華爾街班金融大鱷日日都要睇實個股市，真係好似三師兄話齋:「秒秒鐘幾十萬上落」，梗係唔得閒去捉近期熱爆嘅《Pokémon Go》小精靈啦！但話曬係全球熱潮，就算你唔玩，個客可能都會玩；為咗喺有限時間最快掌握捕捉小精靈絕技，方便同客人溝通，於是乎，大鱷之間最近就流傳咗呢一份疑似《Pokémon Go》機密文件嘞!

呢份機密文件上面就寫咗5招教你神速掌握遊戲，

第1，就係用張紙包住部電話，留番螢光幕上面一條「航道」，令精靈球唔會偏離航道，咁就可以好準確咁，以直線拋出絕妙精靈球，掟中精靈，就算遇到超夢夢都一樣冇有怕！不過呢招相信好多人都識，以下招數先係高招。

第2，就係教你足不出戶照樣「生蛋」，因為Pokémon生蛋係以步行距離計算，坐車「作弊」係冇用，咁點算好？就係將部電話綁上去風扇，風扇轉幾多，就行幾多路！分分鐘睇條短片已經生到蛋！

第3，Pokémon食電就係人都知，個個訓練員都肯定有部「尿袋」跟身，隨時叉電，但咁就唔夠型喇，外國已經有人成功整咗部「精靈圖鑑」，背後係尿袋，放部電話上去就用得，唔單止電量大咗，仲可以拎住部圖鑑周圍去，簡直同動畫入面嘅小智一模一樣。

第4，而家唔少電腦神人開始加入呢個遊戲，佢地唔再係自己出門口逐步行咁捉精靈，而係寫程式代替真人，無論係行路、拎道具，抑或捉精靈都一樣咁掂，睇嚟唔洗等到電腦取代你份工，就已經率先取代咗你個訓練員身份。

第5，因為Pokémon Go係靠定位運作，市面上已經有唔少軟體可以整個假GPS，到時可以將自己定位係美國捉精靈又得，係日本捉都得，而且仲可以配合手制玩，絕對係高招！不過呢招就有少少風險，隨時被開發商發現，咁就慘慘豬冇得再玩喇。

精靈大師教你神速升呢

講開又講，要捉高CP值嘅精靈，一定要本身夠「高呢」，但升呢絕對唔易！而第1個捉曬所有精靈嘅資深訓練員Nick Johnson今次就大大方咁傳授佢獨門嘅4招升呢秘技。當然，講兩咀就話可以一次捉曬所有精靈，講你都唔信啦，但華爾街金融大鱷，以至我哋呢啲普通市民經過大師以下嘅指導後，升呢睇怕都應該無問題啩!

1、狂開lucky egg

用lucky egg可以令你係30分鐘之內得到雙倍經驗值，不過免費嘅lucky egg唔多，每次升到等級9,10,15,20,25先可以拎到一個，想拎多啲就惟有課金。

2、波波、綠毛蟲兼獨角蟲進化大法

因為每一次進化都可以拎到500經驗值，用咗lucky egg之後再進化就可以拎到1000經驗值，而且最好吼實波波，綠毛蟲同獨角蟲，因為佢哋每次進化都只係需要12個candy，十分實惠，儲埋一次過進化，隨時拎到勁多經驗值！

3、生蛋大法

開完lucky egg之後生蛋可以拎到400經驗值，而課金嚟講絕對比用lucky egg好，所以Nick都推介話，如果要比錢不如買生蛋器好過買lucky egg。

4、積少成多密密捉精靈

去一啲多精靈嘅熱點，開完lucky egg之後，每捉到1隻精靈有200經驗值，捉未見過嘅精靈更加有1200經驗值，慢慢積少成多一樣可以升到呢！

轉載請註明來源：今天頭條