俗語都有話啦：

女大十八變

之不過小編認為

唔單止係女仔

男仔亦都可以十八變咯！

唔知大家仲記唔記得上個月

果張刷爆IG嘅相

▼

冇錯啦

就係呢張廿年前

牙佬袁偉豪參選第一屆

《YES!》校花校草選舉嘅相

相中稚氣未脫、帶住濃濃脂粉味果個

咪就係年僅15歲嘅牙佬咯！

托腮呢個咁經典嘅姿勢

據聞仲係牙佬睇書學翻嚟嘅

雖然當時嘅佢真係好green好pure

但都冇阻佢一舉奪冠

並憑此照踏入娛樂圈！

繼牙佬之後

近日又有人係FB貼咗張

同樣都係《YES!》校花校草選舉嘅相

而今次嘅男主角

換咗17歲卜卜脆嘅黃宗澤Bosco啊！

▼

係咪覺得佢個pose有D熟悉呢！

冇錯啦！就係呢個「回眸chok爆look」

有唔少網民話

同偉仔係《無間道》入面嘅經典回眸

有幾分相似啵！

型就真係幾型啦

只可惜佢唔係當時嘅冠軍咯！

呢個賽果認真值得懷疑啊！

隨住當年嘅校花校草選舉嘅相重現

亦都引起咗唔少80後、90後嘅集體回憶

於1990年創刊嘅《YES！》

陪伴過幾多後生仔女走過求學時期

鬼鬼祟祟咁帶入學校

懶唔叻咁同同學仔曬自己本《YES！》

課間圍埋一齊邊睇邊講八卦

或者一個睇完傳畀下一個睇

仲有嘅簡直唔識死上住課收係櫃桶度睇

……

唔知大家仲記唔記得佢有D咩經典欄目呢？

例如華少嘅惡搞歌詞

呢位華少唔係《中國好聲音》

講廣告詞講到唔洗唞氣果位

而係一名「唱作型歌手」

將當紅歌手嘅新歌

改成畫風「清奇」嘅惡搞歌

如將Sammi首《如何掉眼淚》

改成《姨婆掉眼淚》、

《獨家試唱》改成《獨家廁格》……

華少當時仲紅到出埋碟添

想再次回味嘅朋友仔

百度一搜：《獨家笑唱》

即有資源！

再例如，作為大家嘅「紙質版啟蒙老師」

——MissSex欄目

為一眾pure過杯白水嘅後生仔女

解答一系列性愛方面嘅疑難雜症

到底咀咀係咪真係會有BB噶？

我應唔應該畀第一次條仔？

流產有D咩方法？

……

係宜家呢個年代

相信冇MissSex同大家解答

你都識得上網查啦~

講到經典

又點會少得「城市驚喜」呢！

呢個王牌欄目

唔單單係雜誌嘅欄目咁簡單

仲係唔少偶像明星嘅星途起點！

小編仲記得

呢個欄目每期都會搵一個素人靚女做女主角

影翻輯當時好興嘅清新沙龍照

當中就包括張柏芝、阿Sa、唐寧……

連千億新抱徐子淇都影過！

話說當年

大家又係因為咩原因

而甘願洗成十幾蚊嚟買本雜誌睇呢？

小編嘅朋友仔話

呢本雜誌嘅內容好吸引

既有好多香港至in嘅潮流文化睇

又有好多靚仔靚女睇

至緊要攞係手特別有face

亦都有朋友仔話

係為咗追星而買嘅！

每期嘅明星封面真係好緊要咯！

由最初嘅周慧敏

（唔好點解咁多Vivian，

因為倪震係創辦人之一）

去到Twins

再到之後紅起身嘅日韓偶像

一句講曬：

封面有自己鍾意嘅明星就實買！

而小編認為《Y E S！》中

最靈魂嘅應該都係

有夜光、閃、貼紙等類型嘅「YES卡」

上面印有唔同偶像明星嘅肖像

當年一蚊一張嘅「YES卡」

通過專屬嘅抽卡機發售

如果同個老闆熟D

話唔埋會開機任你揀明星添

不過，就算抽到唔鍾意嘅明星都冇所謂

實有同學仔會撩你交換嘅

睇你點玩噶姐~

而係「四大天王」時期

郭天王嘅「雪花閃卡」更一度

被炒至400蚊港紙一張！

你話趁機賣出去賺翻筆都好啊

弊在你真係唔捨得呢！

隨住第1219期嘅推出

《YES！！》（04年改咗名）

於2014年7月31日正式宣布停刊

改推電子版雜誌

唔知已經有成兩年時間冇睇過

新嘅紙質版《YES！！》嘅你哋

掛唔掛住當年手捧《YES！！》

邊睇邊帶點小激動嘅feel呢？

當年睇過嘅《Y E S！》、

集過嘅「YES卡」

唔知宜家仲係咪你嘅屋企呢？

歡迎大家係下面留言

同小編分享你同《Y E S！》嘅小故事！

轉載請註明來源：今天頭條