當朋友開始變老，你會發現，原來朋友，系好難見架！

你：「喂！你嚟唔嚟啊？」

Ａ：「我今晚唔得啊？」

Ｂ：「我都有事。」

Ｃ：「大家都唔得，咁不如下次啦？」

你：「……咁下次啦。」

你唯有打個圓場，之後都系返去忙自己要做嘅嘢。

近呢幾年，舊時嘅朋友越來越難相約埋一齊，聚首一堂。就算系以前一定會約出嚟玩通宵嘅大時大節，大家都開始各有各忙。

朋友由「系要見架」慢慢變成「喺朋友圈見」。最大鑊嘅系，再大個啲，你自己都開始接受現實，約唔成就算啦。「算啦，都唔系好重要啫。」不論系三年朋友，六年老友，十年死黨，到有一日，原來你突然會覺得「算啦，都唔系好重要啫。」

你會情願花時間喺你唔鍾意嘅工作上，你會情願花時間喺應酬新識嘅hi-bye friend上，你會情願花時間喺屋企休息一下。

正正因為佢哋系朋友，你知道佢哋唔會介意，所以就越來越難見。每次攞起手機，想約朋友聚舊，結果唔系呢個唔得就系果個有嘢做，回想起上一次見到一班老友，好似已經系……已經系你仲有朋友嘅時候。

果時嘅你，可以一個電話出嚟陪朋友一晚，可以一聲令下幾十人忽然走咗去踢波，玩到樂而忘返，再晚飯糖水啤酒直落。到底系你真系越來越忙，定系覺得朋友越來越無所謂呢？

「喂！仲出唔出嚟啊？」

所以當仲有朋友唔識死嚟煩你，千祈唔好話忙／唔得閒就算數。因為你有一日會回頭髮現，當你想搵返班朋友出嚟聚舊嘅時候，可能大家都已經生疏曬，真系你有你生活，佢有佢忙碌。

珍惜仲會約聚會嘅朋友，珍惜仲可以傾通宵嘅晚上，珍惜雖然大家都已經唔再年輕，但同你一齊嘅時候仲會好似以前咁嘅老友。

轉載請註明來源：今天頭條