[隱藏]

原本今日天朗氣清，諗住都係我自己一個踩下單車，

周圍聽下麥當勞d mk 廢up，街市d師奶又係度講d」食送」貴左幾多，

公園d阿公阿婆又係到講佢地幾慘，罵9個政府無良心，生果金少到食飯都唔夠，

又冇全民退休保障，或者都係一件賞心樂事。

結果，落住d咁既凍雨底下，令我完全唔想出去。

不過算啦，都係落街買個叉雞飯食，食完打下機上下咸網又一日。

今日真係咩動力都冇哂，連目及女既動力都冇埋。

天氣真係好影響心情。

可能真係越無期望，就越有驚喜。

係我行去買叉雞飯既途中，見到一對情侶。

係濛濛細雨，打著瓦遮頭，瀝瀝、潺潺咁既聲音下，

一男一女就企起瓦遮頭下面，好似講緊d野咁。

「你好好咩!!!!」一把女聲，突然發出黎。

真係方圓三百里x三日裡既人都聽到。

果下真係用四個字形容，震耳欲聾。

特別係我當時企起佢兩個唔夠十步既距離到，

真係差d比呢個獅吼功震爆耳膜，

甚至有內傷，連呼吸都有d困難咁誇張。

好彩，不幸中既大幸，當時附近

只有我一個。應該冇震傷其他既途人。

死都係死我一個姐。

而我呢個熱於幫人解決問題既人，

聽佢呢四個字」你好好咩」睇黎似係掀開大戰序幕既

四個字。我呢個謀略家，有必要盡可能阻止大戰既發生。

所以我決定，企起一旁咁聽下佢地既對話。

或者叫辯論更加合適，因為唔似係傾計咁簡單。

首先，個女仔先黎妙語連珠。

「我同你拍左拖三年，我既初戀都係比左你。

係初頭我真係覺得你好好，好溫柔細心，外型夠好又夠高，

所以我地係識左幾個月之後咁就起埋一齊。

個段熱戀期真係我人生中算係最開心既時間黎。

無論係情人節、中秋節、聖誕節，

甚至只係我一句要你出黎，你都會出黎既時候，

我覺得果段回憶係最開心既回憶黎。

特別我記得有一次，因為你唔聽幾次電話之後，

約左你出黎，我亂發脾氣，打左你一巴。

你當時都冇發我嬲，仲好溫柔咁講

「唔緊要，發洩哂出黎，我會做你最好既沙包。」

仲攬住我安慰我。

我果陣時真係諗，可以同你一生一世就好啦。

而家諗番起，你好似變左咁。

我覺得我地之間出現左問題，

你好似好多唔開心既野咁，好多煩惱。

我地之間少左好多之前會做既野，

你少左錫我，你少左好多溫柔既地方，

你少左主動搵我，我地少左好多一齊出黎食飯行街睇戲。

我覺得我地之間冇以前咁開心。

我覺得你真係變左唔少，亦都冇以前咁陽光，咁開心。

我而家只想問你幾個問題，希望你誠實、詳細咁答我。

一，點解你變左咁多?或者有d野我唔知，

希望你解答我。

二，你係咪有第二個?如果係，我諗分手係唯一辦法。

三，你愛唔愛我?好簡單，愛，抑或唔愛。

四，你屋企係咪有事?因為你真係好似好唔開心。我希望可以幫到你。

就係咁多，希望你答到我，解到我既疑惑。」

聽到呢到，我只係諗，

呢個女仔能言善辯，邏輯道理都好清晰。

或者呢個男仔思維要好好，先可以解答到佢既問題。

我留意到，呢個男仔係呢三至五分鐘左右既時間，

都好留意咁聽住個女仔講。

當然，我都係。

之後，個男仔好快就作出回應。

「第一，我屋企絕對冇事。我唔開心，

只係因為壓力太大。希望你唔好咁擔心。

我屋企人好好，個個都好健康好正常，你唔洗太緊張。

第二，我好愛你，係絕絕對對咁愛你。

我真係自己一個既時候，好多時都淨係諗住你一個。

諗你做緊乜，係咪笑緊，幾時可以見到你…...

每樣野都諗到同你有關。

我覺得，可以遇到你，係上天比我既福氣。

第三，我冇第二個。

我可以向天發誓。因為我真係只愛你一個。

如果我有第二個，真係現家即刻打雷就打死我啦。

(我好黑心咁諗，快d打死佢啦)

第四，變呢個問題。或者我都唔識答。

我只係覺得，我或者都只係一個人，

我都有壓力，我都有解決唔到既問題，

我都有好多唔想面對既野去面對。

我係到只想講比你聽，你唔需要過份擔心我，

想幫我解決任何問題。

因為我係一個男人，男人就係要有承擔，有責任。

如果下下都要你幫我解決問題，下下都要你擔心我，

我不如唔好做男人。

而且，我真係都有諗過，可以同你一世一生。

因為我好愛你。

但當一諗起生活既問題，我就覺得，

我未必係咁有才華咁有能力既人黎，

我將來畢業之後，可能都未必搵好多，

講緊係一萬蚊至二萬蚊左右，仲要還大學債，

我覺得未必可以比到最好既生活你。

因為特別係香港，

樓，幾百萬至幾千萬都有，

生小朋友，四百萬一個，

結婚，酒席、禮金、籌備，各樣雜項都要洗錢。

一諗起錢，我就覺得好睏難。

因為我唔想你住得差，食得差，著得差。

唔想你父母交個女比一個咁無用既男人。

我自己一個單身就可以話住公屋，

有床有廁所，窄d無所謂。

但係要養你，我就一定要比最好既你。

當然，我咁諗太過長遠，甚至我連最基本既野，

都未必比到你。

仲要講買樓，講結婚，我覺得我太自以為是，

以為可以真係比到真正既幸福你。

最後，我真係希望你唔好介意一個咁無出色，咁窮既我

我唯一做到既，就只係對你最好，最愛你。

希望你唔好嫌棄一個咁樣既我。」

一段咁完美既答覆上，予以既回報就係，

兩個攬埋一齊。

真係打百號風球都打唔甩果隻。

特別係咁凍，濛濛細雨既環境底下，

佢地既心，呢一刻真係最溫暖。

而我聽到呢到，睇到呢到，

都覺得，散場，咩都搞掂哂。

繼續前往去買我既叉雞飯。

而我只係係到諗，佢地既對話中，

所體現到既野，同我呢個人，有好大對比。

我咁大個人，連女仔手都未拖過。

佢地有人可以傾訴，而我，極大部份既時間都只係自己一個。

我父母早就離逝。

而阿哥家姐，早有家室。我甚至唔記得上一次同佢地通電話

係幾多年前既事。

或者呢種對比，顯得我特別孤獨。

你收啦，你好慘咩。

非洲果d小朋友，連飯都冇得食呀。

你有飯食，有床訓，仲係到怨三怨四?

係既，同佢地比，我可以好幸福。

正所謂凡事向好方面諗，都岩既，至少我依然想生存落去，嘗試解決香港既一切荒謬。

雖然我到而家都仲未拍過拖，

仲係番緊一份朝不保晚既低收入工作，

但係有一樣野係我由出生到而家都冇改變過既，

就係鬥志。

我每一日都諗，我終有一日，

會令全世界既人都識我，會記住我既名字。

就算你點樣睇唔起我，

話我白痴，話我無用，話我毒男宅男，

話我死窮鬼，我全部都可以當你講笑。

但係你要踐踏我既鬥志既時候，我一定同你辯論到底。

一定要令你覺得，我係岩既，你係錯既。至死方休。

最後，我食完叉雞飯之後，

再睇多次海賊王，黑鬍子既名言。

「人的夢想，是不會完結的。」

今日，我再次重新出發。

香港，荒謬之地，膚淺、無知之地，

或者，係我有生之年，

可以改變呢到一切唔好既事。

轉載請註明來源：今天頭條