要玩盡京都景點，京都站可以話係一個必經之地，但唔講大家又知唔知，京都站除咗係一個大站之外，其實仲有好多野買、好多野行、好多野食！今次就為大家詳細介紹站內值得一到嘅8大重點，行完一圈保證大家內內外外都「滿載而歸」！

1）站內必到驚喜地點！

講到影相地點，大階梯應該無人不知，但車站內竟然仲有個免費嘅「觀景台」，真係驚喜萬分。

a. 空中徑路

唔係地膽介紹，真係唔為意原來連接東廣場7樓同大階梯之間有一條懸空嘅「空中徑路」！由於左右兩邊都係透明大玻璃，所以可以同時欣賞到京都站內結構同大階梯美景，某啲位置更加可以睇到京都地標「京都塔」，最正就係觀光客唔多，目前仲未出現太多人嘅情況，夜晚嚟睇夜景更靚，可以話係一個免費嘅秘點觀景台！

估唔到呢到嘅夜景咁靚！

正中央藍色嗰條就係空中徑路，連接東廣場7樓同大階梯。

2）站內激推4大拉麵店！

想食好野，車站內一樣有大把選擇，好似位於10樓嘅拉麵小路就集結咗來自日本各地嘅9間猛料拉麵店，想一次過食多碗激正拉麵？話都冇咁易！

各店位置圖，大家可先行一個圈，睇嚇各店嘅拉麵風格。

a. 博多一幸舍

雖然香港都有分店，不過硬係覺得日本店比較好味，所以嚟到拉麵小路又會忍唔住想再三回味。「一幸舍」主打博多豬骨湯拉麵，配料雖然離不開豚肉叉燒同溏心蛋嘅配搭，但叉燒切得夠薄夠嫩滑，最正就係豬骨湯底濃郁得嚟唔會一味得個咸字，加埋偏幼身嘅面條好彈牙，睇落一碗普通嘅拉麵，每一啖都充滿驚喜！

薄切嘅叉燒上檯時呈現鮮嫩嘅粉紅色，好吸引！

仲有呢碗黑媽媽嘅「味玉黑拉麵」都係人氣之選，湯底加入黑麻油製作，同樣充滿香濃豬骨味。

博多一幸舎 京都拉麺小路店

地址：京都府京都市下京區烏丸通塩小路下ル東塩小路町901京都駅ビル　10Ｆ　京都拉麺小路內

電話：075-361-0739

營業時間：11:00～22:00

官網：www.ikkousha.com

b. 東池袋大勝軒

如果略嫌食拉麵有點太平凡，可以過隔離嘅「大勝軒」試試已有多年歷史嘅經典沾麵，沾麵一共有4種大小可以選擇，女生的話220g嘅「並」已經非常足夠。呢度嘅沾麵湯底以豚骨、雞骨、豬腳、魚乾熬製，可想而知味道有幾濃厚！食完麵之後記得唔好浪費食淨嘅沾麵湯，店內有提供熱湯稀釋，稀釋咗之後嘅濃湯依然濃而不膩，包你好味到一滴不剩！

沾麵唔會太粗，但掛湯效果都唔錯，食完麵之後記得唔好忘記要試試用高湯稀釋過嘅沾麵湯。

東池袋大勝軒 京都拉麺小路店

地址：京都府京都市下京區烏丸通塩小路下る東塩小路町901番地 京都駅ビル10Ｆ 京都拉麺小路店 內

電話：075-365-5066

營業時間：11:00～22:00

官網：www.tai-sho-ken.com

c. 喜多方 坂內食堂

「喜多方」係日本無人不知嘅名牌老店，如果自問比較大食，成日食哂成碗拉麵都覺得未夠喉，咁嚟到呢間拉麵店就一定要試嚇「炙燒豚肉飯套餐」，除咗有一大碗舖滿豚肉嘅拉麵，仲有一碗細細碗嘅火炙豚肉飯，油脂經過火炙之後異常甘香，加埋店方特製嘅醬汁，明明食完碗麵已經飽咗8成，一樣可以清到一粒飯都冇得淨！

拉麵嘅湯頭比起一般拉麵較清淡，豚肉一層油脂一層瘦肉咬落層次好分明，清哂成碗都唔覺油膩。而隔離嘅炙燒豚肉飯就更加精彩，豚肉經過火炙之後同拉麵嘅豚肉完成係兩種感覺！

坂內食堂 京都店

地址：京都府京都市下京區烏丸通塩小路下る東塩小路町901 京都駅ビル 10F

電話：075-365-5070

營業時間：11:00～22:00

官網：ban-nai.com

d. ますたに

鍾意食重口味的話，呢間創業於1948年嘅「Masutani」一定啱你胃口！呢度最受歡迎嘅就係「特製厚切叉燒麵」，湯底以原隻雞殼熬整，加上秘製醬油同含有豐富骨膠原嘅背脂，味道非常濃郁，咸香帶勁，配合埋爽口彈牙嘅幼麵，簡直係完美嘅配搭！不過亦有唔少食唔慣嘅人話湯底過咸，所以如果鍾意清清淡淡的話可以先試其他店舖。

濃湯上飄滿油脂令湯底更香更濃，仲含有豐富嘅骨膠原，肥得嚟又可以變靚啲，好矛盾啊！

ますたに 京都拉麺小路店

地址：京都府京都市下京區烏丸通塩小路下る東塩小路町901番地 京都駅ビル10Ｆ 京都拉麺小路店 內

電話：075-365-2077

營業時間：11:00～22:00

3）站內3大人氣必掃手信店！

食到飽一飽最適合行返兩圈消化嚇！京都站內有多間手信店，一次過就可以輕鬆買到極具京都色彩嘅特色手信！

a. 伊藤久右衛門

嚴格嚟講「伊藤久右衛門」並唔係位於京都站內，但店內滿滿嘅抹茶製品已經足夠吸引你行多兩步走入店內研究一番！喺伊藤久右衛門唔單止可以買到加入抹茶製作嘅甜品，連咖喱同酒類都有多款選擇，真係會一個唔小心就買多咗。

抹茶生朱古力係必買推介，入口先感受到抹茶嘅甘，然後朱古力味慢慢滲出嚟，好味！除咗抹茶之外，呢款生朱古力亦有宇治茶版本，茶味亦相當香濃。

平時覺得「最中」呢款甜品有啲太甜，不過伊藤久右衛門加入抹茶之後就多咗層甘苦味中和咗原有嘅甜度，一咬外皮鬆化，入面夾住紅豆餡同半流心嘅抹茶醬，用嚟做手信仲唔氹死人！

仲有呢個綠色嘅宇治抹茶咖喱都係手信最佳之選，可以直接放入微波爐加熱，一倒出嚟即刻聞到好香嘅咖喱味！入口除咗咖喱味之外仲會食得出有淡淡嘅抹茶味，但兩者又唔會搶咗對方風頭，好特別。建議大家可以買多兩包，因為隨時買咗返去唔捨得送俾人。

伊藤久右衛門 京都駅前店

地址：京都府京都市下京區塩小路通り烏丸西入ル東塩小路町579-1 松本旅館 1F

電話：075-748-1320

營業時間：10:00～18:00

官網： www.itohkyuemon.co.jp

b. おたべ

想買有傳統特色手信，嚟呢間「おたべ」就啱哂！ おたべ嘅三角形和菓子「八ツ橋」非常出名，煙煙韌韌嘅外皮包住抹茶、紅豆等唔同餡料，係必買嘅傳統手信。除此之外，小編覺得抹茶豆乳年輪蛋糕都好值得用嚟送禮或自用，唔單止蛋糕賣相一流，連包裝都充滿京都色彩！

抹茶年輪蛋糕由內至外都相當精緻！

八ツ橋會隨住不同季節推出唔同味道同包裝，見到期間限定呢4個字又會忍唔到手掃返盒！

おたべ八條口店

地址：京都駅八條口　近鉄名店街「みやこみち」內

營業時間：09:00~20:00

休息日：不定休

c. 京のみやげ

想一次過買哂唔同種類嘅手信，唔使走嚟走去喎！呢間「京のみやげ」齊集咗來自不同老舖嘅產品，包括和菓子禮盒、漬物、酒類、擺設等，輕輕鬆鬆就可以帶哂京都特產返香港！當中一定要買嘅有塞滿丹波紅豆嘅「阿闍梨餅」同漬物「一口大根」，有特色得嚟又唔會太平凡！

「阿闍梨餅」喺大正11年（1922）已經出現，以秘傳配方製作嘅外皮包住用丹波大納言紅豆整成嘅餡料，口感好特別。

一口大根有多款不同味道，如果用嚟做手信可以選擇抹茶味噌同昆布味。

京のみやげ

地址：京都駅新幹線改札內

電話：075-661-8305

營業時間：07:00～21:00

官網：www.asty-kyoto.co.jp/asty_kyoto/store/186/

京都站內值得一逛同一定要去食嘅店舖又點止咁少！下次去京都站真係要預留多少少時間慢慢行！

 如有侵權, 收到通知會盡快移除

轉載請註明來源：今天頭條