發現兄弟戴咗綠帽，有時真系唔知點算好。

尢其系佢果頭講完自己好彩搵到個好純品女嘅朋友，拍咗5年長拖，節衣縮食，儲多陣錢就可以買層樓做樓奴。

阿明平時無乜特別嗜好同消遣，連PS4都唔捨得買，最多系上網睇人哋直播打機。

一年都買唔夠幾件衫，死儲爛儲系佢嘅人生哲學，為咗將來嘅美滿生活。

儲咗5年，結果，儲出一頂綠帽。

話說前幾日，喺天環廣場，我咁啱因為有啲嘢做喺附近，見到阿明女朋友Eva同另一個高高大大嘅猛男一齊，十指緊扣。

面對面撞到正，Eva同我四目對望，佢嚇到面無血色。

猛男見到我哋反應有啲奇怪，佢開口問Eva：「你朋友呀？」

「你男朋友呀？」我望一望個男人，微笑咁問返Eva。

呢個開場就好似偶像劇男主角分完手又想箍煲時，見到第三者咁，空氣中瀰漫住一種奇怪嘅氣氛。

「喂！阿King！又會喺度撞到你嘅！好耐無見啦！」Eva即刻擺出可以角逐影后嘅演技。

而所謂嘅好耐，只系一個星期左右。

上個星期我先同你同阿明一齊食飯咋喎，你個……我無講出口，睇嚟佢知我唔會即時反台。

猛男見Eva一下子咁熱情，又俾我問一問佢個身份，於是對我微笑，仲伸手將Eva攬埋自己度。

「Simon。」猛男充滿自信，伸出佢只右手向我示好，同時露出陽光燦爛嘅微笑。

我心諗，你條粉腸啲客套嘢又做得幾足個喎。

我從頭到腳望多佢一次，無名牌老西，但有激凸嘅胸肌、陽光嘅笑容、精壯嘅體魄，可能系咁令佢搶到Eva返嚟……

然後，成為一對狗男女。

我承認自己有極大成見，皆因阿明同我真系識咗好耐，Eva喺我心目中都系溫柔賢慧又帶得出嚟見人嘅絕世好女人。

而面前呢條粉腸，我唔知系好有錢定系持久力好強，可以將一個良家婦女變成出軌偷食嘅……

總之我唔信佢哋系真愛啦。

如果阿明真心真意咁對待一個人，而條女竟然真心真意鍾意另一個人……

叼！我真系接受唔到！

「我系Eva朋友阿King，喂Eva，阿明話好耐都無見你，識咗新男朋友都唔同我哋講，搵日帶埋出嚟一齊玩啦！」

Eva聽到後面色一沉，無諗到呢個時候我會搬佢男友出嚟。

我觀察猛男Simon嘅表情，無咩變化，甚至好開心咁話：「好呀！我都未識Eva啲朋友。」

睇嚟佢仲未知Eva有男朋友，起碼唔知男朋友個名。

「好呀……上次講開件事，唔好同阿明講住喎，我今晚打俾你再傾啦！」Eva捉住我手臂，佢好緊張，但又要扮無嘢。

睇在識咗咁多年嘅份上，我始終無當面拆穿佢，打完招呼之後就走咗。

然後邊行邊諗，其實愛情到底系啲咩？生活又系啲咩？

我記得阿明同我講過，Eva好恨嫁，近年好多朋友結婚，每次新娘拋花球嘅時候，佢都會自言自語咁講：「拋過嚟！拋過嚟！但佢無一次接到架，次次都唔掉佢果邊，有次落正佢頭頂，佢反而又唔敢接，結果俾隔離個女仔跳起搶咗個籃板球。」

見到阿明戴綠帽，我真系唔知點開口。

當年套《頭文字D》入面，杜汶澤話見到夏樹同個男人入咗酒店，驚周杰倫俾人呃，想講，開頭都唔知點開口。

「三萬蚊！過夜！你條女系雞呀！」講完，杜汶澤都要俾周杰倫打啦。

何況，Eva唔系，唔會因為肉體關係而收錢，如果佢今晚無返屋企，又無打俾我……

「唔洗錢！過夜！你條女……！」我真系想像唔到阿明會點對我。

好彩，當晚，Eva終於打嚟。

「阿King，今日嘅事呢……其實我都想同你講架啦……」Eva第一句已經返返去我所認識嘅和藹可親，相當賢慧嘅聲線。

同中午喺天環廣場果個富有戲劇細胞嘅Eva簡直系兩個人。

「你想你自首，定系我篤爆你？」我諗嘢可以不著邊際，但講出嚟最緊要簡單直接。

「OK，如果無彎轉嘅話，我哋入正題。我啱啱已經同Simon講咗我有男朋友，唔會再同佢聯絡。今日你見到嘅，無錯我系同過佢一齊，但我系唔會同阿明講，你要講嘅，決定權喺你度。但系你要知道，阿明唔可以無咗我……」又返返去能言善辯嘅Eva，我開始睇唔透我兄弟條女到底系點嘅人。

「你仲好意思講呢啲！」我火都嚟，捉到正都仲要俾女人威脅。

「……就好似我唔可以無咗佢一樣。你會問點解我會搵第二個，你哋到底知唔知女人要咩？其實一句到尾，開心咋嘛。阿明太老實，好似水咁，Simon追咗我好耐，一時間意亂情迷，我啱啱已經搞清楚曬啲關係……」

「阿明系水？！令你好無癮？！咁你又拖住人？！你以為阿明非你不娶？！你以為……」我急起上嚟，忍唔住即刻打斷Eva。

「佢系水，所以我見識過外面嘅嘢，最後都會需要佢。我哋一齊5年，佢有咩愛好，我清楚過你。呢件事俾阿明知道，如果我主動道歉，我肯定佢唔會同我分手，你識咗佢咁多年，知架喎。但我點解要花時間先同你解釋先？因為我知你系阿明兄弟，我想我哋結婚嘅時候，唔會有任何芥蒂，你會系最好嘅伴郎。「Eva將果啲歪理講到似是而非，我一時間答唔到佢。

但我好清楚知道，5年感情，阿明為咗成家立室，連機都唔打，洗多少少錢嘅應酬都唔去。阿明將自己慳到最盡……就係為咗呢個女人。

女死女還在，佢可以搵過一個更好嘅。但，如果你好清楚你兄弟真系非呢條女不娶，條女又好認真咁同你講無下次……

最重要嘅系，我憑咩做架兩先？

「我知你好嬲我，我都好多謝阿明有你呢個好兄弟，但系如果以後我都唔再犯，你揭發咗我，而阿明都決定同我一齊嘅話，以後大家心入面有條刺，你只系破壞咗一段5年嘅感情。我同阿明成日都講架，我哋結婚，你一定要系伴郎呀，得你會最上心……」Eva出絕招，軟硬兼施。

我心諗，你把口咁掂做咩唔去做Sales呢？

我無答實佢，就咁收咗佢線。

然後，我一直諗緊一個問題，直到而家……

如果人哋真系一個願打，一個願捱，我為咗自己嘅正義感去揭發人哋……

系咪好衰？

轉載請註明來源：今天頭條