相傳農曆七月為「鬼月」，乃鬼門關大開的日子，無主孤魂都會從陰間到陽間接受人間的供養。而今日正正係七月十四鬼節，香港人普遍會於家中祭祖及燒街衣，所以有唔少禁忌及風俗大家都要注意，而且最好早點歸家，否則好易同「老友記」撞到正！近日張栢芝媽媽戴莎莉在「鬼王」的靈異電影《魕異》中演出，更擔正做女主角，原來佢除了對靈異事物有興趣，亦有過唔少靈異經歷！即刻睇睇！

據悉今次栢芝媽處女下海拍戲，係因為佢本人係潘紹聰忠實粉絲，對靈異相關事物特別有興趣，仲參加過幾次鬼王帶隊的靈異旅行團！今次在片中佢同樣係一位媽媽，講述佢女兒因遇人不淑，所以多次懷孕及墜胎，最終被嬰靈纏身遇害。栢芝媽就話希望借電影警惕時下年青人，要帶眼識人。

栢芝媽對神神怪怪有興趣，雖然沒有宗教信仰，但不時都會去泰國拜四面佛，仲遇過靈異事件！四、五年前栢芝媽同三位子女栢芝、碧芝及豪龍去曼谷，入住當地一家K字頭的酒店，佢哋住地下嗰層，一開玻璃門就有私人泳池那種。

栢芝媽憶述當晚栢芝打電話話自己間房啲燈不停貶，但當佢同大仔去到後，啲燈貶得更厲害，嚇到眾人即刻抱埋Quintus(栢芝次子謝振南) 搬房。但搬房後先記起未攞Quintus啲奶樽，栢芝媽折返後，隨時有一陣涼風迎面吹來，佢即時講：「唔好搞細路仔呀，我過嚟攞番奶樽咋。你要搞，搞我，唔好搞細路仔呀。」

而嗰啲「朋友」似乎聽得明，栢芝媽攞奶樽返房後，便一個人走到泳池邊不停地喊，子女點叫佢都冇反應，足足喊咗一個幾鐘！栢芝媽第二日就Check Out離開，栢芝亦好心咁提醒新住客間房有嘢，叫佢哋小心。

而栢芝媽今次拍攝《魕異》同樣有靈異經歷！話說潘紹聰搵師傅喺和合石墳場搞咗場百鬼夜宴，準備咗十多圍盤菜招呼一班靈界朋友。該日原本冇戲份的栢芝媽前去探班，未開始時眾人已經聽到墳後面有女人唱歌，之後當師傅搖鈴「叮」一聲通知班朋友開餐時，栢芝媽話嗰刻好暈好暈，暈到抖唔到氣，要即時離開現場，之後仲要去師傅的佛壇「清身」。

轉載請註明來源：今天頭條