1

【新手媽媽小貼士】點樣幫初生BB沖涼

新手媽媽對住啱啱出世嘅 BB 難免會騰曬雞，尤其係幫佢哋沖涼，望住脆弱嘅身軀，真係又怕冷親、又怕整親佢哋，有時沖沖下聽到佢哋喊真係會驚到手都震埋，咁點算好呢？

但其實唔講唔知，原來啱啱出世嘅 BB 係唔洗日日沖涼架！特別係出世之後幾個禮拜，BB 臍帶四周皮膚癒合之前，媽媽只須用暖暖哋嘅濕毛巾幫佢哋抹抹身，清洗臉面同小手，然後喺每次換片果陣徹底清潔尿布周圍嘅皮膚就可以架喇！當皮膚癒合過後，就可以慢慢開始盆浴。

沐浴小貼士：

1. 新手媽媽可以為 BB 選購用天然彩棉製嘅毛巾、沐浴手套或天然海綿，為 BB 帶嚟天然有機嘅沐浴體驗。

2. 當 BB 殘餘臍帶變得乾硬、脫落且周圍嘅皮膚癒合之後，你就可以開始盆浴。首先要準備定一條毛巾墊喺浴盆底部，避免 BB 喺盆入面跣親。然後要妥善準備好一切沖涼所需嘅物品，包括：帶帽浴巾、柔軟嘅小毛巾、棉花球、溫和嘅沐浴露、洗頭水、專為 BB 而設嘅沐浴刷、乾淨嘅尿片同衫褲，令沖涼嘅過程更安全同方便，最重要係唔怕冷親。

3. 臨沖涼前，必須用手腕內側或者前臂外側試一試水溫（最理想溫度係攝氏 38 度），確保唔會熱親 BB。同時亦要確保浴室溫度適中，以免凍親 BB。

4. 盆浴嘅時候，應該先將 BB 隻腳放入水裡面，然後用一隻手托穩 BB 嘅頭，再用另一隻手托住屁股，輕輕將 BB 放曬入去盆面。為咗唔好刺激到 BB 嘅皮膚，奉勸各位媽咪切忌浸浴時間過長。

5. BB 皮膚好幼嫩，媽媽應該避免用任何含有香料嘅番梘幫 BB 沖涼或者浸泡泡浴，以免刺激到 BB 嘅皮膚。全面照顧 BB 嘅需要，由洗頭水至沖涼液，最好都係用番啲全天然有機嘅沐浴產品比較好。

6. 沖涼果陣千萬要扶穩 BB，建議你可以一隻手扶住 BB 面向自己，另一隻手幫 BB 沖涼，溫柔咁清走 BB 身上嘅死皮同皮膚碎屑。特別需要清理乾淨嘅係尿片包住果個位置、面、頸、四肢、手指同埋腳趾罅。其次係膝頭後面、耳背同腋下等摺位。切忌將 BB 獨留浴盆內，以免造成任何危險。

7. 沖涼後，媽媽可以將 BB 放係已經預先舖好尿布墊套裝嘅換片檯上，盡快幫 BB 撤底抹乾個身，然後著上用天然物料製成嘅衫、浴袍同埋浴鞋，咁至夠天然同舒適。

8. 大多數 BB 其實都唔需要喺沖完涼之後搽潤膚露，不過有啲 BB 係比較容易敏感起紅疹，所以為佢哋揀選合適嘅潤膚露非常重要，媽媽應該揀一啲性質溫和、全天然嘅護膚品，確保唔會刺激到 BB 脆弱嘅肌膚。

9. 避免喺餵奶後立即幫 BB 沖涼，避免出現嘔奶嘅情況。

讓 BB 學會不怕洗白白：

要令 BB 唔再驚洗白白，你可以輕輕撥水去佢肚仔度，刺激感官神經，等佢慢慢適應；又或者教佢用腳踢水花，學習因果關係；更可以一邊同佢沖涼，一邊教佢身體上每個部位嘅讀法，寓學習於洗白白。

另一方面原來洗白白係有助冷靜同安撫鬧緊情緒嘅 BB 架！媽咪可以養成一個睡前幫 BB 沖涼呢個小習慣，因為喺暖笠笠嘅水溫同埋環境下，加埋被呵護嘅感覺係會令 BB 好安心，並會乖乖入睡，唔會再扭計。

轉載請註明來源：今天頭條