King sir 你好

我同我女朋友其實大大話話都拍咗三年拖，一直喺我眼中都系好sweet好sweet，我好愛佢，都當佢系我嘅終身伴侶。

但系最近兩三個月，硬系覺得佢怪怪地，點怪又講唔出，不過三年一齊嘅經歷令我覺得佢有少少唔同，所以想講俾你知。

就喺早兩個星期，我有個朋友無啦啦打俾我同我講話啱啱好似見到我女朋友同一個男仔食飯，仲好親密。

我即刻好嬲，大大力叼呢個朋友：「咩好似啊叼你，唔好亂講！」

我個朋友仲好認真咁叫我小心啲，咁我就叫佢唔好再講啦我唔信。

到咗前日，我本身就約咗女朋友出街，之後我坐緊車時佢打咗個電話嚟，話突然有親戚嚟咗唔出嚟。

咁好啦，我就諗反正出咗嚟就去打個轉，我就喺去七仔買嘢飲嘅時候，我見到我女朋友喺對面一間酒店度出嚟，旁邊仲有個男仔拖住佢。

個下我真系痴咗線，我自己個心好清楚發生咗咩事。我手都震埋，又唔敢打俾佢，就發微信問佢。

我：「系邊啊你？」

佢：「屋企咯，啲親戚好多好煩，睇嚟今晚都出唔到嚟～」

我果下真系忍唔住，啲眼淚水狂飆出嚟。

我就再喺微信問多句：

我：「咁你旁邊個男仔系邊個？」

佢：「下？你系邊？」

我真系個心痛到唔知復佢咩，就傻傻下行到附近一間M記坐咗喺度。

之後佢就打過嚟，但系我真系唔想聽到任何嘢。

一次、兩次 三次……我已經唔記得咗佢打咗幾多次過嚟。

我就一直呆住望住堆薯條坐咗好多個鐘頭。到我望返部手機，有一大堆未接來電同微信，我撳咗出嚟睇到一大堆解釋……

我拉拉拉，將個微信對話拉到最早嘅時候，佢話：「對唔住……系我錯……系我一時做錯……」

個下一切都明白，我好想佢答我個男仔真系親戚！我好想佢答我其實個女仔唔系佢！

我點都諗唔到，平時咁溫柔善良，蟻都唔敢踩死一隻嘅佢，原嚟俾咗頂綠帽我戴！

我返到屋企之後，望住天花板好耐，喺度諗我同佢之間嘅回憶……

就喺今日，我決定同佢分手，我喺微信打咗堆字俾佢之後，我就一直坐到而家，我真系好痛，痛到個心口好辛苦。

我唔想同朋友講，所以想聽下King sir意見，或者一個安慰都好～

無辜仔上

無辜仔：

聽你咁講，真系傷得好緊要。古乳有暈：「戴過綠帽都怕黑！」

你個女朋友，呀唔系，你個EX又真系好過份，你決定同佢分手都無問題，古乳又有暈：「只要出軌，好難一齊！」

不過你實在太愛佢，唔捨得佢，都可以唔分手，原諒佢嘅，因為古乳都有暈：「愛一個人，綠帽no problem！」

如果你想聽到更多意見，咁就要睇下『金句王』嘅評論區喇，聽講好多神評論，好多故事，比你更加慘慘豬！

King sir

轉載請註明來源：今天頭條