富豪之間的八掛事：
楊受成最霸氣，一疊疊金牛掉比泊車仔。
大劉女友呂麗君貪錢到飛起。
大鴻輝主席個人名義竟然無物業？
英皇楊•四太最豪爽
啲「泊車仔」聽到大劉爆響口曾差遣呂麗君喺福臨門俾兩、三千蚊「貼士」，口痕咁話，其實如果宴請親朋擺兩、三圍花幾皮，兩三千蚊貼士算係加一咁啫，泊車仔記憶當中，最豪爽嘅原來係英皇楊受成同埋四太梁安琪，佢哋試過俾泊車仔一千蚊貼士㗎，唔少食肆代客泊車服務皆由「社團」中人承包，莫非英皇楊以及四太皆有江湖兒女氣概，對泊車仔都特別眷顧？
手持大疊金牛的楊受成，醒俾泊車仔。
四太對泊車仔亦豪爽。
已八十六歲的夏蕙 BB，為胡百全誕下六名子女，仍未獲「胡太」身份，勸勉呂麗君：「係你就係你嘅！」
夏蕙 BB「醒」呂麗君
曾被大劉封為「殯儀之星」的夏蕙 BB，絕對有資格以過來人身份評論呂麗君被飛事件，夏蕙 BB後生時以葫蘆身材自居，與已婚律師兼行政立法局議員胡百全邂逅，誕下六名子女，全部都姓胡，但愛人胡百全坐鎮立法局時提出私人草案，廢除大清律例即冇得納妾，搞到夏蕙 BB連妾侍身份都冇，但昔日胡百全作為馬會遴選會員，有兩個馬牌，一個是給配偶（ Spouse Badge），另一個給予女朋友（ Lady's Badge），憶起往時攞住個馬牌恍如「胡夫人」般身份陪住胡百全拉頭馬，夏蕙 BB顯得十分雀躍，仲話：「嗰陣唔係人人都可以入馬會，所以馬牌物以罕為貴，不過我又唔覺得攞住入去好威水，因為識佢（胡百全）嗰陣已可以入馬會。」
夏蕙 BB話胡生好錫佢，但自己唔重視物質，胡生買俾佢先要咋，唔會開口話要咩，夏蕙 BB仲話：
「呂麗君係事實婚姻，家醜不應外傳，唔好打官司，費事益咗啲律師，正所謂，係你就係你嘅！人要知足，和平解決咪算囉。」
今年八十六歲的夏蕙 BB果然去咗另一層次，當日與胡百全元配子女，在醫院都曾有一番角力！如今以過來人身份，與呂麗君共勉之。
與胡百全所生的其中四名兒子胡禮賢（左一）、禮明（左二）、禮信（右二）及禮智（右一）。
有相為證，黃夏蕙（左一）陪伴胡百全（右二）入馬場拉頭馬。
中環寸嘴 去 China Tang踩場
岳少間「唐人館」 China Tang，喺海港城開咗幾個月，啲食經又係有讚冇彈，一於坐程天星小輪過海去踩嚇場先。一坐低，個氣場唔錯吖，有啲天然光滲入嚟，話曬有海景，唐人館同中環間「好酒好蔡」都係英國 style，唐人館呢度多啲青春氣息。我老友話似乎比起「好酒好蔡」實際啲（註：「好酒好蔡」同為林建岳旗下食肆），我即刻話唔好咁快下結論！
侍應服務態度同「好酒好蔡」就有天淵之別，「好酒好蔡」嗰度啲高層踎喺出面顧住同後生女知客打牙骹，都唔同客仔打個招呼，唔好以為我唔認得呀，以前喺酒店做 busboy王，顧住過年封利是餡，你就知價錢！雖知我都照過鏡冇劉德華咁靚仔，但今時今日咁嘅服務態度點得㗎。唐人館招呼我個企堂醒目好多，識得推介嚇有乜時令菜，介紹咗個菜乾炆豬手，講到啲菜乾索曬啲味，再叫埋少爺焗豬扒飯；仲好落力同我推介萬幾蚊一圍嘅盛宴，嚟食餐飯都要吸收嚇市場資訊，呢個企堂話以前喺 The One入面間火鍋酒樓做，由一日二三十萬生意額，跌到得番兩、三萬，想唔執笠都幾難，你話生意幾難做吖。
擦完呢餐晏，老實講啲菜式仲未入味，環境裝修冧女就好介紹！埋單時醒些少貼士俾位企堂阿姐，佢都識得講句：「唔好咁客氣。」我話：「唔好客氣咁少呀？」
海港城間唐人館由鄧永鏘設計（ Sir David Tang），呢碗酸辣湯英文叫 Sir David Hot& Sour Soup。
呢煲菜乾炆去骨豬手$268，但食落有欠真味。
楊國佳
工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前
冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。
大鴻輝多得阿媽慳$1.3億
大鴻輝老細梁紹鴻斥資 12億掃山頂樓王 Mount Nicholson三個單位，最叻係以「首置」身份置業，只係俾 4.25%印花稅，足足慳$1.3億。大鴻輝身家數百億，何解連自己名下物業都冇呀？只因多得阿媽。其自住物業梅道 May Tower單位，九二年以$1,480萬買入，係以海外公司 Cathay Britannia登記，簽名人就係佢阿媽陳鳳儀，梁紹鴻母親為怡和買辦及置地董事梁顯利的庶室，但二奶仔大鴻輝總算威過大房，由梅道搬上山頂，延續梁顯利家族威望。
大鴻輝梁紹鴻由半山梅道搬上山頂 Mount Nicholson，強調是自住用途。
梁紹鴻出名孝順，經常陪伴母親陳鳳儀到灣仔金碧軒飲茶。
梁顯利家族物業遍布海外，包括在溫哥華這個 Lansdowne Centre。
撰文：宗菁華
來源 source: http://hk.next.nextmedia.com
文章來源: https://www.twgreatdaily.com/cat99/node1353578
轉載請註明來源：今天頭條