本田（Honda）今代Civic四門房車同五門掀背車，將於夏季重返日本巿場。1.5公升Turbo有成180匹（視乎唔同巿場），6速棍同CVT俱備，牌費靚、車大加埋Civic襟用好揸嘅信心保證，就算真係冇行貨，已經有平衡進口話要入些少嚟香港，唔憂去唔到貨咁話。

新Civic重返日本，本田喺一月尾起喺東京青山區總部，搞咗個「Civic Racing History ~~FF最速房 車賽車之系譜」展覽。

一見到啲無限MOTUL、出光MOTION、JACCS同Castrol拉花嘅Civic賽車，唔少日本Honda迷都發曬癲，儘管呢幾部經典戰馬都出過show九十幾次。

唔怕你嫌我哋口水多過浪花，同你數數呢幾部車嘅威水史。

七十年代至八十年代初，日本富士賽車場有所謂Grand Champion Race（又稱富士GC），鬥嘅都係俗稱「屐板」嘅原型賽車，

呢個賽事有一項Supporting Race，鬥嘅唔係咩方程式或超高性能賽車，而係稱為Minor Touring嘅小型房車賽車。

當時所謂嘅小型房車，容積多屬1.3公升，包括早年嘅日產（Nissan）Sunny（B110型）、豐田Starlet Coupe（KP47型）同埋本田元祖Civic（SB1型）。

當年本田社內有一班人以「Yamato」名義，自1978年參戰，先後喺1980年及1983年奪得組別及總冠軍，呢部SB1淨重只有約600kg，配1.3公升（1298c.c.）直4單頂凸輪軸（OHC）8活瓣引擎，燃油噴注系統，最大馬力150匹/7800rpm。

當時嘅Minor Touring賽例都幾過癮，例如參賽車輛必須加裝一張前座乘客席座椅，呢部SB1跟足規矩，但只係裝咗張Kart仔櫈，醒目！

1985年，全日本房車錦標賽（JTC）正式轉用FIA嘅A組（Group A）賽例，以引擎容積區分有三組。

呢部1987年嘅Mugen Motul Civic同豐田（Toyota）Corolla Levin（AE86型）都屬於Division 3。

佢建基於1984年追加嘅三門版Civic Si（E-AT型），香港車迷慣稱「大電視」，由無限（Mugen）操刀整個賽車開發計劃。

配ZC系列1.6公升直四雙頂凸輪軸（DOHC）引擎，呢款機器亦係本田自S800喺七零年代初停產後，首款DOHC巿販型四輪汽車引擎。容積為1595c.c.，16活瓣布局，最大馬力不少於225匹，峰值扭力不少於20kgm。

日本首位一級方程式車手中嶋悟都曾經揸過呢款Civic出戰（嗰個年代F1車手兼嚇揸房車賽係好平常），結果奪得組別全年總冠軍。

1986年，豐田賽車勢盛，除咗Corolla Levin（AE86型），仲有Corolla FX（AE82型），「兩兄弟」拍住上，奪得年度組別總冠軍。

1987年，由中子修、岡田秀樹喺全年JTC六個回合全勝，為本田贏得全年製造商及車手總冠軍。同年，第四代Civic（EF型）街車推出，E-AT型Civic賽車功成身退。

1988年，本田以EF型Civic出戰JTC，當中又分為兩期，分別為早期（88年2月至89年賽季）嘅EF3型及後期（90年及92年初賽季）嘅EF9。

EF3落場版仍然配ZC系列1.6公升直四DOHC引擎，最大馬力195匹。

1990年賽季，本田轉用EF9，EF9賽車嘅車身建基於1989年9月facelift嘅第四代Civic三門版，車身有「SiR」字章。

呢款賽車配編號B16A嘅1.6公升直四VTEC 16活瓣引擎，最大馬力205匹（不少於）/7800rpm，峰值扭力18.5kgm/7500rpm。

EF9賽車同街車相同，都係配四輪獨立雙搖臂懸掛，5前速手動波箱，車重800kg。

1991年9月，第五代Civic（EG型）街車面世，本田喺1992年JTC第四回合以EG6型Civic賽車上陣 。

今次展出嘅屬1993年賽季嘅EG6，都係配B16A型1.6公升直四VTEC引擎，最大馬力230匹（不少於）8500rpm，峰值扭力19.5kgm/8000rpm，

五前速手動波箱，車重810kg。

嗰一年有兩部EG6參賽，分別為廠隊嘅Mugen Civic，由中子修同岡田秀樹駕駛，另一部係JACC車花，

由服部尚貴同金石勝智駕駛，兩部車全年鬥得難分難解，直至喺富士賽車場嘅壓軸回合先能分出勝負，由服部同金石二人捧走年度組別冠軍。

隨住1993年JTC賽季結束，日本嘅A組賽車年代告一段落，正式踏入Class-II 2公升自然吸氣引擎賽例年代。早喺1993年賽季，已經有車隊以EG9四門Civic房車（即Civic Ferio SiR）出戰JTC，基於當時賽例，只配1.6公升引擎。

1994年，正式有2公升引擎嘅EG9 Civic出戰JTCC（全日本房車錦標賽），包括由中子修駕駛嘅Castrol拉花嘅無限Civic。

不過，EG9喺Class-II年代嘅表現認 真麻麻，1994年全年排11，翌年嘅表現更差，全年排13。

本田痛定思定，決定放棄Civic，轉用Accord上陣，翌年即奪全年總亞軍，1997年取得全年總冠軍。

本田

轉載請註明來源：今天頭條