明星撞鬼實錄 – 林峯篇

on August 4, 2016 at 19:35

近日手機遊戲Pokémon GO熱爆全城，日日都拎住手機化身小精靈訓練員，走遍港九新界捉小精靈。不過大家玩還玩，得閒都要望嚇日曆，因為農曆七月又到了！相傳農曆七月係「鬼月」，乃鬼門關大開的月份，無主孤魂會從陰間到陽間接受人間的供養。一個不留神，隨時撞到「老友記」！《新地網》趁住鬼節同大家分享明星撞鬼故事，今日由林峯打響頭炮！

鬼揞眼事件

談及將軍澳電視城男休息室，林峯講起都怕怕︰「個男休息室好邪門，試過有次入去瞓覺，吩咐咗個PA一個鐘後入去叫醒我，我瞓瞓嚇扎醒，見過曬鐘，咪入廠問個PA點解唔叫我？點知佢話入到去見我唔到。咁邪！自此我都唔敢再入休息室瞓覺。」原來TVB最陰的地方便是位於整條走廊凹陷位的男藝員休息室，陽光完全射唔到入去，容易積聚陰氣。休息室面積約一百呎，米白色牆，有五、六張單人梳化，燈光陰暗，嚴禁拍照。

屋企遇女鬼事件

除咗呢件事，林峯原來亦試過在屋企見到女鬼，「 事發喺兩年前，我記得嗰晚好攰，瞓瞓嚇俾女鬼『 責 』，佢壓到我手腳郁唔到，精神係醒嘅，突然寒一寒，見到佢去到床角位，有陣煙，有一個人影，我心諗死火喇！避都冇得 避，我試圖郁，佢就愈大力，我同佢講︰『 我好攰，第二日要開工，求你俾我瞓啦！』 佢個影就慢慢走近我，仲 同我講國語︰『 就是他，就是他 … … 』 之後就消失咗！」

轉載請註明來源：今天頭條