當2000年出世嘅小朋友，今年都已經15歲，你就知道時間真係一去不回頭。80尾90後嘅你好多都仲係職場新鮮人（有啲直情仲享受緊校園生活添啦），每日面對繁瑣嘅工作同人事關係，你應該間中都會掛住中學時期辛苦但嘻嘻哈哈嘅日子。以前冇智慧型電話哩回事，網上嘅論壇同日記網就係你最好嘅精神食糧，仲激發咗你個小宇宙，等你知道原來你都有創意同藝術細胞！

1. Hkflash

一開始係留言畫板，完全唔明點解同學們可以用電腦畫到咁高水準嘅畫。你睇完佢成個畫畫過程之後，識得畫返啲甚具Graffiti味道嘅名已經好叻。慢慢愈嚟愈多人玩，Hkflash仲出埋網上日記同要俾錢先用得嘅相簿。

2. Xanga

放學返屋企可以用成個鐘頭打篇網上日記，連晏晝食咗小食部碗公仔麵都要打埋落去。朋友係你嘅忠實讀者，睇完你篇日記就會留個言十卜十卜，但佢哋都係要靠100問先可以了解你多啲（例如知你有幾多個耳窿）。除咗Xanga，Qooza、Showhappy同Sharemoment等都係當時流行嘅網上日記。

►Xanga 100問大集合

3. AKzone（定係KTzone？小編已經唔係好記得）

要整靚個網上日記，有Banner圖、瀏覽人數計數器、背景midi 是常識吧？Akzone 嘅網上素材包羅萬有，定期都要上去兜個圈，幫自己個網置新裝。AKzone仲有音樂交流區，好多網友會翻唱流行歌甚至擺自己嘅作品上網收集大家意見，《他約我去迪士尼》你有聽過掛？

4. 3男2女、香港討論區、高登

當年高登未算好多人識，你實有去過3男2女哩啲咁流行嘅討論區啦。嗱大家都年少輕狂過，我唔會笑你Post自拍照上網嘅。而家你日日都見到有人Post自拍上FB同IG㗎啦，有咩唔同喎。

5. 整閃字

都係網上日記同討論區（個人簽名檔）必備，通常係歌詞或者係「+;![].我迷失在.＊ 這場﹍×°愛情遊戲°°°×．﹏\」之類嘅人生感悟。過程好簡單，去求檔區嗰度留個言，就會有專人幫你整，細個覺得哩啲設計師好犀利。話時話，佢哋個簽名檔其實等同而家設計師嘅Portfolio喎！

6. Msn/Xanga Icon

整完閃字，梗係唔少得Icon啦！四葉草啊、粉紅色閃閃心心啊嗰啲款一定係大熱，人哋女仔嚟架嘛！但總有女仔走型格路線嘅暗黑系女仔嘅，Bling Bling 喎點用？鎅手啊、黑唇啊、流血啊、Alvin Lavine嗰啲先有Style囉唔該！

7. 認親認戚認家族

即係是但去個討論區「招人」，咁你哋就成為咗一家人。平時開Post佢哋就會去留言，幫你追嚇人氣、灌嚇水咁，但你同啲家族成員其實只靠1張網上卡片連繫。你哋有對方Icq或者Msn，但好少傾，多數都係各自放學後上返去討論區聚1聚，考試嗰排會互相打氣，好溫馨！

8. Msn

Msn最好玩唔係大家嘅傾偈內容，都未必係邀請對方玩踩地雷同旋轉泡泡球，反而係得閒就傳個「震動」震1震朋友，仲有收埋啲你冇得揀唔睇嘅動畫，同埋自訂icon（算唔算係第1代Sticker？）

9. 留言板

通常以班為單位，總會有個同學開個留言板畀大家放學傾嚇偈。平時唔多出聲嘅同學仔都會好踴躍發言，留「顏文字」、留堆亂碼都會笑1餐。

10. 個人Forum

係班內留言版嘅延伸，為咗個個朋友都做到板主，同學仔會搞個以班為單位嘅討論區，1人負責1個板。但你都估到啦，邊有咁多嘢討論啫？所以哩啲Forum喺好短時間就沒落咗嚕～

回憶過去之後，真係忍唔住唱句「青春，真可愛青春」！各位Sizz仲記唔記得啲咩課後活動？未想面對現實住，快啲分享嚇等大家可以喺過去留多幾分鐘先啦！

轉載請註明來源：今天頭條