絕不花心

每日係HR呢個充滿陰氣嘅環境工作，正所謂「三個女人一個墟，痴得太近腎都虛」佢一定明白太多女生係身邊未必係一件好事。返到屋企佢絕對會享受被一班男人包圍嘅感覺，佢班兄弟包括ironman、美國隊長、超人、蝙蝠俠、蜘蛛俠個個都係猛男，有你一個女人點綴下已經會覺得好足夠，所以絕對唔駛擔心佢出去搵女人。

所以如果你有個做HR嘅男朋友請你好好珍惜，如果你身邊有做HR嘅男生又不妨考慮下佢。

「識貨嘅梗係要揀個做HR嘅男人」

轉載請註明來源：今天頭條