你平時用開咩瀏覽器上網架？Google Chrome？Firefox？Safari？定係打不死的IE？其實呢4種瀏覽器都各有特色，如果佢哋係人嘅話，我估佢哋有以下性格：
IE （Internet Explorer）：慢吞吞、墨守成規老Seafood
自1995年起，IE被內建於所有Windows作業系統作為預設瀏覽器，自此無人不曉，獨步天下。想當初，小編都係IE嘅使用者之一。起初IE都幾好用架，之但係當啲網頁設計得越嚟越好同複雜，IE竟然開始同我玩掛網，圖又載入唔到，load一個網load一世。用IE Download嘢簡直係訓練人類耐性嘅極限，小編試過想下載3、400MB嘢啫，佢同我講估計下載剩餘時間係2日！係2日呀！最抵死莫過於下載到99%，佢竟然同我唔！再！郁！IE真係慢到我火都嚟，如果IE係一個人，同佢合作我應該會想斬死佢，應該1日可以做到嘅嘢，慢到死嘅佢一星期都未畀到我！
除咗慢，墨守成規應該就係IE，呢個垃圾IE（對唔住，小編真係好火）係唔支援開放標準，只支援少數CSS、HTML同DOM特性，簡單啲嚟講，即係某啲網有啲部分會睇唔到，有啲字同圖又睇唔到咁。小編仲好記得以前好鍾意玩啲網頁小遊戲，然後用IE佢成日唔知點解睇唔到flash囉好嗎。而且未有防毒概念之前，用IE成日中毒，成日無啦啦彈啲廣告出嚟又唔幫我Block。IE成日改版本，但係改得咁密又如何，根本問題無解決過，其實咪一樣咁差⋯⋯ 終於微軟都頂唔順，2015年發布新瀏覽器Microsoft Edge，IE再唔係預設瀏覽器，byebye啦曾經風光過嘅慢吞吞食雲吞嘅IE～
Firefox：有創意，鍾意自由
到底小編點解會發現IE好廢？就係因為自從2004年Mozilla推出Firefox，令小編明白到天外有天，原來係有更好嘅瀏覽器架。Firefox最創新就係肯開放原始碼，所以宜家嘅Firefox其實係由世界各地唔同嘅人共同整出嚟。所以Firefox最正就係佢嘅自訂性，因為用家可以透過附加元件和布景主題自訂Firefox嘅功能同外觀，截至2015年1月，Mozilla維護嘅附加元件網站中，已經有18,000種附加元件可供下載，你想點變就點變。雖然起初整小編都覺得有啲麻煩，但係整嚇整嚇就搞到好似自己個blog咁，完全fit哂自己嘅需要。Firefox變得唔似其他一式一樣嘅瀏覽器，呢個係我專屬嘅Firefox，好似好型咁 ～搞到有時小編用其他瀏覽器都有啲唔慣，所以Firefox一定係有創意又有自由嘅性格啦～
功能上Firefox其實幾穩定，又支援好多網絡標準（例如HTML、XML、CSS、ECMAScript（JavaScript）、PNG圖檔等）。最緊要係佢唔玩壟斷，喺Windows、OS X、Linux同Android都用到，而大家都應該知Google同Apple紀錄哂你啲資料架啦，Firefox就加咗個「在隱私瀏覽視窗中使用追蹤保護功能」，以免個人資料被網站追蹤或紀錄，廢事自己成為Big Data一部分。
不過其實小編私心鍾意Firefox係因為2004年一出嗰陣，就已經支援繁體中文，難得當時竟然會重視當地需要，有繁體有繁體有繁體（重要的事情說三遍），支持繁體嘅小編忍唔住高興了一嚇～～
Safari：過度自大，無團隊精神
自從小編用過Mac機之後，開始接觸Safari呢個瀏覽器。Safari由Apple開發，自2003年起成為OS X嘅預設瀏覽器，2007年亦推出Windows版本，支援Windows XP、Windows Vista同Windows 7。Safari設計一如Apple產品以簡約為主，而且用Apple產品時使用Safari的確速度係快嘅，所以唔少Apple用家都會用Safari。但呢個就係問題啦，Safari就係專為Apple產品而設計嘅瀏覽器（特別係Mac機），只支援IOS系統， 但係設計網頁嘅人緊係以大眾為主，搞到呢啲網用Safari上會有Bug，有啲插件唔支援，加上有好多網以IE或者Firefox為核心瀏覽器設計，Safari係上唔到架，甚至會load得慢，而且對中文支援都係麻麻，嗚⋯⋯Safari真係好唔合群，畀啲團體精神好唔好？配合一嚇等用家用得方便啲，唔洗又特登開Firefox或者Chrome先上到同Safari唔夾嘅網咁煩。
同埋講真，用開Windows真係唔慣Safari，因為佢同一般瀏覽器設計真係好唔同，小編有啲懶，唔想再習慣新嘢。其實Safari喺Windows上面用無咁穩定，2012年仲停止開發Windows版本嘅Safari，只有喺Mac機用Safari會穩定啲同無咁食電。都話咗Safari（實際係Apple）好自大架啦，Safari同步內容係透過iCloud，但iCloud只會connect蘋果嘅產品。咁即係點？即係如果你手機用Android，好遺憾地你係同步唔到Safari嘅資料。 Apple可唔可以唔好成日玩綁定？Mac好多嘢都唔兼容唔畀下載，下載到又係用唔到⋯⋯
Chrome：有衝勁 無耐性
2008年推出嘅Chrome，以快、簡單、有效率為原則，所以瀏覽網站嘅速度的確幾快嚇，特別睇YouTube嗰陣好流暢。不過你知唔知點解？因為Chrome既然係Google發行嘅，YouTube又係Google嘅，所Chrome特登整咗個專門睇 YouTube 嘅新引擎，解決 4K 影片流暢度問題，即係又係霸權⋯⋯
雖然Chrome快就快，但係食電都食得好嚴重，呢啲應該就係有衝勁無耐性，三分鐘熱度性格？國外網站 BatteryBox 曾經對Chrome、Firefox同 Safari 作出電池續航力研究，用同系統同一部 Mac機、同一樣系統，分別開用三個瀏覽器就開email、音樂串流媒體、娛樂、新聞網、YouTube、社交網絡等，最後發現平均嚟講，Chrome只可以支持5小時8分鐘、Firefox可以撐5小時28分鐘、Safari撐到6小時21分鐘。而微軟都做咗差唔多嘅實驗，搵咗 Chrome、Firefox、Opera 同 Microsoft Edge比較，發現Chrome約4小時20分鐘就玩完，其他都超過5小時。而平均耗電量Chrome係達到719.72 mW，遠超Firefox嘅493.5 mW同Microsoft Edge嘅465.24 mW。
咁當然你都可以話呢兩個實驗可能都有偏頗，但Chrome好食電係眾所周知嘅事實，成日部電腦用一陣Chrome就勁熱，Android機又係咁，全因Chrome用太多 CPU 同RAM 啦。Chrome快就係快，但係如果要拎部機出去做嘢，你同我眨嚇眼就無哂電，我真係唔知點算⋯⋯
轉載請註明來源：今天頭條
