過多幾日（8月11日）就系《使徒行者》電影版上映嘅時間。而TVB一向嘅慣例，都系一部劇集如果叫好叫座，就會開拍續集，然後拍電影，拍前傳，拍外傳……不斷消費最初成功果一部電視劇嘅叫座力。

《使徒行者》電影版預告片 ▼▼▼

例子有《衝上雲霄》、《衝上雲霄２》、《衝上雲霄》電影版；《學警狙擊》、《潛行狙擊》、《Laughing Gor之變節》、《Laughing Gor之潛罪犯》；《十月初五的月光》、《十月初五的月光》電影版；《溏心風暴》、《溏心風暴之家好月圓》、以及嚟緊又話開拍《溏心風暴3》。

坦白講，有時真系唔希望TVB會拍續集、電影版，因為呢啲續集、電影好多時候都系以消費觀眾對劇中主角嘅眷戀、人氣為策略。內容同原先嘅電視劇有時候更加系「大纜都扯唔埋可」。

《衝上雲霄》電影版就系一個好好嘅例子，電影好似將三套愛情微電影夾硬拼湊埋一齊而已。（好耐之前我哋都講過《爛到唔可以再爛嘅《衝上雲霄》電影版！好似睇左3套MV！》）

《使徒行者》電影版，單單睇牌面就十分華麗，有吳鎮宇、張家輝同埋古天樂。雖然佢哋都系影帝級，但其實三人同原先嘅電視劇版根本毫無關係！

雖然釘姐（佘詩曼）系女主角，但另一靈魂人物爆seed（林峯）就無佢份演。無咗爆seed嘅使徒行者？仲系使？徒？行？者？咩？

另外，再睇下電影版嘅劇情大綱，當中講到釘姐喺尋求臥底嘅行動中不其然對吳鎮宇飾演嘅Q sir心生傾慕，二人漸生情愫……

睇到呢度，第一個反應就系——TVB又亂點鴛鴦譜！明明喺電視劇中釘姐同爆seed經！歷！生！死！嘅愛情如此動容，一到咗電影版，佢就移！情！別！戀！

真系睇個劇情大綱都睇到O曬嘴！咁只會令一直支持釘姐同爆seed嘅粉絲，無所適從，甚至好！嬲！豬！

如果唔想叼出戲，又想睇吳鎮宇、張家輝、古天樂、佘詩曼同埋許紹雄嘅話，咁唯有當《使徒行者》電影版同電視版系兩個獨立嘅版本咯！

即系點？大卡士x你嘅情懷，擺明系想你俾！錢！買！飛！咪你以為搞咁大壇嘢，好好玩呀……

轉載請註明來源：今天頭條