蘭桂坊有夜場開幕，好多明星名人都出席撐場，去到邊都chok到爆嘅謝天華一現身，即刻成為焦點，無論男定女都上前搵佢合照，就算謝天華想去個廁所，都要不斷咁停低同唔同嘅人打招呼應酬一番，不過謝天華非常友善無覺得麻煩來者不拒，期間見謝天華同一個索女特別好傾，佢哋兩個仲傾到面貼面，不過都係無進一步行動各自散水，反以謝天華就同一個男人傾咗無幾句，就火速攞部電話出嚟「炒牌」，掛住應酬酒都唔飲多啖嘅謝天華好快咁就同兩個男友人離開，起初男友人代勞幫手截的士，經過多次拒載之後，謝天華親自出手，轉頭就即刻成功截到的士上車走人，出名果然係有啲著數。
謝天華chok爆登場。
去廁所都畀女捉實傾兩句。
仲傾到面貼面，不過最後都係各有各散。
同男人傾緊偈，女人就喺隔離合照，真係忙到爆。
唔止女多，有好多男士上前同謝天華握手。
反以謝天華就炒咗個男人牌。
堅多女圍。
謝天華同呢位索女特別好傾。
謝天華一出手就截到的士走人。
相關新聞 :
真面目 Laughing Gor謝天華 用25萬食女
藝人鍾意北上搵真銀，但拍劇最短都要留低幾個月，點都唔夠去酒吧登台快手速食易賺。
前週四（ 18日）， 45歲謝天華到廣州一間大型酒吧表演，全程有三個保鑣貼身保護，又有中港七人車接送，短短 45分鐘唱 4首歌，即執走 25萬人仔！其間大批女粉絲依然叫天華做「 Laughing Gor」，反而新劇《女警愛作戰》的角色「藍一一」冇人噏得出，估唔到 Laughing條水可以食足 4年！
自從 3月尾同張兆輝、徐子珊拍完 TVB劇《神槍狙擊 2013》，謝天華暫時未有劇開，可以專心登台搵快錢。前週四（ 18日）晚，謝天華乘七人車到廣州一間大型酒吧登台，一下車已有三名保鑣跟身，雖然有大批粉絲企門口歡迎，但天華係咁意行去門口影一幅相就匆匆入場。
天華出場前，酒吧安排幾個金髮性女跳舞暖場，不過觀眾一心睇天華，對鬼妹反應冷淡。
女粉絲搶住同天華握手，有人舉牌支持偶像，不過「 I Love You」寫咗「 I Love Yuo」，笑死人咩！
開騷前，天華同拎住佢張靚仔海報的索女合照。當晚有紅星睇，入場券要 100蚊人仔。
天華一下車即有大漢幫手開路，確保冇狂迷埋到身。
連環講爛 gag
《女警愛作戰》的口碑收視都唔差，可惜內地觀眾淨係記得「 Laughing Gor」。
有豐富登台經驗、舞蹈員出身又組過跳舞組合「風火海」嘅謝天華，一上到台立即搞氣氛，唱完《潛行狙擊》插曲〈獨行〉後，開始同觀眾吹水，「近年我去過好多地方登台，長沙武漢上海杭州都去過，唔知點解成日都嚟唔到廣州，我仲諗係咪廣州啲朋友唔掛住我呢？」聽到觀眾大叫「掛住」，天華更加得戚，用肉麻腔講：「我今晚撞聾，聽得唔清楚添！」粉絲再擘大喉嚨嗌，天華先收貨。
愈講愈興奮，天華繼續搞爛 gag，「嚟到廣州，即係講廣東話得啦，有冇人聽唔明先？聽唔明嘅話，我都係講番廣東話咋！」
走音照拍手
講幾句已冧到台下女粉絲迷曬，天華之後一口氣唱三隻歌，包括〈聽海〉、〈愛的初體驗〉和〈友情歲月〉。風火海出身的天華可能太耐冇練歌，不時走音同唔夠氣，好在夜場夠嘈唔多覺，加上天華唱到除埋外套咁投入，唱得差粉絲都收貨冇噓爆。
天華 09年做「 Laughing Gor」彈起，早前又同鄭嘉穎拍了內地劇《英雄》，在國內受歡迎程度絕對唔輸畀一班視帝。據知天華現時的登台價由 25萬人仔起跳，視乎時間同地點再調整。今次上廣州一轉唱 45分鐘， 25萬即袋袋平安，好過捱眼瞓拍劇喎！
視帝最高價
登台錢易搵，但唔同級數價錢唔同，三屆視帝如黎耀祥起碼收 30萬人仔先有得傾，相反生完女後愈撈愈霉的楊思琦， 1萬人仔搞掂！
黎耀祥 30萬以往靠黐住朱咪咪先有騷，今時今日貴為三屆視帝，騷價暴升至 30萬 1場。《壹週刊》圖片
蕭正 20萬雖然未係一線小生，但蕭正楠勝在唱得，劇多知名度夠，騷價升至 20萬。
轉載請註明來源：今天頭條