夜閒人靜，攞起手機，下意識咁望住螢幕，睇下仲有邊個喺度講緊嘢，又有邊個會搵自己。

手機冧巴，就系現代人嘅身份，好多時候，我哋已經唔使見面喇，電話都唔使講，無論紅事白事急事無聊事，通通都喺微信搞掂。我並唔系評論科技搞到人幾咁陌生，還掂時代都系咁變嘅喇，溝通嘅方式就好似一個硬幣嘅兩個面，系無好同壞嘅分別嘅。

但你有無發現，有好多你身處嘅群組，你其實一直喺度觀察大家嘅對話，而又未曾參與入去。

雖然你粒聲唔出，但你真系唔系討厭果班人。人同人嘅相遇硬系有好多無奈嘅，你系就系同果班人有啲相處唔嚟，話題又唔同，佢哋笑嘅，你又唔幾明；你想搞下笑，又無人笑。

但你唔退群，因為你唔想表現得咁突出。「XX退出了群聊」會顯得好無情，你唔想做到咁盡。你停留喺度，群組嘅人傾計講爛gag果陣，你會隔住螢幕同佢哋一齊笑。時間耐咗，你變得有啲念舊，又想翻到佢哋中間。

但系，你突然之間出聲，比你退群仲奇怪。所以你靜雞雞匿埋留意大家講啲乜，有乜水抽。有時你覺得自己同佢哋距離近咗，但系喺其他人眼中，可能早就唔記得咗你。

有時，佢哋會約出嚟食飯，因為邊個出咗糧、邊個入咗大公司、邊個中咗彩票，所以要砌果個人一餐。無奈嘅系，喺呢個圈子中，早就無咗你個位，就算你一直同佢哋一齊睇住手機螢幕。

好大機會，無人會再提起你個名。但講真，你仲系希望有人會諗起你，循例問下你會唔會出席，你好開心但唔會表現出嚟，回復佢：「ok」。對於人際關係，有時就系咁樣，故作矜持，偏偏放唔落面，系要人哋主動請你，你先至出現。

或者問心一句，其實你並無信心，大家真系想你出現。

轉載請註明來源：今天頭條