近年TVB收視真系低到慘不忍睹，好似上星期最高收視都唔夠25點（星期五晚嘅《純熟意外》尾段），以前TVB劇集閒閒地平均都30點收視，而家有30點已經要開香檳慶祝。TVB收視跌嘅原因有好多，除咗劇集質素下降、上網睇片之外，其實TVB劇集嘅主角嚟嚟去去都系果幾個，真系睇到觀眾覺得煩厭。近年TVB鬧小生花旦荒，想硬捧上位嘅小生小花又經常被彈演技幼嫩，今日小編就搵咗啲有豐富演出經驗但系做極都上唔到男一女一嘅演員，唔知佢哋做男一女一嘅話，大家又會唔會想睇呢？

敖嘉年

飾演奸到出汁蔣必文去到單純善良嘅排骨仔對於敖嘉年嚟講都冇難度，令到唔少觀眾留下深刻印象。去到今年年頭《鐵馬戰車》飾演警員喺劇中同黃德斌由朋友變敵人，唔少人大讚佢好演技，做反骨仔角色非常到位。

黎諾懿

喺處境劇《愛·回家》飾演最接近神嘅男人馬壯而成功入屋，唔少人都認為佢嘅演技有進步，如果佢喺劇集擔正嘅話，大家有覺得點呢？

陳國邦

話陳國邦好戲相信冇人會異議，可惜佢喺00年回巢後並未獲力捧，去到12年先憑《大太監》中飾演彭三順一角跑出，演技獲網民激贊。上年10月，佢第二次離開TVB。離巢兩個月後，陳國邦重返TVB伙拍毛舜筠、黎耀祥出演處境劇《愛·回家之八時入席》。

姚子羚

越嚟越靚嘅姚子羚喺《酒店風雲》中飾演壞表妹鄭可兒令佢成功獲觀眾關注。去到上年終於憑《四個女仔三個BAR》、《張保仔》等中有出色演技勇奪「雙料女配角」，演技備受肯定，可惜一直徘徊二、三線位置，仲未有機會擔正。如果TVB下次捧佢做女主角，相信觀眾都會buy喎！

林夏薇

林夏薇喺《收規華》中嘅飾演民國花魁花影月，演出令人刮目相看，仲話佢搶眼過女主角楊怡。之後，喺播出嘅《公公出宮》飾演女扮男裝嘅金帶男同曹永廉飾演嘅公公完全相反，唔少網民認為佢哋好有火花，林夏薇演得入型入格。

簡慕華

以前大家對佢嘅印象系秘書，好似《同事三分親》嘅Doris同埋《陪著你走》嘅阿Wing等等，01年開始拍劇，可惜都系做閒角，戲份一直唔多。去到近年，佢嘅演技終於被賞識，好似喺《刀下留人》中飾演面有紅胎痣嘅妓女赤映霞，佢成功演繹一個身世可憐、因環境而無奈妥協嘅悲劇人物，唔少網民大讚佢嘅有樣又有演技。

當然啦，講咗咁多，肯定有啲未必啱大家心水，例如有啲人只鍾意睇蔡思貝，有啲人只鍾意陳凱琳……

轉載請註明來源：今天頭條