古乳有暈：「十個男人九個滾，仲有一個仲諗緊」？呢句說話，比無數女人奉為金科玉律，認定世上再無好男人。

嗱，今日又再多一單偷食事件，伍詠薇任職廣告界嘅丈夫練海棠被傳媒揭發，背妻疑似「車震」長發索女，盡享2小時甜蜜刺激。不過伍姑娘一直冷靜回應，盡顯成熟大方，已贏盡同情及掌聲。

但系面對伴侶偷食，內心難免悲傷，好多人可能情緒失控。娛樂圈其實有唔少人曾公開回應出軌風波，有人分手離場，亦有人「隻眼開隻眼閉」，個中不乏「神級回復」：

1. 伍詠薇

老公懷疑偷情，引來大批傳媒追訪，多間媒體今日仲以fb直播形式追問，面對現場大批記者壓力，伍姑娘一直冷靜回應，話會「返去打佢籮柚同唔睬佢」：

「我當時凈系諗住打佢200下籮柚咯，咁曳，約女仔出街，我又唔知嘅，個女仔我又應該唔識嘅。」

佢又強調，作為成熟嘅太太，應冷靜問清楚事件，唔應該盡信影片中內容；又代老公向大家道歉。

「佢要佢太太走出嚟，自己玩完泥沙就要老婆出嚟同佢執手尾，呢度我代表練海棠同大家講聲唔好意思。」

相較其他女人可能會情緒失控，大興問罪之師，伍姑娘嘅冷靜同高EQ實在難能可貴。

2. 唐詩詠

有人話，越夾硬管住一個男人，佢就越會追求自由。唐詩詠就深明呢個道理。小編之前出文都講過佢系絕世好女友，佢向來樣靚聲甜，對愛情好專一。

點知同洪永城拍拖未夠兩年，男方被指瞞住唐詩詠同舊愛兼鍾舒漫形象指導Bird Tse翻撻。Bird Tse更喺fB上載一張寫上「明天我要嫁給你」嘅相示威。

正印主權被受威脅，以為唐詩詠會大吵大鬧，甚至同洪永城步向分手邊緣，豈知唐詩詠拋下一句：

「我從來都唔會管另一半，咁樣會辛苦自己，刻意管住一個男人，關係都唔會長久。 」

一招以退為進，既保住男方面子，又保住咗自己個男人，贏曬。

3. 林鳳嬌

講到胸襟廣闊，包容對方無限次犯錯，相信林鳳嬌敢認第二，無人敢認第一。成龍82年同林鳳嬌喺誕下房祖名前一日同佢奉子成婚。但好景不常，99年成龍同吳綺莉撻著，並喺二人嘅私生女出生前幾天開記者會，堅持自己系「風流而不下流」，又大爆經典金句：

「做錯咗全世界好多男人都做錯咗嘅嘢，亦都可以話系一時貪玩。」

後來喺宣傳電影《寶貝計劃》時，佢接受內地電視台訪問亦重提舊事，指：

「幾個男人做錯嘅事情，我是其中一個而已，我也不是唯一嘅一個。」

大婆一直忍氣吞聲多年，看似無面，不過堅持到最後就系勝利者。成龍近年推出自傳時曾於訪問直認，現時已更確定林鳳嬌為走下剩餘人生路嘅伴侶，又承認對吳綺莉母女傷害，但無打算同個女相認。「隻眼開隻眼閉」嘅愛情終於獲勝，但系咁樣嘅勝利，你又想唔想要？

4. 朱慧敏

有人抗爭到底，伴侶偷食亦不離不棄；亦有人寧可長痛不如短痛，分手作結。朱慧敏經歷「車震事件」，娛圈浮沉多年，終於喺舊年同拍拖3年嘅EO2成員Eddie定婚。

點知天意弄人，婚未結成，Eddie就被影到背住女方深夜買白酒上長發索女屋企通宵談心。Eddie之前早有前科，每一次朱慧敏都選擇忍讓，甚至幫對方解畫，但今次佢終於說了一句：

「其實呢件事唔系第一次發生，我想交返比男方面對傳媒，同埋公眾去交代。」

兩人最終分手，朱慧敏喺中秋佳節正式「斬纜」，稱Eddie現為其「生意夥伴」、「好朋友」。

5. 陳慧玲

太陽娛樂文化老闆周焯華生性風流，前妻陳慧玲一直為保大婆之名同「小三」名模Mandy Lieu交戰多時，但系最終不敵。

周焯華14年起同Mandy Lieu密會，Mandy更於同年8月喺微博發聲明直認戀情。正宮同小三不斷角力，周焯華都甚少回應，但大婆一直堅守，捍衛家庭至最後一刻。即使Mandy15年5月自爆喺英國產女兼有周焯華陪伴在側，陳慧玲都只系喺Facebook轉發「24字真言」冷靜回應：

「我從來就不愛 和別人爭東西 你喜歡就拿去 拿得走就拿去」

當時大婆自己亦即將剖腹產子，壓力極大，但佢面對傳媒追問仍大方回應：

「每一個人都只需要為自己嘅人生負責任和交代，至於我嘅家事，我們一家人自會處理，並無需要用作公開討論，謝謝！」

但系「忍得一時忍唔到一世」，舊年底周焯華同Mandy喺傳媒面前「世紀一拖」，最終令陳慧玲心如死灰，忍無可忍提出離婚。如今Mandy今年為周焯華懷上第二胎,更有傳可能喺今年內結婚成為正室。面對小三即將「坐正」，陳慧玲自得湊女樂，更發文自勉：

「人生一個磨練嘅過程 如果不經歷風雨 永遠都不會成熟 我們應該在陽光下燦爛 風雨中奔跑 對自己說一聲昨天挺好 今天很好 明天會更好」

轉載請註明來源：今天頭條