《大時代》熱爆、荔園重開，咩都講懷舊集體回憶，今個暑假檔票房班霸《侏羅紀》、靚佬湯湯告魯斯《職業特工隊》、 阿諾舒華辛力加《未來戰士》等統統重磅回歸，追開嘅老餅固然恨睇，未睇過嘅小朋友更加要睇，最重要係，睇完《侏羅紀》，雄性小學雞有望重振雄風，擺脫Elsa！沉寂多時電影業終於有救，一於剝定花生等睇好戲！
暑期電影最強推介
翻叮侏羅紀
《侏羅紀世界》Jurassic World
上映日期： 6月11日
監製：史提芬史匹堡
導演：哥連卓法羅
主演：基斯柏特、拜絲黛麗侯活、伊凡卡漢
講乜：恐龍主題樂園開業八年，生意額係咁跌，高層為挽救生意，硬推基因改造恐龍，結果例牌出事！
必睇指數：5(5最高)
93年首集《侏羅紀公園》，全球收近80億港元票房，至今仍堅守全球票房第16位，儘管二、三集大跌watt，票房依然頂得住，今集採用35mm同65mm兩種格式拍攝，並設有IMAX 3D同4DX版本，畫質更有保證，滿足你對恐龍、史匹堡同主題樂園出事情意結。
《銀河守護隊》上位型男孭飛做馴龍師，拖男帶女脫險。
混種巨無霸
今集終極猛獸兇王龍，由霸王龍、迅猛龍及蛇等動物基因改造混種而成，體形同戰鬥力唔講得笑！距離上集第3集都有14年歷史，以今時今日荷李活技術，視覺效果同驚險度都將更目不暇給。
大堆頭恐龍
話明主題樂園，今集出現嘅恐龍品種比前三集加埋仲多，除咗霸王龍，仲加入食肉牛龍、皺褶龍等新品種，仲唔少得表演項目，恐龍被訓練成表演工具，包括重口味吞大白鯊，亦種下恐龍反抗心理。
經典致敬
上山下海玩到盡，海中霸王滄龍鯨吞大白鯊一幕，就係向監製史匹堡另一經典作《大白鯊》致敬！
演樂園經理的拜絲黛麗侯活，演過《吸血新世紀》係列紅髮殭屍Victoria，今次上位做女主角，基本動作性感小背心曬事業線。
除咗首集飾演吳博士的美籍華裔演員黃榮亮，其餘舊角色班底一律冇得留低，親切感始終爭啲！
特務交鋒
《職業特工隊：叛逆帝國》Mission Impossible：Rogue Nation
上映日期：7月30日
監製：JJ Abrams、湯告魯斯
導演：基斯杜化麥哥利
主演：湯告魯斯
講乜：職業特工隊解散後，竟成為殺手集團殺害對象，一眾舊隊友於是群起反擊！
必睇指數：4.5
《職業特工隊》係列第5部，52歲湯佬繼上集爬杜拜哈利法塔，再次挑戰自己，僅繫上一條安全帶於5,000呎高空的軍機外拍攝。
殺手集團成員個個身懷絕技，同受過嚴格訓練的職業特工隊交手，絕對有睇頭！
為迎合亞洲市場，國內女星張靜初在戲中飾演奸角，同靚佬湯有唔少對手戲。
機器人激戰
《未來戰士：創世智能》Terminator: Genisys
上映日期：7月2日
導演：亞倫泰勒
主演：阿諾舒華辛力加、李秉憲
講乜：2029年，人工智慧 「天網」派出機器人T-1000(李炳憲飾)回到1984年擊殺還是少女的約翰康納生母莎拉，T-800(阿諾舒華辛力加飾)出手營救，卻遇上來自未來的自己及最強殺戮機器T-5000。
必睇指數：4
今集中，阿諾會同未來派嚟的T800──即佢自己對戰，阿諾打阿諾，好打耳！
《未來戰士》係列第5部，阿諾舒華辛力加唔做州長，回歸做番T800，韓星李秉憲則做升級版T1000。
Emilia Clarke飾演Sarah Conner，在電影《未來戰士：創世智能》中擔正。
靚人靚景
《巴黎假期》
上映日期： 7月31日
導演：阮世生
主演：古天樂、郭采潔
講乜：失戀女遇上情傷男，走出失戀陰霾互生情愫。
必睇指數：3.5
暑假檔，中、西片陽剛味濃，想抖抖氣，可以揀愛情片，港產古天樂搭台灣演員郭采潔，勝在組合夠清新，而且全片喺浪漫之都法國巴黎取景，靚人靚衫靚景愛情片，可以暫時放低韓劇支持下本土製作。
導演阮世生近作有《我老婆唔夠秤》同《我老公唔生性》，今次《巴》繼續走輕鬆喜劇路線，戲中，古仔為接近失戀而厭惡男性的郭采潔而扮gay。
古仔帶你遊巴黎
Passy橋
橫跨塞納河的Passy橋，是捕捉巴黎鐵塔靚景最佳地點之一，《潛行兇間》中，裏安納度狄卡比奧同老婆踩單車一幕，都喺呢度取景。
蘇鎮公園
巴黎最大公園，面積足有三十個維多利亞公園咁大，戲內用盡公園內的古堡、教堂、大草地、河澗等地方取景。
聖心堂
又稱白教堂，內有基督聖像，聖心堂的圓頂上更有世界上最大的馬賽克之一，而且可以盡覽巴黎市的全景。
熱血最強
《破風》
上映日期： 8月6日
導演：林超賢
主演：彭於晏、崔始源、竇驍
講乜：熱血單車電影，三位一體隊友，不甘淪為做副手，比賽場上，決一勝負。
必睇指數：4
賣點唔少得一班男演員緊身單車褲look。
穿越義大利阿爾卑斯雪山、騰格裏沙漠、韓國、上海等十個城市取景。阿爾卑斯雪山一站，演員需在高海拔、稀氧環境下踩單車，考驗身體機能。
騰格裏沙漠是中國第四大沙漠，景象奇偉壯觀，拍攝時天氣相當涼，工作人員都穿著羽絨，演員則仍都要穿著單薄的單車服，唯有靠搏命踩單車保暖。
圍揪打餐懵
《殺破狼2》
上映日期：6月18日
導演︰鄭保瑞
主演︰張晉、吳京、Tony Jaa、古天樂(客串)
講乜：泰國監獄內，臥底警察(吳京飾)坐冤獄，獄長(張晉飾)被收買向他落手，獄警(Tony Jaa飾)則誓保他……
必睇指數：3
十年後續集，全新故事，除咗拳拳到肉爛仔交，仲有煽情橋段，講Tony Jaa意外發現吳京骨髓適合捐贈予其患血癌的女兒，由對立變成瞓身保護他。
有劉華咁勤力嘅古天樂，客串演奸角犯罪集團主腦。
同你玩麻甩
《賤熊2》Ted 2
上映日期： 6月25日
導演：薛夫麥克法蘭
主演：賤熊、麥克華堡
講乜：賤熊玩結婚，更想生兒育女，於是搵嚟人類死黨(麥克華堡飾)捐精，又為證明自己係人而打官司，鬧出唔少笑話。
必睇指數：3.5
首集賤熊憑口衰賤格逢女媾全球大收，今集賤熊玩夠修心養性結婚，結果當然係玩著佢老友。
幸運熊太係上集媾掂嘅超市收銀妹女友。
續集方程式之一，唔少得串星撐場，雅曼達施菲飾賤熊代表律師，仲有巴西名模Gisele Bundchen的美式足球員老公Tom Brady，慘成為賤熊「採精」對象！
中年困局
《玩轉4字頭》While We』re young
上映日期：8月1日
導演：諾亞鮑伯
主演：賓史迪拿、娜奧美屈絲
講乜：中年夫婦，意外認識一對年輕夫妻，頓覺回春的同時，發覺對方原來另有企圖。
必睇指數：3
笑匠新作講中年危機，好易中你同我！
爆笑家庭樂
《Vacation 》
上映日期：8月27日
導演：祖拿芬高史頓、尊法蘭西戴利
主演：艾希姆斯、姬絲汀娜愛普基
講乜：一家四口甩轆自駕遊。
必睇指數：2.5
導演係《邊個波士唔抵死？》編劇、男主角艾希姆斯係《醉爆伴郎團》係列傻戇牙醫，嫌賤熊太賤，又想輕輕鬆鬆得啖笑，呢套係必然之選。
青春真可愛
《20》
上映日期：6月18日
導演：李炳憲
主演：金宇彬、薑河那、李俊昊
講乜：雙十年華男生兄弟情。
必睇指數：2.5
《陽光姊妹淘》編劇首度自編自導作品，但重點其實係兩個Oppa《繼承者們》金宇彬同《怪談少女》薑河那。
熱爆迷你兵
《迷你兵團》Minions
上映日期：7月9日
導演：皮爾哥菲
聲演：姍迪娜布洛(英)、楊千嬅(粵)
講乜：以效力大壞蛋為生存目標的迷你兵，四出尋找合格的邪惡主人。
必睇指數：4
《壞蛋獎門人》係列捧紅一班迷你兵，仲巴閉到開拍前傳《迷你兵團》，回到盤古初開年代，追尋迷你兵團身世。
迷你兵睇中世界上首個超級女壞蛋煞天嬌，煞天嬌擁有豪宅同私人飛機，迷你兵進入花花世界，見盡世面。
趕走壞脾氣
《玩轉腦朋友》Inside Out
上映日期：7月23日
導演：彼德托達
講乜：11歲小女孩韋莉因為搬屋而引起體內種種情緒變化。
必睇指數：3
迪士尼X彼思出品，導演既係《怪獸公司》同《沖天救兵》導演，又係《反鬥奇兵》編劇，戲中透過小女孩心路歷程，講5種情緒，包括阿燥、阿憎、阿樂、阿驚同阿愁，啱曬家長同小朋友上番堂情緒智商堂。
來源
ｍｏｒｅ https://www.facebook.com/pages/GAG-ZONE/1422458507983399?ref=hl
全世界最好吃的10大零食！香港排第2!
打去高級西餐廳訂台比人寸 身為毒撚應該點做
《海賊王》目前實力「最強前五」排名！第一名竟然是他...太意外了！
咁至係人生!!! 這些「成人限定」活動, 你一定想體驗!!!
轉載請註明來源：今天頭條