有指因為玫瑰金客路唔夠廣，Apple替iPhone 7準備咗黑色拓展市場。不過最新流出嘅機殼圖大唱反調，玫瑰金、太空灰、銀、金喺齊到，說好的黑色呢？唔見喎。
由MacityNet及微博用戶@KK低調嘅圖片見到iPhone 7今代沿用4種配色，並無傳聞中嘅亮黑/磨砂黑。另一方面亦有實拍影片出現，當中展示咗兩部完成組裝嘅iPhone 7，分別為太空灰及銀色，底部設置雙喇叭及Lightning接口，3.5mm耳機插口消失不見。
冇新色固然令人失望，但GeekBench資料庫揭發咗新處理器A10性能，單線程跑分達3,000分，僅比iPad Pro所用嘅A9X低10分。即使不算大進步，考慮到iPhone 7加大電池等因素後，A10體積應比上代小；而且Apple應該會幫佢減低埋耗電量，咁睇嘅話已經相當唔錯。
正常嚟講廠商出手機應該一代比一代大電，但iPhone 6s正正就係異數，電量由iPhone 6嘅1,810mAh，下降到1,715mAh。過多兩個月輪到iPhone 7，呢次嚿電有望回歸加料，消息指其電量將增加14%。 @OnLeaks稱從極可靠渠道得知iPhone 7確切電量為1,960mAh，計返比率大約上升14.3%。雖然由於零件更替，多咗電不代表續航力延長，但相信冇客人會嫌電多。1,877mAh Smart Battery Case能夠提供額外8個鐘使用時間，若然以此作參考，每235mAh就可以換來多1個鐘，即係今代可能玩到多1個鐘。
轉載請註明來源：今天頭條