送百萬 Benz跑 幫奶奶拉客 謝安琪貼盡張繼聰
前陣子愛上闊太打扮的謝安琪，是日扮青春。
探熱針 送百萬 Benz跑 幫奶奶拉客 謝安琪貼盡張繼聰
同張繼聰結婚八年，事業和收入，長期凌駕老公，要擔起成頭家，謝安琪毫無怨言。
收入有限的張繼聰近日睇中價值過百萬的 Benz C63跑車，天后老婆科水照買，做好老婆唔只顧老公，自從去年張繼聰媽咪做了美容產品直銷會員， Kay便不停向身邊人狂 sell，幫奶奶拉客；嚟緊十月開始，更連接十六場騷，跑數養家。
幫補家用
謝安琪孖老公到寓所附近吃茶餐，其間張繼聰卻全程掛住講電話。
人妻女神謝安琪，被 Juno麥浚龍睇中合唱《羅生門》，歌曲一夜間在 fb洗版，連 Juno亦人氣急升。
不過，始終不及食足八年免費 B餐的張繼聰，被女神由頭到腳，由底到面照顧，令高登仔流曬口水。
有老婆交租，豪住比華利山獨立屋的張繼聰，成功泊到 TVB碼頭後，總算有啲收入，幫補部分生活費。
「 TVB啲小生幾乎走曬，加上擦掂 Sandy（余詠珊）同珍姐（曾勵珍），阿聰多咗好多機會，舊年仲簽埋藝員約，騷價由六百升到三千，起碼有穩定收入，可以分擔家用，唔使靠曬老婆。」謝安琪身邊人說。
但相比謝安琪，張繼聰仍然大有距離。同老婆到寓所附近的台式餐廳食幾十蚊的茶餐，細數，張繼聰埋單。
周圍曬辣車
但講到大數目，就唔同講法。搵得少，但張繼聰鍾意玩車。兩年前，謝安琪送了架 Benz A250給他做生日禮物，近日再睇中馬力更強的 Benz C63跑車，又氹老婆買。
「阿聰鍾意辣車，但因為價錢貴，所以一直都忍手，阿 Kay見個仔都俾老豆影響到鍾意車，老公同仔都開心，阿 Kay咪買囉！」
新玩具到手，張繼聰開心揸住架 Benz跑演嘢，又讓朋友試揸。曬車之餘，早前他又公開話老婆透過媽咪傳訊息，提醒他有腰傷不要落場打籃球，女神老婆事事周到，甚至幫埋張繼聰媽咪拉客搵錢。
鍾意辣車的張繼聰，話咁易就氹掂老婆俾錢買車價過百萬的 Benz C63。
張繼聰曬命，讓友人揸新買的 Benz跑。
搶客冇手軟
去年，張母做了美容產品直銷會員後，好新抱謝安琪就不停幫奶奶拉客。
「個品牌專出美容產品，有外用有內服，娛樂圈好多人都用，啲產品一啲都唔平，隨便都過萬一 set，阿 Kay奶奶做咗呢隻牌子嘅直銷會員後，每次出活動，阿 Kay見到人都會幫口 sell，話用咗啲產品有幾好，叫人幫襯。有啲人以為阿 Kay入咗會做 sales，其實個會員戶口係佢奶奶嘅，好多 artists都幫襯過佢，好似阿 Kay經理人夏森美老婆，都係個品牌直銷會員，但同阿 Kay奶奶唔同 line，阿 Kay都唔客氣，搶走咗唔少客。」謝安琪身邊人說。
謝安琪出面幫奶奶拉客搵錢，婆媳關係要好。
上月二十三日，謝安琪到澳門為十月演唱會宣傳。
巡迴唱跑數
要貼盡張繼聰，謝安琪更加努力賺錢。下月開始，一口氣接下十六場巡迴演唱會，跑數養家。
上週六（八月二十九日），張繼聰為港姐彩排，謝安琪就負責湊仔。傍晚六時多，兩母子去到中環 PMQ元創方，出席朋友 BB滿月活動，謝安琪球衣加短褲青春逼人，見到朋友的 BB，又母愛氾濫抱住唔放。
在場逗留約半粒鐘，離去時，要踩住五吋暗踭鞋落樓梯，謝安琪步步為營，但仍不忘向記者揮手招呼，八歲的張瞻則由外傭姐姐拖實。
謝安琪到中環 PMQ賀友人 BB滿月，不過只逗留半小時便離開。
為咗巡迴唱，延遲再生 B計劃的謝安琪，抱住朋友的 BB唔放。
兒子張瞻已經八歲大，高咗兼剪短頭髮。
人妻女神
同 Kelly、千嬅一樣，謝安琪鍾意自己湊仔返學。
現年 38歲的謝安琪，出道不久便未婚懷孕，與比她年輕兩歲的張繼聰閃電結婚，因為收入不多，二人只能租住交通不便的大埔村屋，直至憑《囍帖街》走紅，謝安琪開始富貴，搬入明星屋苑大埔比華利山獨立屋。夫憑妻貴，謝安琪對夫家非常照顧，擔家之餘，亦不介意與張繼聰家人同住，就算工作量飆升，仍盡量親自湊仔返學，又經常抽時間出席學校家長日，與其他家長聯誼，一百分好老婆。
天與地
去年，張繼聰憑無綫劇《老表，你好 hea!》成功彈出，自此開始多 job，唔使俾人再叫廢柴。不過老婆謝安琪拍一個廣告，已勝過張繼聰拍幾套劇，收入始終「天與地」。
轉載請註明來源：今天頭條