無綫頒獎禮下月18日舉行，陳展鵬憑劇集《城寨英雄》拳佬一角深得觀眾歡心，外界猜測佢極有可能奪得本年度視帝，與胡定欣以情侶檔攞獎！不過年中以「渠頭」一角爆紅的 王浩信 同樣不容忽視，佢早前主動無條件續約無綫，加上聽教聽話，盡得高層們歡心，贏面反超前！至於以為攞硬的陳展鵬好有可能大熱倒灶，例牌收「最受歡迎電視男角色」安慰獎﹗
煎Pang恨獎恨到發燒，去年憑《張保仔》成視帝大熱，可惜最後輸俾《梟雄》的前輩影帝黃秋生。而今年煎Pang孭飛的《城寨英雄》大受歡迎﹐其飾演的深情拳佬獲觀眾激讚；煎Pang更揚言肯賣身TVB﹐擺明恨攞視帝恨到出面！
雖然煎Pang看似形勢大好，不過原來死敵王浩信早前主動跟TVB無條件續約，殺出爭獎！知情人士透露︰「王浩信續約時冇要求加人工，公司覺得佢呢兩年人氣同形象好好，但都冇獅子開大口﹐高層都對佢加曬分。」相反煎Pang就要求多多﹐薪酬要跟陳豪、黎耀祥睇齊。一名無線高層爆料：「王浩信要養家都冇要求加人工﹐咩job都肯接﹐反而煎Pang就非男一不接﹐又唔肯上綜藝節目。」
對於有冇信心奪視帝，王浩信接受訪問時回答得非常謙虛，佢表示年中時《EU》得到好多觀眾認同﹐已經當自己攞咗視帝！另外王浩信又強調自己非常欣賞展鵬，但視帝並非兩人之爭，因為TVB仲有好多出色的演員，佢希望所有被提名的演員都有所斬獲！
另一方面，陳展鵬雖然表示想攞視帝，但就自嘲唔識做人﹐咁都多年冇咩與高層接觸﹐只係專心開工拍劇！頒獎禮距今尚剩餘一個多月﹐然而為奪得視 帝寶座﹐睇黎個個都會出盡唔同花招﹐誓要成為視帝。
轉載請註明來源：今天頭條