飛機上醉酒鬧事、又或者某國旅客用果汁潑空姐的事件，相信大家都有聽過，但有乘客在飛機上食麵包灼傷後入院，就真係聞所未聞！而呢件奇聞正正發生在藝人 陳浩民 與太太蔣麗莎身上！話說兩人昨晚坐飛機由北京飛返香港，但就在食飛機餐時出事，到港後一落機就立即坐救護車去醫院治療！

Lisa在凌晨時上載幾張「案發」後的相片，並留言︰「有聽說過，吃一口航空公司派發的麵包，把整個嘴裡(裏)全部『灼傷』滿口起泡的嗎？第一次從飛機上直接上急救車 不會把胃燒傷吧 @陳浩民benny 你比我更慘…」唔通係航空公司過份細心，想乘客食到熱辣辣的麵包，但卻加熱過度弄傷對方？

從Lisa上載的相片中，可見佢在救護車上正等待治療，亦見到佢個嘴唇被灼到紅曬！

「兇手」就係呢個啡色麵包！唔知佢到底隱藏咗咩秘密？

陳浩民 接受訪問時表示，如果係因為個包太熱而辣傷，就只好怪自己唔小心；但事實上佢似係被一啲腐蝕性好重的物質灼傷個嘴！當咬咗個包幾啖後，條脷同口腔就開始出現灼痛，其後成個口腔好似被強酸灼傷咁。個包現時拎咗去化驗，而陳浩民就未決定會否追究。

而Lisa憶述指發現麵包有問題後，空中服務員立即把其他麵包回收，沒有再派發；有一名空姐試吃麵包後隨即吐了出來，可見麵包確有問題！另外Lisa又稱每個人都應該將焦點關注在食品健康、安全上，不要把焦點放在佢哋兩人身上，佢希望每個人都要出一份力監管食品安全！

轉載請註明來源：今天頭條