話說，台灣最紅樂隊五月天今年終於可以再喺紅館開騷，上年無期開唔成，所以今年香港嘅五迷真係餓足兩年㗎。

噚晚嗰場，阿信繼續出盡全力唱唱唱，全場堅係Rock It！不過有一個男人，無啦啦喺阿信講嘢嗰陣行咗出嚟……仲好高調咁當眾向女友求婚。

阿信都心諗做乜呀，就問佢哋：「求婚！？紅磡的工作人員很辛苦，要驗票要維持秩序還要當證婚人...…」

不過五月天就好專業嘅，成team人繼續用對「準新人」講笑，全場都笑到肚痛！不過真係過咗好一段時間喇，於是阿信就話，你哋有你哋忙啦，我哋唱我哋嘅！

呢個時候大家都ready聽歌，但係求婚男無走，仲留喺當眼處喎。

之後連怪獸都忍唔住，講笑話要送《你不是真正的快樂》畀佢哋，五迷都繼續笑爆肚！出名High到手都斷嘅MayDay演唱會，就「被安排」咗一段咁嘅插曲。

呢對男女竟然都無走，仲戴埋戒指，大大力擁個抱先走……五月天喺台上都話，今次實超時啦，啲罰款邊個埋單先，不如搵對「準新人」找數啦。

多得五月天幽默處理，呢段本應Dead Air嘅時間，五迷s係笑到癲咗！呢啲就係經驗！

最後點算？演唱會真係超時接近十分鐘，五月天就一定被罰錢，最少都五位數。故事未完……威威豬求完婚嘅自私男，仲上facebook去「五月天 歌迷 同聚會」群組，問大家可唔可以畀噚日求婚嘅相佢…

結果歌迷陳小姐終於忍唔住要爆喇，寫咗篇文教訓嗰對自私「準新人」。其實求婚係開心事，合法又唔阻住人咪得囉，點解要成場過萬人陪你做騷？

陳小姐已經好聲好氣，不過呢句真係睇到五迷深表認同……「等咗睇五月天兩年，老實講，我連去廁所睇少一秒都唔想，你喺度求婚，感到你有啲自私！希望你以後做任何事之前，都顧及別人感受啦！」

其實求婚咁開心，開場前後一樣做得啫！毛毛都明有偶像證婚會好開心，但係有無問過台上嘅人想唔想？又有無諗嚇，台下嘅人想唔想睇？

轉載請註明來源：今天頭條