Pokémon Go 一推出，全世界即刻陷入瘋狂狀態，一街都系小智。遊戲要玩得好，當然有攻略，但原嚟呢啲技巧，放喺愛情嘅世界，一樣啱用。
匿喺屋企，系捉唔到小精靈
呢個遊戲嘅設定就系要訓練員周圍走，先至可以收集到唔同嘅小精靈。你羨慕朋友捉到比卡超，而自己就每日匿喺屋企，比卡超當然唔會無端端出現啦。
同樣，唔少單身汪，聲稱自己好想拍拖，經常將「介紹啲異性朋友俾我識」掛喺嘴邊，自己就從未踏出過故有嘅朋友圈，咁又點會有新嘅機遇呢？
如果你嘅朋友有筍盤介紹俾你，一早就介紹咗啦！與其旨意真命天子／天女從天而降，不如主動出擊！你唔一定要參與咩相睇，但最少都要根據自己興趣，嘗試報讀不同嘅興趣班咯！
收服精靈，系要練習架
要成功捕捉小精靈，就要多練習掟精靈球嘅技巧，否則連續幾次都掟唔中，小精靈就會消失。平日收服得多波音蝠，掌握到掟球嘅力度、角度，到下次見到超想要嘅比卡超時，就唔會俾佢逃走。
同樣，溝仔溝女都需要練習。有啲單身汪，唔系無追求者，但就從來唔同任何一個嘗試發展，成日話要等「真命天子／天女」嘅出現。
一嚟，唔知果個「真命天子／天女」何時出現；二嚟，就算出現咗，無點拍過拖嘅你，又點會斷定佢就真系適合你？又假設非常幸運咁，佢同你拍拖，你又有信心懂得如何同伴侶溝通？可以拿捏到兩人相處時鬆緊嗎？
愛情一開始，或者只因一點火花，但要維繫愛情，就需要技巧，而技巧系可以透過練習得嚟。古乳有暈：「多謝前度調教現任」，就系咁解咯。學過嘢，食過幾晚夜粥，大家嘅關係自然更好相處。
唔好投資喺錯誤嘅精靈上
訓練員其中一項任務，就系讓小精靈進化，網上一個攻略就教大家，唔好浪費資源為戰鬥力低嘅小精靈進化。你投資大量精力喺一隻只有10戰鬥力嘅車厘龜上，最終佢可能都只系有50戰鬥力。相反，集中火力培訓一隻捕獲時已有100戰鬥力嘅車厘龜，先至會事半功倍。
愛情路上，只有極少數人一開始就會遇見值得一直行落去嘅人，如果你同對方拍拖過後，發現佢唔系理想對像，就唔好繼續再浪費時間、青春、心神，更唔好妄想可以改變佢。死守喺一個錯誤嘅人身上，未必會守得雲開，更大可能系會得不償失。
希望大家喺成為精靈訓練員同埋愛情路上，都得心應手，pika！
轉載請註明來源：今天頭條