王君馨近日憑《城寨英雄》花曼一角跑出，20.5吋黃蜂腰再加上迷人舞姿，真系新一代性感尤物。

不過其實王君馨系2007年港姐亞軍，都捱咗成9年先遇到呢個角色。

唔知同佢同屆嘅2007年港姐最後5強而家又點呢？

1. 張嘉兒－冠軍：準備迎接新生命

無錯，2007年就系由張嘉兒爆冷拎冠軍果屆，自此被冠上「豬扒港姐」稱號。由於樣貌相比起同屆港姐真系算唔上靚，所以就算卸任之後都無咩工作機會，都系得啲主持job，拍劇又只系二打六角色，好似2012年嘅劇集《飛虎》，佢做緊閒角嘅時候，同屆港姐黃智雯已經做緊女二啦。

不過其實張嘉兒一直都有努力做運動，想操fit自己，近年亦見到佢擺脫包包面，變得越嚟越索。而早前喺劇集《警犬巴打》做朱千雪家姐，雖然冬菇頭，但角色傻更更幾討好，唔少人覺得佢個樣ok咗。而張嘉兒2015年嫁咗俾圈外從事金融男友，而家仲有咗8個月，不時up相仲被贊為靚媽添。

2. 王君馨－亞軍：未來打女希望

王君馨當年系大熱嚟，所以當選之後當然有大把工作機會。佢08年參加中港聯合製作嘅節目《舞動奇蹟》（第二季），同國內演員俞灝明組成「小明馨」奪得冠軍，因而令唔少人知佢舞藝精湛。不過後來主持飲食節目《日日有食神V》，鬼妹仔嘅佢可能未慣點用中文去形容食物，加上表現較誇張，因而令不少觀眾覺得佢煩。雖然佢都拍唔少劇集，但系成日都做勾引人嘅女人，就算觀眾覺得佢幾索，但都引唔起觀眾好感。

不過喺劇集《My盛Lady》做一啲女人味都無，粗粗魯魯嘅男人婆，反而惹起觀眾好感。再到近日《城寨英雄》雖然又系做性感角色，但加上身世可憐值得同情，配合條20.5吋黃蜂腰真系連女仔都贊好，加上王君馨努力練武打場面，終於成為憑「花曼」一角彈出，期待王君馨之後可以帶俾觀眾更多唔同角色啦～

3. 周美欣－季軍：進軍Model界

相信唔少人都佢印象唔太深刻？雖然拎咗季軍，但TVB無咩點派job俾佢，得好少旅遊節目做，又或者只系做劇集嘅行行企企角色，所以周美欣最終都喺2010年離開大台，轉而加入寰亞唱片簽約做歌手。點解是去咗做歌手？其實唔講你可能未必知，未選港姐之前，周美欣2005年已經拎咗新秀歌唱大賽溫哥華選拔賽冠軍，不過最後只喺TVB8全球華人新秀歌唱大賽拎得個時尚形象大獎。

而周美欣喺2013年出咗第一隻個人EP，但之後就無而為繼，2015年又去咗參加《亞洲超級模特兒新秀大賽》（第三季），但只得第10名。不過周美欣無放棄，繼續努力搵工作機會，主要行嚇珠寶show，拍嚇劇同做舞台劇，近排仲有傳有意到韓國發展。

4. 趙希洛－五強：上位做女二

趙希洛其實系前藝員梁小玲個女，07年當選港姐打入五強之後，就加入咗TVB藝員訓練班，成為TVB合約藝員。雖然起初拍劇都系做二打六角色，不過2012年喺劇集《心戰》做陳豪女助手開始被人留意，之後更成為劇集《愛・回家》固定班底，演技受到觀眾認可。至去到2014年喺劇集《八卦神探》做被人嫌棄嘅變性人殺手，複雜嘅內心演技受到激贊。

其後喺劇集《實習天使》客串做精神病人，因為做得好好，有網民甚至指佢系「御用癲婆」。演技好自然有人賞識，捱咗9年終於喺而家夜晚播緊嘅劇集《超能老豆》做女二，希望嚟緊TVB可以重視多啲呢個好演員啦。（而且其實希洛BB學歷好高，讀到法律同國際商業及銀行學碩士，仲系太子女嚟，但就不靠父干靠實力。）

5. 黃智雯－五強：新晉女一花旦

雖然都系07年落選港姐，不過香港演藝學院畢業嘅黃智雯，無理由唔俾機會佢學以致用啩？落選之後開頭就只系做行行企企角色，但系2009年劇集《巴不得爸爸》做蘇鳳蓮一角開始為人熟悉，之後多套劇集都有重要戲分，例如《搜下留情》、《居家兵團》、《怒火街頭》等。之後2012年喺劇集《缺宅男女》飾演巴辣人妻「關二嫂」，演技大獲好評，自此人氣急升。

先後成為劇集《On Call 36小時》、《飛虎》女二，又喺劇集《巴不得媽媽》做女三，同兩位阿姐級演員黃淑儀及汪明荃合作。同年，佢亦奪得《萬千星輝頒獎典禮2012》飛躍進步女藝員，更首次入圍「最佳女配角」。

舊年黃智雯更首次喺劇集《拆局專家》擔正做女一，之後亦有不少劇集擔正做女一，算得上成為TVB新一代姐仔中嘅當家花旦。

同場加映：

6. 何傲兒－旅遊大使獎：另有副業

何傲兒當年都系大熱，不過最後8強都唔入，只得一個旅遊大使獎。落選之後何傲兒加入咗TVB藝員訓練班，幾靚嘅何傲兒好快就有份拍08年處境劇《畢打自己人》，不過就彈唔起。之後再拍11年處境劇《誰家灶頭無煙火》，與主角陳智燊有感情線，因而有重要戲分，先開始叫落入觀眾嘅眼。

但之後拍嘅劇集始終都做啲無咩特別嘅角色，最為人熟悉反而系佢參加藝員歌員比賽節目《星夢傳奇》同周子揚擦出愛火花，但又驚爆傳出何傲兒同林建名發展「爺孫戀」，林建名其後接受訪問仲喊哂口話何傲兒唔聽佢電話。最後何傲兒同周子揚雖然愛到被人影喺街上「13啜」，但之後有傳因錢銀問題而分手。何傲兒更喺2015年表示約滿並離開TVB，現時為大名娛樂旗下藝人。

轉載請註明來源：今天頭條