聽過唔少玩車日子耐嘅巴打講，如果香港可以合法更換非原裝引擎，即係任你配搭任何引擎落部車，咁就好玩好多喇…… 

唔講咁遠吖，如果香港塞少啲車，「快相機」數目回到15年前水平，揸車已經好玩好多啦，哈哈哈！

豐田日本汽車生活網站gazoo.com最近訪問咗一位喺阿聯生活嘅車迷，佢係43歲嘅建築師Harold Britos，過去十多年都熱衷於改裝日本汽車，佢亦好鍾意本田（Honda），不過佢玩Honda嘅「年資」唔算長，喺2013年先買入首部Honda，係S2000。 

Harold覺得Honda好多嘢改，性能又好，近期佢仲買多咗三部Honda。包括外型激改嘅S2000、一部「落場」嘅EG同一部EK9。其中EG同EK9都升級改配來自第二代Integra Type R嘅K20A系列2公升自然吸氣引擎，目的只有一個，就係要釋放EG同EK9嘅潛能。

Harold話自己最like部EK9，呢部「9仔」原本由朋友擁有，佢都係改裝車fans，可惜已不在人世。Harold話每次揸住呢部車都諗起呢位朋友。 

咁Gazoo.com記者問Harold點解咁like Honda同舊車，佢話因為嗰期嘅Honda外形好吸引，改裝巿場又有大量各式各量嘅零件。佢認為EK9係前驅（FF）車史上操控表現最佳，落場表現好相當稱心。

講講Harold部車改咗乜：懸掛、前制動同排氣喉都來自Spoon。外形方面，輪圈、側鏡、尾擾流翼。車廂裝咗Bride嘅桶型座椅同一啲補強車裝配件。凸輪軸、活瓣彈簧同活瓣彈簧座，以至整副K20A都來自美國Brian Crowwer。ECU經過重新編寫，係來自Hondata嘅KPro ECU。

據Harold講，好多零件買返嚟之後都要自行改裝，少量更要由自己製造。Harold冇私人嘅車房，所有工序都喺住所樓下嘅地下停車場進行，佢話「抬偈」主力靠自己，好在有朋友幫佢手買個「Engine積」兼幫嚇力，所以呢，玩車最緊要有班好朋友。

文章來源: https://www.twgreatdaily.com/cat93/node1641437

轉載請註明來源：今天頭條