不經不覺踏入十一月，又系無線倒數的月份，當然唔少得台慶劇出街啦！先由陳豪、胡定欣及田蕊妮孭飛的《來自喵喵星的妳》響頭炮，今晚就到卡士強勁的《幕後玩家》首播！

《幕後》由一眾型男索女主演，以PR作題材夠新穎，不過原來最爆元素，竟然系兩位索人妻陳煒同陳自瑤(YoYo)的「sheshe」情節！近年啲大台劇真系話題性十足…

《幕後玩家》卡士的確強勁，黃翠如、蕭正楠、黃宗澤(Bosco)、張繼聰、劉佩玥等當紅藝人盡出，而根據官網資料，故事大致系透過公關公司的爭鬥，帶出人性的醜惡，亦會有家族糾紛爭產等情節。近日《巨輪II》因強暴戲引起熱話，唔知《幕後》又有冇重口味情節呢？

口味重唔重就未知，不過相信近日大家只要有開電視，都會不斷被呢幾條預告片洗腦，片中描寫的PR行業非常離地︰揸超級跑車，下車後頭也不回將車鎖拋落地俾泊車小弟；撞跌侍應玻璃杯，同樣系頭也不回，一把銀紙灑落地；而且似乎仲會勁多女埋身，想咀就咀，唔知現實中的PR朋友是不是咁樣㗎呢？

睇番《幕後》劇照，發現劇中都有唔少咀戲，例如現實中系情侶的蕭正楠同翠如BB寓工作於親熱，攞正牌錫過不停。但翠如BB又會著住婚紗錫Bosco，關係真系七國咁亂！

另外仲有床戲喎！(好似系)

阿聰喺劇中真系艷福不淺！

唔單止好多咀戲，《幕後玩家》竟然將電影《無間道》的天台經典埸面重現，不過佢哋做PR啫，唔會真系有槍啩…… 可能喺劇入面做緊戲？

其實拍劇有咀戲都實屬小兒科，不過眾多劇照中發現驚人亮點，就系陳煒同陳自瑤兩位索人妻竟然有咀戲！就連煒哥本人都喺微博轉發呢張相。呢次真系如網民所講，YoYo真真正正嘗到「煒哥的味道」啦！雖然系sheshe，不過小編就覺得成個畫面好悽美啦！

另外兩張劇照中見到YoYo一面冧爆挨喺煒哥膊頭上，以及細心照料受傷的煒哥。據資料所得，煒哥在劇中的角色叫「顧成勛」，系翠如BB同父異母的家姐，甚具男兒本色，縱橫商場無敵手！而網上資料則指YoYo角色名為「林書榆」，不過就未有提及其背景。而小編就覺得YoYo感覺似系秘書，戀上剛陽味重的上司煒哥！

今次煒哥同YoYo突破性地在大銀幕上公然親吻，難免令幾位主角頓然失色，反而令觀眾極期待兩人在劇中擦出的「愛火」！

轉載請註明來源：今天頭條