由許紹雄、梁烈唯同金剛三個麻甩佬主持的綜藝節目《男人食堂》，由三人「參考」日本人氣劇集《深夜食堂》開間居酒屋，然後每集請唔同嘉賓上去食嘢吹水。不過吹水內容通常都好破格，講性講鬼講粗口咩都齊，而且經常sell意淫，絕對係一個兒童不宜的節目！話咁快《男人食堂》昨晚播出最後一集，又請來一班嘉賓大談「性經」，除咗一眾靚女大談女性色心起的話題，仲有近日憑《一屋老友記》人氣急升的「細寶」張彥博仲自爆當年第一次解決性需要的經歷！

呢個話題咁破格，真係難得會睇到藝人喺節目中討論，阿博就話自己第一次有「鹹濕」呢個感覺，應該係六、七歲的時候。至於第一次要解決性需要，大家就爆笑地問佢係有對手還是用自己對手？

豹哥問阿博當年係讀男校還是男女校，阿博就話係男女校，而第一次就係自行解決，冇人幫！

咁阿博當時係有同學教、自己睇錄影帶定係無師自通？佢就話其實係同學教 (小編記得當年個個都話係同學教，咁唔知個同學又係邊個教呢？) ，而且阿博唔知點解一邊講就一邊望住Mayanne，搞到Mayanne都忍唔住話唔好望佢！

Mayanne問阿博係咪睇Biology啲紀錄片，阿博即時興奮咁話無錯！果然大家都係同道中人。

阿博再補充話圖書館有好多「好正面」的教科書，俾佢認識更多關於女性身體的資訊！等小編得閒又去多啲圖書館先…

而講到刺激性需要，席上經驗最豐富的豹哥就話原來印度人懂得藉食咖哩刺激性需要，因為咖哩、蒜頭同朱古力等食物都有輕微催情作用，又長知識了！

之後豹哥就問女仔色心起、好有性需要時的狀態係點樣呢？呢個問題真係好鬼尷尬，睇嚇一眾靚女點答先！

Mayanne話自己會面紅！

江欣燕就話自己會耳仔紅。

駱胤鳴仲誇張，話自己成個人會即刻「黐立立」，出曬汗！

聽曬咁多位女士的講法，Ben Sir都忍唔住話如果見到一個女仔咁樣，都唔知佢係有性需要，還是身體有事要幫手打999！

豹哥問如果真係去到某個位，性需要強烈到忍受唔到時，咁點解決好？Mayanne就話會沖個涼！唔知佢沖涼時會唔會有啲額外嘢要做呢？

之後阿博同駱胤鳴要先行離開，大家都話佢又想去圖書館睇教科書！爆笑！

轉載請註明來源：今天頭條