早幾日介紹過幾個關東可以睇到超靚紅葉景嘅地方，今次就為大家繼續推介8個關西紅葉絕景地，年尾去關西的話就要save低啦！
1. 嵐山＠京都
除咗一片碧綠嘅竹林係嵐山嘅一大看點之外，其實秋季一片火紅色嘅紅葉海都好值得大家特地前往欣賞，有渡月橋同河川作為背景，想影張靚相話都冇咁易！如果打算留宿一宵，咁就一定唔可以錯過夜晚嘅點燈，整個氣份同日頭完全唔同，係一個令人想一去再去嘅地方。仲有，嵐山上多間特色商都一定要花時間慢慢行，精品同禮盒多到買唔哂！
渡月橋係嵐山一大影相位，有埋紅葉做背景，冇理由唔影掛？！
紅葉同竹林紅綠交錯嘅景像絕對係秋季限定！
最佳紅葉觀賞期：11月下旬～12月上旬
2. 保津川（亀岡）＠京都
亀岡絕對可以連埋嵐山一齊玩，想坐超人氣觀光火車遊覽亀岡至嵐山一帶嘅紅葉絕景，最好嘅方法就係乘搭觀光小火車！由於保津川會出現喺火車嘅左手邊，所以唔想俾人遮住影唔到相，記得要買雙數座位。而小火車嘅第五卡為開放式車卡，睇景最正，如果大家唔怕凍，可以於購買車票嘅時候同職員提出。
除咗乘搭小火車之外，遊保津川仲可以選擇從水路出發，雖然紅葉期間觀光船嘅票價會比平時貴，但緩慢嘅速度正好俾足時間大家大影特影，貴少少都值啊！
即使唔係紅葉季，如果係第一次去嵐山，強烈建議大家點都要坐一次觀光小火車。
從水路遊覽一樣得，慢慢飄流於河川之上格外寫意。
呢度有多間特色店舖，買手信都買到手軟！
想玩盡啲可以參考：【初心者觀光懶人包！京都嵐山應該點玩】
最佳紅葉觀賞期：11月中旬～12月上旬
3. 天龍寺＠京都
又係一個可以連埋嵐山一齊玩嘅紅葉絕景地點，於嵐山站一下車就到，會去嵐山睇竹林的話一定要順便過嚟行行！天龍寺係世界文化遺產之一，唔單止係紅葉期，一年四季都吸引到來自各地嘅遊人特地前往欣賞美景，想飽覽紅葉景色的話可以以「曹源池庭園」為中心，再行埋「庫裏」、通向多寶塔嘅走廊同「望京之丘」，行完包你心滿意足！
曹源池庭園係天龍寺範圍內嘅觀賞重點，天氣好嘅時候池水會出現紅葉同藍天嘅倒影，靚絕！
庫裏
最佳紅葉觀賞期：11月中旬～12月上旬
4. 奈良公園＠奈良
奈良公園係去關西玩不得不到嘅旅遊熱點，同鹿仔交流係指定動作之外，去東大寺、春日大社等地方都係行程嘅大重點，秋天嚟的話就更加有睇頭，紅葉、綠樹、鹿仔、歷史建築，加埋就係一幅充滿古都風情嘅名畫，真係冇理由唔趁秋天走返轉！
鹿仔加紅葉嘅黃金組合，真係點影都靚！
東大寺二月堂，喺紅葉嘅襯托之下有份莊嚴嘅感覺。
火紅色嘅紅葉同火紅色嘅歷史建築被其他綠機包圍，真正「萬綠叢中一點紅」！
最佳紅葉觀賞期：11月下旬～12月上旬
5. マキノ水杉路＠滋賀縣
マキノ水杉路位於滋賀縣琵琶湖西北部，最出名嘅就係全長2.5公里、一直延伸至高原嘅水杉路，大路兩邊種咗多達500棵大樹，一到紅葉季就會形成一條極壯觀嘅紅葉隧道，極之迷人！雖然附近有個JRマキノ站，不過由於去到之後仲要轉巴士前往，所以如果有車的話不妨舒舒服服地自駕遊，遊走於紅葉林之中。
就算冇車自駕車，用雙腳漫步於紅葉林之下嘅感覺一樣震撼！
最佳紅葉觀賞期：11月中旬～11月下旬
6. 吉野山＠奈良
吉野山整個山頭有多達30,000棵櫻花樹，春天去一大片粉紅色景象固之然靚，一到咗秋天更加會轉化成金黃色嘅紅葉，成個山頭都一片金黃樹海，情景同樣懾人！嚟到記得要坐上觀光纜車360度冇死角地欣賞紅葉林，如果夜晚唔趕住離開，一定要睇埋金峯山寺、上千本、中千本、下千本嘅點燈，睇完真係會一世難忘！
嚟到吉野山點都要坐一次纜車從上而下欣賞紅葉林，感覺超正！
最佳觀賞紅葉嘅位置一定係標高約600米嘅上千本，景色一望無際。
最佳紅葉觀賞期：11月上旬～12月上旬
7. 高野山＠和歌山
如果想將紅葉同歷史神社同時收入鏡頭，咁就一定要去位於高野山，呢度總共有過百間寺廟，隨便影都可以影到大師級作品！提提大家，奧之院英靈殿、荒川經藏、清淨心院周邊、浪切不動周邊、西塔附近同不動堂東塔都係影相好位，當中最受歡迎嘅地點就係蛇腹路，最靚嘅時期呢度簡直係一條紅葉砌成嘅隧道，係高野山甚至係整個奈良嘅紅葉名所。
高野山有多間寺廟，好容易就影到完美構圖。
最佳紅葉觀賞期：10月下旬～11月上旬
8. 箕面公園＠大阪
距離大阪只係將30分鐘車程，竟然有一個可以同時睇到瀑布同紅葉嘅地方！ 箕面公園一年四季都會展露不同魅力，80年代更加被選為「森林浴の森100選」，想拍攝出有山有水有生氣嘅絕景照片，呢度非來不可！
箕面公園加紅葉嘅畫面靚到非常唔真實！
紅葉唔單止可以用眼睇，原來仲可以用嚟食！炸天婦羅係呢度嘅名品，有幸見到一定要試。
呢度一入黑亦都有得睇點燈，幽靜中帶點淒美。
最佳紅葉觀賞期：11月中旬～12月上旬
轉載請註明來源：今天頭條