Type RA喺Subaru Impreza WRX/WRX STI嘅歷史，有相當重要嘅地方，因為佢就係強調擁有接近落場表現同配備嘅級別，夠輕，夠辣，設備仲好齋添。

雖然隔音認真麻麻，部份時期嘅Type RA更不設冷氣系統（標準配備而言，但唔少買家都會照揀呢項option），但大家就係鍾意佢夠「戰鬥格」。

「RA」級別早喺1989年嘅Legacy RS-RA出現，之後喺Impreza年代為人熟悉，千禧年初「大眼仔」Impreza登場

，廠方重整車系命名方法，新增spec C級別，將Type RA歸入旗下，話咁快，已幾係十六、十七年前嘅事喇。

Subaru北美分部宣布，將於6月8日（當地時間），發表稱為WRX STI Type RA NBR Special嘅特別版。

呢部車將會喺今年夏季，肩負挑戰德國紐布靈北圈四門房車嘅最快圈速時間紀錄。

咁請問WRX STI Type RA NBR Special（好長，一口氣講曬要啲時間練習）係咩specs？

未知，廠方只公布咗一張相，似乎係碳纖維車頂，片中仲有隻超大型「GT尾翼」，喂！有冇生產版本呀？

出右軚版吖，你估部車有咁大隻原裝翼揸上「大山」，會唔會俾人話你非法改裝？

轉載請註明來源：今天頭條