是咁的，小弟岩岩畢業，入咗一間本地數一數二既銀行度做MT，我本身有一個細我兩年、仲讀緊U既女朋友，最近我發覺同女朋友距離好似越黎越遠，我晚晚做野做到起碼8、9點先收工，而佢亦都忙住讀書做project，所以好少見面。

最慘係我發覺自己鍾意咗公司個清潔姐姐，佢係負責我層樓既，大約50歲（不過keep得好好，望落似30），離咗婚，有一個1x歲大既女。唔知點解啲姐姐通常都係好早返工，而我因為多野做，好多時都係全個部門最早返果個，所以我地每日有成個鐘頭單獨相處。由最初點下頭，互相問候下，慢慢會傾少少屋企野，直到有一日，我見到佢眼濕濕，就問佢發生咩事，原來佢個女離家出走無返學，咁我即刻請假陪佢去搵女啦。

最尾喺佢屋企樓下搵返個女，原來佢個女喺學校俾人笑「無老豆」，我就同佢講我都係過來人，我自細無阿媽，其實都唔係咩咁大件事，只係啲人無知。開解完佢一輪，果晚我上咗姐姐屋企食飯，食住佢親手煮既飯，感覺真係好親切。

自此之後，姐姐每朝都會買早餐我食，而我每個星期日都會由灣仔入天水圍探佢個女，佢個女曾經問過我可唔可以做佢老豆，我當然叫佢唔好亂諗野啦!!

上星期日晚，佢個女瞓咗之後，我地兩個喺廳睇電視，我忍唔住錫咗佢一啖。呢幾日，雖然每朝都會有一份早餐放喺我張檯，但除咗早晨之外，佢無再同我講過一句說話...

我而家點算好? 究竟姐姐佢鍾唔鍾意我? 如果佢鍾意我，咁我女朋友果邊又點好?

文章來源: https://www.twgreatdaily.com/cat99/node1360717

轉載請註明來源：今天頭條