Yamaha（山葉）都有造車嘅咩？有，但所謂嘅「造」，唔係好似豐田日產本田萬事得咁，打住個大招牌有自己陳列室賣車。

Yamaha嘅「造」車，主要係前期計劃、設計、測試，另有製作汽車引擎，豐田家傳戶曉嘅4A-GE、3S-GE（包括Altezza採用嘅3S-GE BEAMS 2公升直四機器），仲有凌志超跑LFA嘅超靚聲4.8公升V10自然吸氣引擎（編號1LR-GUE），都係Yamaha出品。另外，Volvo XC90及Ford Taurus亦曾分別使用由Yamaha設計嘅V8及V6引擎，咁厚咁巴閉嘅車壇履歷，夠曬睇頭喇啩！

3S-GE型BEAMS引擎

一向同豐田有密切合作關係嘅Yamaha，前年邀請到設計過86概念車（即FT-86）嘅長屋明浩（Akihiro Dezi Nagaya）加盟，出任Yamaha嘅設計部部長至今。長屋明浩1983年加入豐田，從1983年至1991年，先後設計第一代凌志LS 400/Celsior、Mark II系列，1991年被派到豐田北美設計室（CALTY），九十年代中重返日本，負責過LS/Celsior、Aristo、Brevis、仲有第二代Prius同好多好多嘅豐田車系。

所以，當Yamaha上星期一宣布會喺月尾東京車展，發表一部酷似中置引擎雙座嘅概念跑車，外界都推測會唔會係「為豐田代筆」嘅新作？仲有，Yamaha咁多年冇喺東京車展擺過四輪新作出嚟，段估今次唔係「失驚無神來友痕」掛？

長屋明浩（圖片來自長屋明浩facebook）

呢部Yamaha四輪概念車，暫時只得一張相，唔似係開篷車，車身頭中尾比例有少少似MR2。

圖片來自Yamaha

MR2/MRS車系停產接近8年，好多「豐田粉」仲好掛住佢

再諗埋長屋呢位重量級豐田舊人，成件事好似講到MR2就嚟會番嚟咁。係諗得太多，抑或已露端倪？仲有一星期就知。

Yamaha對上一部喺東京車展發表嘅跑車，已經係1991年公布嘅OX99-11概念車。

V12引擎，6速手波，中置引擎，中置駕駛，超夢幻嘅配搭。

轉載請註明來源：今天頭條