CC最近識咗個男人，系男人，唔系男朋友。

「我哋喺一齊，但一開始佢已經講咗唔系想要一段認真嘅關係，只係為開心。」CC扮灑脫咁同我講。

呢段關係最特別嘅地方就系，兩個人一早講到明，無人要認真、正常咁發展。

「我都唔想諗咁多，開心咪算囉，無將來架，大家都講到明只係為咗開心。」

唔好諗太多，亦都唔可以諗太多。無將來，亦都無期待，呢一刻只求互贈開心。

聽CC咁講，我一時間覺得非常安心——

大家不過喺度玩緊情場遊戲，玩家對玩家，至少一開始已有共同目標，唔會一個專心去愛，一個專心去玩，造成落差。

奇形怪狀嘅男女關係一直聽到唔少，認真相愛嘅有一堆，唔認真相愛嘅亦有一大把。

大家合眼緣，講唔上系愛，但又自私咁認為，唔想錯過，於是就搵個中間點，互相消磨時間。

明知系一段唔真實嘅關係，但開心就成咗最好嘅原因。既愛落去，又錯落去。但反正合則來，不合則去，大家相安無事。

一早講咗「一齊只係為咗開心」，將事實攤開，預早封頂，大家謹記界線細邊度。

雖然少咗愛情嘅浪漫，多咗幾分現實嘅殘酷，但免卻咗後顧之憂，更唔使到頭來要負上任何責任。

記得「為開心，尋刺激，無壓力」，系呢段關係嘅宗旨，大家只有今日，無聽日。我說到明，你仲敢要，唔敢要？

今日切斷無謂嘅，多餘嘅遐想，總比有日你深陷其中，抽唔到身來得好。

「縱是遺憾收場，都必需跟你明刀明槍」嘅一場遊戲，要玩就由頭到尾都唔好抱有期望，唔好動真情，免得節外生枝，影響遊戲心情。

呢一刻填補一下彼此嘅寂寞，點亮一下大家嘅人生，對於好多人來講，可以談情、可以做 愛，多個人陪，有何不可？

記住，「我同你一齊，只係為咗開心」，純粹開心，唔好上身。

亦都要記住，唔好突然，認真，愛到上心……

轉載請註明來源：今天頭條