篇文好長，不過有簡短版同詳細版

呢篇野係想評論關於尖沙咀金馬倫道一間salon叫Shxxbi House

我同一位朋友一齊去試佢facebook instagram個優惠套餐$888，二人同行9折，以下就係我地兩個既經歷：

簡短版：

間野收費高但同服務質素唔成正比，另外收費冇表明，手勢又唔好＝唔駛去

詳細版：

我－

本身諗緊係咪自己港女要求太高定點，但同完朋友傾完覺得佢咁既表現加服務態度真係唔可以接受。希望其他人去之前要三思加問清楚，就算真係去，都千祈一定唔好揀個高大肥仔髮型師

我知自己係「憂悠寡斷」 要諗好耐諗好多先決定到，所以想黎髮型屋問下專業意見先再決定，就問清楚細節先敢整。

我一心諗住電曲髮，見有套餐就順便染埋，但原來漂過既頭髮係唔電得

咁冇得電就諗住染啦，我就想睇下有冇啲色係唔駛漂都染到就冇咁傷，同埋唔駛另外加錢。

佢就話：普通啡囉，同紅﹑紫﹑藍都得。

我問佢拎色板，佢叫我講想要咩色先比，原來我唔可以睇色板有邊隻色望到靚先再考慮？

佢色板都唔比我睇下，要我話見到隔離朋友個師傅都比左啲佢睇，先肯係iPad show比我睇。

之後我都覺得自己煩既，有講過幾次唔好意思，因為我真係好想電髮，就諗唔電漂左嗰啲得唔得呢？

（因為我得內底層漂左，而且生左好多黑色頭髮出黎）諗住問下可行性再決定，我始終外行人唔識咁多。

佢呢part又好既，解釋清楚後果比我知，就放棄左呢個念頭。

同埋漂膏都開埋，都已經唔好意思唔漂，加上佢已經藐曬嘴臉。

之後就決定左漂染，我就想由中間至髮尾漸變漂染灰色，我唔想染到頭頂啲位。

佢就問我駛唔駛染埋個頂做啡（因為灰色上冇漂頭髮會變啡），我就問邊隻啡。佢就趴個頭係隻手到表現好不滿咁歎氣話：普通啡

我想知清楚隻色先染，我真係唔知咩為之普通啡。可能我對髮型方面見識少，以我所知啡都有好多隻，奶茶啡朱古力啡栗子啡 唔同色tone既啡。

而染灰色要最少要漂兩次先上到，漂完第一次佢叫我不如直接染做灰綠色都差唔多。但我就考慮緊漂多次做靚啲既灰色 定 直接染灰綠好冇咁傷好？

就問依家漂左一次染完出黎係大概咩色，佢就話答唔到，要睇髮質。但一個專業既髮型師應該大概估到咩色左右掛？問咩都答唔到。

所以我都仲係好猶豫不決咁。 我就問多幾句意見，佢就好唔耐煩咁問：又想點呀？ 而第二次漂時係冇帶耳罩既。

到終於染完，幫我夾返個頭內彎，但佢真係好唔專業！佢用電動轉嗰隻曲髮夾整彎，但個轉既方向係錯既，所以夾極都唔得，我之後影左張相比個fd睇話似岩岩訓醒既頭，我自己用直髮夾都好過佢呢位髮型師。

最離譜係返到屋企除低個袋，竟然係件衫既背脊跌左塊膠（保護件衫唔好整濕嗰啲）出黎，嗰下呆左 覺得點解服務可以差成咁。

我再認真照鏡，發現原來染到一撻撻，連上面頭頂唔染啲頭髮都啡左幾撻，我同朋友講用左千二佢地都好驚訝點解會染到咁，以為我係自己染。

唔好問我點解嗰陣唔睇清楚，因為我嗰刻好唔開心只想快啲走。。。

態度差都算啦，比啲服務好冇？千幾銀對小妹黎講都係一筆大數，但佢既服務態度都唔及我平時剪頭髮百幾蚊到好，可能我真係expect太多

最後我千二埋單，冇join套餐 分開計，冇剪 齋漂染 夾內彎

To 肥仔髮型師: 唔知你嗰排經歷過咩事令到你嗰晚既態度咁西，定你本身份人係咁，定淨係對我係咁。

因為我自問對你態度好好，唔該前唔該後，但我全程受緊你氣。

怪就怪自己太蠢，冇即時投訴，要之後諗返先覺得委屈係網上講。打得咁仔細都係想比大家了解個髮型到底適唔適合你，如果好似我咁憂悠寡斷就一定唔好揀佢。

我同我朋友一樣都揀$888個套餐，我揀漸染，精華，焗油。我問髮型師可以漸變幾多隻色，之後個髮型師就講左一大輪野最後答案係一隻色tone。

之後佢一黎就拎本shiseido 既色板比我睇，我揀左岩心水既灰色點知佢除左個個套餐比$888之外仲要再加$450,就因為係shiseido。

但重點係我染漸變另外個本牌子既色板染唔到呢個效果，所以就迫住要用shiseido。漂頭髮又要另外收費，其他salon都唔洗呢個價錢，同埋我係賣髮型產品ge鋪頭都見過shiseido 既染髮劑，一枝染髮劑加奶都唔洗$100。

我個頭本來係有d嚴重既布丁頭，我諗住佢會點樣幫我將髮根既黑色漸變落深灰到淺灰，點知勁傻的嗎佢就咁開左我揀個隻色既染髮劑，一野將我成個頭搽滿d染髮劑，完全冇技巧可言。

由於我睇過youtube d片都清楚染漸變色既方法，我相信要自己或者朋友幫我染一定有難度而且要有技巧，

但點知佢就咁成頭就咁搽野，朋友或者自己都染到啦，洗乜洗千幾蚊比佢染，仲要另加450...

最後我個頭係本來黑色既頭髮變啡色，本來金色既頭髮變深藍，但完全冇漸變效果。

之後洗頭師傅幫我洗頭個陣問我洗唔洗焗油，我話唔洗因為我驚又要加錢，點知事後洗完後個個洗頭師傅再同我講: 呀！原來你要焗油。

之後幫我搽野上頭再用機熱住個頭，我完全唔知咩事。但之後發現原來所謂既"精華"姐係普通既焗油，仲要連個度d人都稱呢個精華做焗油...

最後就剪頭髮，我叫佢幫我剪齊個陰同髮尾，兩樣都剪左少少，開頭剪完冇發現有咩問題，點知到今朝我梳頭髮發現d頭髮勁唔齊，後面既頭髮竟然無啦啦比耳仔側邊既頭髮長左忽，點解最普通"剪齊"都剪唔齊...心入面真係好嬲同好無奈。

其實我依家都幾後悔當初唔企硬即刻走，我同我朋友係蠢既不得不承認，但最後我埋單$1300幾，呢個價錢係好多salon係可以做到好多野，唔會只係染普通一隻色，而且服務質素一定好。

我去過有間幾高級既 salon，有個女人整完頭髮佢雞蛋挑骨頭話呢到唔好個到唔好，人地salon即刻唔收佢錢，就係因為客人唔滿意。而呢間shuubi house除左質素唔好之外，服務真係非常差！

我朋友比錢受氣，我髮型師就成日自己走左去做其他野或者傾計講人壞話⋯⋯$1300係絶對唔值！

所以所有巴絲打千奇唔好因該佢平或者比佢facebook instagram d相欺騙，唔好再比呢間shxxbi house賺！

文章來源: https://www.twgreatdaily.com/cat99/node1333552

轉載請註明來源：今天頭條