其實好睇你點睇自己，早餐忙慨時候，無乜人叫外賣，我會入水吧幫手。到早餐時段過咗，樓面成堆台未執，我就會搖身一變，變成一個侍應。到午餐時段，全職侍應返齊工，我就負責送外賣。

喺同事眼中，我可能系一個好幫得手慨伙記。但當然啦，喺老闆眼中，我只系一個不值一提慨外賣仔。送外賣，有邊個唔識？每個月準時出糧，已經系老闆對我呢個外賣仔最大慨恩賜。

「阿銀，例牌客、星洲米、凍檸茶、地址你熟嫁啦。」廚房向我打眼色。

「收到。」點解我仲要做呢份工？或多或少都系因為呢個例牌客人。

佢，系一個一樓一慨鳳姐。

將餐具放入膠袋，順手戳埋檸檬，我就急不及待出發去送外賣。每次我都會幫佢戳埋檸檬，因為我每次送外賣上去，佢都「忙緊」，我亦自私地認為，佢對「戳」呢個反覆性動作，一定已經好厭倦。

「送外賣！」我企喺門外大叫。

「嗰五蚊唔洗找。」佢打開一條門縫，俾低兩張皺皺慨廿蚊紙，然後關門。

「多謝…」每次我每會企喺外面一陣，盡情聞嚇關門時飄出黎慨淡淡香水味。

雖然整個過程不足三秒，我知道每個佢慨客人都會比我耐，但呢個就系我同佢每日唯一慨交流。有時佢會探頭出黎同我寒喧幾句，就證明佢無做緊生意。如果好似頭先咁，就表示間房入面有客人。唉，香港人真系連做一樓一都特別有拼博精神，都系一邊工作，一邊食飯。

雖然每次都見唔到佢全相，但男人系一種擅長用幻想去補完慨生物。

今次喺房入面慨系咩客人？有冇用？做左幾耐？返餐廳慨一段小路程，我就系思考住呢一堆問題。

雖然每次補完慨內容都唔同，但每一次，佢喺我心目中，都系無著衫。

其實呢幾年，餐廳幾乎每半年都加價，加嚇兩蚊加嚇又兩蚊，佢俾我慨兩張廿蚊紙同五蚊唔洗找，其實已經系兩年前慨價錢。不過我地餐廳唔同連鎖式快餐店，加價係為咗頂住貴租，至少我地仲有一份人情味。

所以，星洲米加凍檸茶，依然系收佢三十五蚊。

而佢俾慨五蚊雞貼士，我每次都會入落個樽度。我希望可以用呢個裝滿五蚊銀慨樽，去幫襯佢！

可能租金每年飆升，就連佢門口貼個價錢亦都不斷飆升，服務時間又短咗，真系與時並進。

估唔到唔止香港人儲一世錢都追唔到樓價。就連我儲咗成年慨貼士，都趕唔上一樓一慨升幅。

不過更加估唔到慨系，連一樓一都有人情味…

今日我如常地去送外賣，佢接過外賣之後打開門同我Say Hi，似乎咁啱佢無生意。

「喂阿銀，做乜你次次都企喺度一陣先走？」今次系佢第一次打開門同我傾計，我向下瞟一瞟，佢有著衫。果然理想與現實總系有一段距離。

「你、你點知既。」

「門口有裝防盜眼嘛，咁都唔知，證明你無幫襯過啦。」

「無…我見你今年成日加價，所以睇嚇之嘛。」

「哦～如果你想幫襯，我可以收返你舊價慨。」

「呃、呃…唔洗…拜拜。」

口裡說不，身體卻很誠實。舊價？我儲落樽五蚊銀好似夠數喎！返到公司，二話不說我將所有奇難雜症遺傳病都拎曬出黎，同老闆請半日假，點知老闆答我：「挑，請假咪請假囉，唔洗扮病喎，反正你計鍾出糧慨。」

「多謝老闆咁通情達理！」

我換返件衫，拿埋樽五蚊銀就即刻沖返上去佢個單位門前，透順條氣，然後禁鍾！

等開門慨時間，我心入面不斷祈禱，希望佢唔好咁啱有客人幫襯。神啊！雖然我知道向你祈禱俾我去叫一樓一系唔啱，但話曬都系我第一次，你咪當做個好心囉！

「咦？我都無叫外賣。」佢打開門，身上仲著住同一套衫，無客。

「我想幫襯！」我雙手將個樽遞出去。

「哈，入黎先講。」佢嫣然一笑，就拖咗我入去。

「其實，我今日唔方便，所以唔做生意。」頂你個肺，上帝你系咪玩嘢啊！

「對唔住，咁我走先。」我正想掉頭走，然後返去同老闆講辭職，我無面目再送外賣。

「不過，你都可以陪嚇我傾計慨。」

結果，我同佢兩個人訓咗喺張床度傾計，估唔到呢類電影情節會發生喺我身上。

「其實，我做埋今年都打算唔做。」

「點解啊？」

「租金越來越貴，今日接多幾個客都唔夠俾。再加上，我搵唔返以前做一樓一慨感覺。」咩話？！點解佢講到自己做緊藝術家定運動員咁慨？！

「以前，會有熟客上黎幫襯，我地會有傾有講，雖然最主要都係為咗小西。不過，Ｄ客熟咗就好鍚我，有時上黎凈系想同我訴苦，講佢地屋企個老婆點衰點衰。」

「咁而家呢？」

「而家？香港人仲邊有閒錢幫襯丫。上親黎慨大部分都系大陸人，或者走兩水就賺夠慨水貨客。以前成棟樓都系姊妹，大家收咗工就出去食宵夜，幾開心。而家？成棟樓都用黎擺水貨，都唔系住人慨。前排包租公先同我講，有人想用兩倍租黎租我呢個單位放貨。可能我讀得書少啦，我真系唔知香港點解會變成咁。」

估唔到，連做一樓一都有呢Ｄ煩惱。香港點解會變成咁？我諗無一個香港人答得出。

「咁你以後打算點？搵份工？」

「傻仔，入得我呢行，一做就做一世，至多咪搬去第二度，或者搞網上市場囉，與時並進嘛。」

「咁我咪以後都見你唔到？」

「想幫襯咪call我囉。」

最後，我地乜都無做過，只系拎咗佢張卡片，雖然無擺低Ｄ野，起碼都叫拎返Ｄ野走。

一個月後，佢真系搬走咗，叫外賣慨系一個操唔咸唔淡廣東話慨水貨佬，我梗系收返佢正價啦，佢貼士每次都俾廿蚊，不過我無特登儲起佢。

傾咗成晚計，最後佢都無收我錢，樽五蚊銀我一直keep住，不過我一次都未call過佢，亦都唔知佢搬走咗去邊。而且，我上次都無問佢叫咩名，佢喺我心目中，永遠都系一個鍾意食星洲炒米慨一樓一，我覺得咁樣已經好足夠。又或者，我喺佢心入面，都只系一個會幫佢戳檸檬慨外賣仔。

轉載請註明來源：今天頭條