記得有一次，小編聽緊電台果陣，有位初中女生打上電台，佢話等佢大個咗想成為一個「搞笑藝人」，原因系佢覺得自己生得唔夠靚女，所以認為如果要從事娛樂呢行，大概佢嘅定位就系「搞笑藝人」喇。
「搞笑」嘅女仔喺大眾嘅觀念上都似乎同「如花」划上等號，就好似果啲劇集角色設定咁，天生麗質嘅女主角隔離總會有個樣衰衰但舉止行為幽默，負責提供笑料嘅女配角，而呢位女配角從來都唔會系男主角嘅果杯茶。
但，小編想講，幽默搞笑嘅女配角比起既溫柔又靚女嘅女主角有時更難搵。
一個女人，識得幽默首先要頭腦要好掂，可以將件事銜接到另一個角度，令聽同講嘅人都get到個笑點。同純搞笑嘅肢體演繹唔同，幽默需要多一啲智慧。而且識幽默嘅女人基本上都無乜包袱，即系佢可以開得起玩笑，胸襟亦都廣闊啲。
我領教過最幽默嘅女仔就曾經將情侶之間嘅嗌霎瞬間化解。有次茶聚後，女性朋友同男友嘅date時間仲未到，於是就拉住我陪佢四周圍行下街。途中朋友嘅男友就打嚟話因為大塞車，可能要遲半個鐘以上。
大部份女仔聽到嘅第一個反應可能會系：「你喺邊塞車啊？」、「仲要塞幾耐啊？」、「你點解唔提早啲出門？」、「你無睇百度地圖咩？」、「你應該一早行另一條路喇！都唔醒水嘅！」一百萬個追問為嘅系希望知道對方何解會遲到？最早可以幾點嚟？等待嘅人會好燥，遲到嘅人又會覺得錯不在己，心情煩躁嘅兩個人自然容易一觸即發。
而我呢位朋友隔住電話向對方講嘅第一句竟系：「今日你銀包有幾錢？」
當時，我諗佢嘅男朋友同我一樣都諗唔明，究竟大塞車遲到同銀包有幾錢系點掛勾嘅？之後，佢就發揮佢獨門嘅幽默感了。
「好彩，我同朋友一齊，但你遲到會令我多出好多時間可以shopping買嘢，感你起碼都要分擔下我一半嘅支出啩。仲有，塞車搞到你見你可愛善良嘅女朋友嘅時間遲咗，不過，千祈唔好急，如果等陣你開快車俾阿sir抄罰單或者揩親其他車，咁荷包就雙倍付出，得不償失喇。哈哈，我等你來埋單啊！」
最後，電話果頭嘅男朋友仲笑住嗌我唔好俾佢女朋友入名店。唔好誤會我朋友只系因為敲詐成功而唔嬲，真系乘機敲詐男友嘅叫報復，佢呢種只系講過笑過就算嘅叫幽默。
小編我衷心佩服我呢位朋友，一個回應，幫自己消咗啖氣，又可以令對方落台階，仲提醒對方小心駕駛。一份幽默包含嘅仲有另一份體貼。
當一個女友識得用幽默去對待事情，佢會令男人嘅世界少咗好多煩惱；而當情侶間用幽默來溝通，睇落去就算最壞嘅事都會增加幾分玩味。無標緻嘅樣系先天嘅，但後天培養嘅幽默女人其實都好吃香，希望果位初中女生大個之後不單只做「搞笑藝人」，亦都做個幽默女友，幽默睇情人，睇世界。
金句王
微信號：jinjuking
轉載請註明來源：今天頭條