好多人以為小鳥依人嘅女朋友最吸引，但其實識揀，一定係揀粗魯嘅女仔！

我其中一套最鐘意嘅電影係《我的野蠻女友》，細細個睇嗰陣心諗佢對男主角咁差，除咗靚之外都冇乜吸引，但原來當時真係少年太年輕了。

漫長嘅拍拖生活入面，如果女朋友有時好粗魯，其實係對你有好處⋯⋯

拍拖，係要自由自在。一個男朋友有時都想女朋友可以兄弟咁樣一齊麻甩下，吹下水爆下粗，咁，嗰一個粗魯嘅女仔就可以拍拍你膊頭I know that feel bro，而唔係陰聲細氣，為咗保持形象唔同你一齊發洩。

粗魯嘅女仔，通常都率直，唔單止對朋友真，對你都一樣，唔會扭扭擰擰，話去邊就去邊，食乜就食乜，發脾氣都有合理原因。

最緊要，佢夠獨立，不過唔代表唔使你照顧，只係唔會奉旨要你照顧，唔會郁啲就話：「有冇搞錯呀你，小小事你都唔幫我㗎！」

講到呢度，女朋友突然間問我：「其實你係咪想借啲意話我粗魯？話我唔溫柔？話我唔夠其他女仔小鳥依人？」

我話：「妳咁講，就真係錯曬喇！」

原因係，一個粗魯嘅女朋友，喺適當嘅時間就會顯露佢心底入面嘅溫柔。坐車會想挨喺你度，你錫佢佢會怕羞，唔開心嘅時候都會想喊，始終都係一個需要你關心嘅女朋友。

對住你，有時又會收起粗聲粗氣，著得靚啲打扮得好啲，好溫柔咁撟住你。而呢一種溫柔，唔係扮出嚟，好作狀咁嗲聲嗲氣，而係真正咁因為鍾意你，自然想嗲你。

《我的野蠻女友》男女主角最後都喺埋一齊，其中一個原因係，即使要暫時分開，兩個人都有毅力去等。粗魯嘅女朋友，可能比你想像中更加堅強，為咗同你一齊，就算幾辛苦，都會去學習好好相處。

粗魯，只係外在，內心可以對你好好；相反，外表溫柔，內裡可以好野蠻，咁先係最惡搞。

所以唔好再話你女朋友粗魯，其實，你執到寶

轉載請註明來源：今天頭條