男女朋友拍拖行街果陣，男人見無聊玩下手機啫，但系條女一見到就唔開心，話你心不在焉，仲發埋爛渣就弊喇。
相信唔少男仔都有咁嘅經歷。有研究發現，原來智慧型手機會破壞情侶間嘅感情，仲有機會引起高度抑鬱！大家拍拖時如果想玩手機嘅話，真系要三思而後行。
智慧型手機已經成為咗生活好重要嘅部分，「低頭族」行街搭車隨處可見。近年仲出現咗一個詞彙叫「phubbing」，系「phone」同「snubbing」嘅混合體。意思系因為用智慧型手機而分心，忽略咗身邊嘅人。
美國貝勒大學翰卡默商業學院做咗兩個研究，探索phubbing對情侶關係嘅影響。研究人員總共訪問咗453名美國人。
第一個研究訪問咗308個參加者。研究人員根據參加者嘅意見，確立咗9種被認為系最常犯嘅冷落自己伴侶嘅行為。
研究人員研發咗9條問題，測試一個人會唔會因手機而冷落伴侶︰
1、當我同其他人一齊食嘢時，我會將手機攞出嚟，睇下有無料到。
2、當我同其他人一齊嘅時候，我會成日睇我部手機。
3、當我同其他人一齊嘅時候，我都會一路攞住手機。
4、如果我手機響，就算我同緊其他人講嘢，我都會即刻睇手機。
5、當我同其他人講緊嘢嘅時候，我被人發現我瞄手機。
6、如果我同朋友出街覺得有啲悶，我會諗都唔諗就睇手機。
7、就算同朋友傾緊計我都一樣玩手機。
8、我同男/女朋友約會嘅時候都會玩手機。
9、如果喺講緊嘢果陣出現咗少少冷場，我會攞出手機睇下。
如果你有6條或以上答「系」嘅話，咁就表示你有嚴重嘅phubbing問題。3-5條答「系」，就表示你有呢個傾向。
喺第二個研究中，研究人員利用以上問題測試145個正在拍拖嘅人，結果顯示︰
46.3%受訪者認為伴侶玩手機而冷落咗佢哋。
22.6%嘅人認為phubbing會搞到佢哋嗌交。
36.6%嘅人有時會覺得抑鬱。
只有32%嘅受訪者非常滿足於依家嘅戀愛關係。
研究人員指出，如果伴侶喺相處嘅時候被手機騷擾得越多，佢哋嘅滿足感就越低，而且仲可能會引發抑鬱。所以建議情侶要小心唔好玩咁多手機，令伴侶憂慮。
所以話，既然有咗男/女朋友，就多啲時間去陪下佢喇！玩乜Q手機呀！
不過，好似小編呢啲單身汪，又唔同講法啦，我鍾意企喺度玩又得，坐喺度玩又得，瞓喺度玩都得～哎～
金句王
微信號：jinjuking
轉載請註明來源：今天頭條