中谷明彥，差唔多個個睇《Best Motoring》大嘅車迷都知佢係邊個。

近年活躍於賽車教學同汽車評論嘅佢，上月去過德國試駕本田新Civic Type-R。

去得德國試車，梗要喺Autobahn無限速路段試一試極速，有時間嘅，更要去埋Nurburgring。你可能話，新Civic Type-R已到咗香港，亦有本地車手試過車，comment過，咁仲有乜好講。哦！車評嘅嘢，睇多少少無壞嘅，多個比較嘛。

中谷今次喺Autobahn嘅無限速路段，將車速推至267km/h，距離廠方公布嘅極速270km/h仲差少少，中谷話，因為當日試車幾多車，而且喺接近267km/h時，已即將重返有限速路段，所以焗住要「收韁」。據悉，中谷已經去完Nurburgring飛Civic Type-R，好快有片上載到YouTube咁話。

睇段片同佢近期喺日本汽車雜誌Cartop發表嘅試車報告，佢話好欣賞轉用Turbo後嘅Civic，成部車喺懸掛嘅改良大咗好多（包括喺R Mode狀態），再冇好似以前FD2咁彈跳。（編按：新Civic Type-R嘅懸掛由ZF Sachs提供）。

睇佢120km/h左右，六波行車，車廂算靜，直至220km/h，車廂仍然唔算嘈。由220至267km/h呢一段，中谷揸得小心好多。雖然係咁，佢話新Civic Type-R喺高速直進時，車頭好穩定，佢認為要歸功於車身氣流設計，由230km/h上到267km/h嗰段，佢話揸得唔使費神，堂軚已好穩定。

中谷話，想部車喺高速時更穩定安全，要跟足廠方指定嘅胎輪氣壓。例如你用車時嘅最高車速不會多於200km/h，咁頭、尾車胎各打2.1 bar（約30.4psi）胎氣已夠。如果經常「快揸」，成日超過220km/h，頭、尾車胎就要打夠3.0 bar（約43.5psi）及2.8 bar（約40.6psi）。

轉載請註明來源：今天頭條