大多數香港車迷對本田新一代Civic Type R，有類似以下幾方面嘅睇法：

轉咗用Turbo，一定冇曬以前高轉「爆Tec」感覺，即係話：唔再係Type R啦！（再加多句：Type R梗係N.A.偈啦！） 「痴線㗎？賣成58萬，點買啊！」 「個樣好醜，好肥，唔掂！」 「冇理由到而家都冇dual clutch自動波囉！趕客囉！」 「310匹頭轆車，死梗㗎！實攬山！」

車迷永遠有佢哋嘅想法同獨特嘅fantasy，如果有得揀，梗係想Honda永遠都keep住副N.A.高轉VTEC偈，但現實係：世界變咗，個個都Turbo，你要繼續用「Type R」呢個牌頭喺呢個segment生存，一定要跟呢個遊戲規則玩，除非本田唔用「Type R」呢個名。

令人欣慰嘅係：Civic Type R轉咗用Turbo引擎，冇一面倒好似其他德國同法國Turbo Hatch咁，度力太蠻太牛，仍然好有本田一貫注重低、中、高三域上落暢滑嘅特色，呢點稍後補充。

新Civic Type R，賣58萬（呢個係2016年中抵港價），有人嗌貴，亦有人嗌抵，尤其是當水貨初抵港時，叫價「7字頭」，好多消費能力高嘅fans，已覺得賺咗。部份人仍然懷念EK9 Type R十幾年前喺香港約26、27萬（水貨價），覺得今代頂盡只會畀40萬，亦忍唔住加多句：「人地Golf R有四驅有DSG都係50萬有找」……我建議大家，呢類說話可以一聽，但唔好太上心，始終今時今日嘅Civic Type R已經係310匹嘅Turbo快車，好難再用以前把尺去量度今日嘅佢，另外，本田唔似福士集團咁大規模，實力咁雄厚，高性能Golf，可以有好多個變身，cost可以同其他集團成員share。再講，而家300匹嘅Turbo車，大約係五十萬左右價位，行貨Civic Type R賣58萬，MenClub認為合理。

話新Civic Type R個樣好醜，我只能話佢唔係有型有款，但又未至於醜，可能而家嘅新車嘅外形，真係要令你有啲睇唔明，甚至覺得古怪，先至會多人講，多人記得。個人意見：我覺得EK9之後嘅Type R，冇一款係靚，咁樣講肯肯定得罪好多巴打，但各抒己見，share你嘅聽聽。

講番實際試駕感覺，未上車之前，見到Civic Type R成「pat」嘢，又闊又大，真係驚佢hip point高，坐上去，好似揸MPV，但坐落去，座椅離地距唔算高，再加埋偏向低矮（以今日嘅高性能Turbo Hatch而言）嘅中控台同擋風玻璃下緣，前方視野好闊，真係有少少似坐番落90年代尾嘅Civic，嗰一刻係幾討好親切。

當然啦，2015，新Civic中控台嘅布局都唔同曬，例如門板同中槽都更貼近大腿兩邊外側，加埋儀錶同軚盤嘅編排好緊密，真係幾有逼力同震撼力，恕我太投入，論氣氛同逼力，Civic Type R贏曬。

Civic Type R喺懸掛設定方面，唔及歐洲對手咁多嘢玩，只有一個「+R」掣，平時唔撳著佢，懸掛唔算彈跳，喺出名彈跳嘅荃灣路，緩震表現不俗，只要揸得柔順啲，Civic Type R仍可被視為五門掀背家庭車。撳咗之後，油門反應敏感咗，扭軚力度重咗、懸掛硬咗好多，喺屯門公路某幾個早前完成重鋪嘅彎位，咁嘅setting真係好正，揸落好似吸住個彎，但車頭仍然好活，絕無呆板，後懸即使配普通過普通嘅扭力桿布局，竟然都有極佳嘅貼服程度，一流！強烈推介「交通部」下次換車，考慮買番十部八部Civic Type R，好有理由相信，即使「轟」住過「金利來彎」都唔會攬牆。

由深井浪翠園上斜至豪景花園附近一段嘅高低起伏彎位，Civic Type R完全唔似一部咁高身嘅五門掀背車，喺「+R」模式啟動狀態之下，簡直變咗另一部車，一部好有落場味道嘅街車。

不過，用「+R」模式跑鋪裝質素普普通通嘅山路，真係有少少「攞苦嚟辛」，個人嚟講，覺得咁嘅路況下用「+R」模式，太過彈跳，雖然賺咗敏感嘅油門反應同更線性兼狼死嘅Turn-in反應，但懸掛就有啲「手忙腳亂」，除非你已好熟悉特定路段嘅路況，甚至自封「佗地」，否則，好易失手揩花條軨。

好在，Civic Type R嘅制動反應好好，踏板行程比例清晰（一半之後及接近最後的1/3尤其好），快車、慢車嘅重、輕制動，踏感都好實在，fade唔算嚟得早，係可以喺激走下信賴嘅配搭，真心呼籲：揸番一排先改啦衰鬼。

一講Turbo引擎，好多本田迷都扁曬咀，覺得：冇喇！冇喇！轉咗Turbo，成副引擎肯定冇曬性格，得鋪力。聲呢，呢樣真係冇佢符，耳仔歎慣Hoooooonnnnndaaaaaaaa嘅無敵歌喉，變咗做Turbo嘅buuuuuuuuuuuuuuuu、ummmmmmmmmmmmmm，好唔慣，而且好悶。

但稍為認真去feel下，呢副編號K20C嘅新機器，仲係好有「本田味」，例如喺低、中、高三個區域嘅反應好生猛，而且暢滑，尤其係5000rpm至7000rpm，MenClub敢寫包單，你call齊friend，拎曬巿面上嘅高性能Turbo hatch出嚟「踩一轉」，K20C必定係最silky、最穩定同最少震盪。

本來，我唔想講太多對K20C嘅個人感覺，但呢副引擎實在feeling good，值得畀大家誤解我為本田造勢，K20C約由3000rpm至5000rpm呢一段，唔多似Turbo引擎，相反，似一副大容積嘅本田自然吸氣引擎，好特別，真係估佢唔到。

不過，K20C嘅峰值扭力範圍由2500rpm至4500rpm，從1400rpm至1800rpm左右，Turbo Lag算明顯，但又未致令你掃興或難控，總之，用家有必要掌握呢一段嘅timing。

波箱方面，6前速H-Pattern好易入，但檔閘之間嘅行程略嫌太過易推，冇咗高性能棍波車fans期望嗰種應有嘅阻力同緊緻，就連後波都唔使「先撳低一個layer」，就咁撥到最右向下拉就掂，咁係好定唔好？留番畀你評價。

Civic Type R嘅後座算闊落，後座地台亦有近代Civic嘅「低地台」優點，而後座坐墊嘅中央部份（即中間乘客之座位），特別軟熟厚挺，即使成班friend滿座「早車」或「夜車」（總有一兩個未買車或未考牌，硬係要跟住嚟），都無屈就之感，咁嘅設定，唔算得上係VIP級招待，但睇得出日本車嘅體貼周到。

放平椅背，車廂同靠近尾部嘅行李艙，形成一個低而平闊嘅行李艙，就似「放大版」嘅Jazz，簡直係本田嘅show time。

強要搵幾個Civic Type R嘅缺點嚟安慰部份車迷，一定有，例如：

淨得揀波，冇自動波，唔掂喎，我老婆實唔批我買 好貴啊，35萬ok？本田fans trade-in高收些少啦！自己安排上會ok？ 點解冇四門房車版啊？ 點解唔喺日本造啊？ 點解唔用四驅啊？

仲有，好多好多嘅缺點，好在，本田出名硬頸，一於話之你。

Honda Civic Type R規格

售價：$588,800

代理：Reliance Motors www.honda.com.hk

車型：五門五座

體積：（長）4390mm x （闊 ）1880mm x （高）1460mm

軸距：2600mm

引擎形式：1995c.c. 直列4汽缸，缸內直噴，前置引擎

馬力：310匹/6500rpm

扭力：40.8kgm/2500-4500rpm

波箱：6前速手動，前輪驅動

懸掛：（前）麥花臣支柱；（後）扭力桿

車重：1380kg

0至100km/h加速：5.7秒

極速（km/h）：270km/h

耗油：13.0km/L

輪胎：Continental Sport Contact 6 235/35 R19

文章來源: https://www.twgreatdaily.com/cat93/node735361

轉載請註明來源：今天頭條