TVB將網絡人氣作家藍橘子潮文《我做咗一日女朋友只右手》被拍成微電影，由就即將在紅館開個唱的坤哥聲演，還有馬頭crossover吳若希零違和主題曲MV。

《我做咗一日女朋友只右手》 前排喺電視見到馬明，一見到佢個樣就無名火起，呢條友無論系咩劇情、咩對白，都100% match到樹熊「食葉樣」。

我咁激動，因為我個名…都系叫馬明。而我女朋友就當正我系馬國明咁玩。 話說今日返緊工嘅時候，女朋友突然SEND 咗個whatsapp畀我。 『救命！快啲嚟救我！』 我打電話畀佢問嚇咩事，原來佢今朝追巴士時仆低，搞到只手臂甩骹…

我真系第一次聽人追巴士追到甩骹，當場就笑到收唔到聲：「咁妳最後追唔追到架巴士？」

「你弱智嫁？我去醫院啦，仲追架車嚟做乜啊。」

「咁…即系點啊？」

「嚟醫院接我啦仲問！」 我趕到去醫院，喺門口就見到女朋友只手包曬繃帶坐喺度，塊面仲黑過包青天。於是，我打算學韓劇咁衝上前攬住佢。 點知女朋友一手推我：「啊啊啊啊！我只手好Ｌ痛啊！你做乜啊！」

「有冇咁痛啊？我見張家輝甩骹都系自己搞掂～唔使怯喎…怯你就輸一世啊！」

「好叻啊？咁多金句，你估自己系黎明啊？你馬明咋！」

佢又話：「醫生話我第一次甩骹，呢幾日都要固定只手臂唔郁得啊。」

「咁妳想我點？」

「呢段期間，你要做我只右手！」 就系咁，我嘅右手生涯就系咁展開咗。佢由離開醫院嗰一刻開始，就全程撓埋只手，連開的士門都要我開。送佢返到屋企，女朋友就話：「有啲熱喎，等我用右手去開冷氣先得！」 「嚇？哦…」扮演緊右手嘅我，就去咗開冷氣。 跟住女友又話：「口喝啊，去斟杯水先。」於是我又斟咗杯水畀女朋友。

「我肚餓啊…」佢好似有啲玩上癮咁。

「我即刻去煮嘢妳食！」

為咗氹返女朋友，我嗱嗱聲走入廚房煮咗個辛辣麵，點知女朋友望住碗面話…

「馬明，你系咪串我只右手揸唔到筷子啊？」 幸好我魯芬急轉彎，即時補鑊：「我系右手，梗系我餵妳食啦！」

原本我以為喂女朋友食麵，會好似韓劇咁浪漫，點知現實只系一套搞笑嘅綜藝節目…

無論我幾小心都好，筷子唔系戳到佢個鼻，就系打到佢下巴，碗面都漲曬先食到半碗… 「不如用叉啦好無啊？」女朋友。 我入廚房拎只叉繼續喂佢食麵，但我開始發覺有啲唔對路…女朋友塊面仲紅過馬騮屎忽！

「點解我塊面好似畀火燒咁嘅？」女朋友問。

「唔系吖～無咩事喎。一系我去拎條毛巾畀妳抹一抹面啦～」 嘩我頂！大鑊！唔可以畀女朋友見到自己咁，我飛奔入廁所用凍水濕咗條毛巾。突然間，女朋友走咗入嚟從後攬住我… 「多謝你全日咁仆心仆命照顧我啊，又煮麵畀我食，我唔系有心發你脾氣嫁，但我只手真系好痛，又嬲自己咁論盡。」

我仲以為咩事，嚇得我吖…

我話：「如果我系右手，妳就系左手，我哋永不分離。」

突然，女朋友好大力咁推開我：「馬明死開！」

佢兩隻眼睩到牛眼咁大，全身震曬，十足鬼上身咁款。原來佢望緊廁所塊鏡…

而鏡入面，有個女版關公…

「我塊面發生咩事…」

「我諗妳塊面唔太受得辣…」

「我塊面唔受得辣？我唔啱啊？你唔好成個呆樣咁啊，你以為自己馬國明啊？！你馬明咋！」

「好對唔住啊～」 我以為就算無韓劇咁浪漫，都會好似TVB劇咁結尾男女主角大團圓，但現實又點會咁完美吖… 「我唔理啊，我罰你做曬屋企所有家務，換床單洗冷氣機洗雪櫃！」 我覺得今次事件，應該歸咎於馬國明！佢繼續喺電視機面前露出一副食葉樣，令女仔以為全男人都系食葉…再咁落去，大家都無運行。

文章來源: https://www.twgreatdaily.com/cat99/node1203769

轉載請註明來源：今天頭條