爸媽是上一輩紅星，鄭欣宜 Joyce一出生便註定活在鎂光燈下。
外人以為她繼承了父母的演藝衣缽、不愁吃穿、工作是為興趣，總以「她減了幾多磅」來作為給她打分的標準。
原來她介意星二代身份「冇得揀」，討厭生活點滴被放大、被審視，甚至連減肥、發片造型等都是委屈自己非其所願。
做別人眼中的自己並不快樂，她決定逆襲，做番自己，減肥 11年後發表「要健康，不要再消脂」宣言，獲得逾 11萬個讚好，去年更獲香港大學邀請講 talk分享自己的轉變。
原來肥，是有人撐的！
懂得更愛錫自己， Joyce自言「依家個心開咗」。
或者是鬼妹仔性格合理化了作為一個演藝人的「任性」，企硬、敢言的鄭欣宜，其實冇咩值得大驚小怪。
Profile
Joyce Cheng
出生日期： 1987年 5月 30日
出生地：加拿大溫哥華
語言：廣東話、英語、普通話
簡歷：
電視劇演員鄭少秋（秋官）和已故電視節目主持沈殿霞（肥姐）的女兒，自小表演慾強。 02年，於 TVB一慈善籌款節目中演唱 Britney Spear的《 Oops!... I Did It Again》，當時體重 230磅，引為笑柄。 03年，擔任修身堂瘦身代言人，並出版《我的減肥日記》。 08年，肥姐病逝， Joyce接拍 TVB《畢打自己人》，以演員和歌手身份正式出道。 11年，於四台頒獎禮中均獲得新人獎項。
主要作品：
專輯《有故事的人》（ 11），《故事的配角》（ 11），《 The Voice of Love》（ 12），《全女打》（ 15）
音樂劇《一屋寶貝》（ 12），《獅子山下●掌聲響起●羅文》之《友●情話》（ 12），開心果永遠欣想妳演唱會》（ 13）
單曲《你瘦夠了嗎？》（ 15）
Joyce Cheng
黑色圖案 cap帽$ 399 New Era
綴珍珠金色頸環$ 1,460 Alex Mika × Twelveotwo from The9thmuse
深寶藍色牛仔圍裙$ 300 Monki
彩藍色牛仔褸$ 1,100 Marks & Spencer
鏡片耳環（ worn as brooch）$ 3,150 Loewe
知錯
欣宜鍾意別人喚她「 Joyce」，因為是肥姐幫她取的，寄語她幸福快樂。對於媒體慣常用的「欣宜」，她覺得是一個被標籤的角色：「我人生中的頭廿五年被安了一個唔好嘅形象：唔認真做嘢、鍾意玩、二世祖，所以我很憎被稱『星二代』，香港媒體將它變成貶意詞。」有感 Joyce就好似你移咗民個三舅公個表姨媽個女，會間中在「親戚」口中聽講她的嬌寵事蹟，真係「睇住佢大、睇住佢變」。成長總要經歷學習：「當我任性、情緒不好，或者做錯決定嘅時候，這些全會被放大俾全香港人知道，以前很介意，現在冇所謂了。細個唔知搵錢辛苦，晚晚去蒲、買貴嘢，依家唔會，唔係要 show俾大家睇我係好人 whatever，我只係做自己覺得正確嘅嘢。」廿八歲不再是小朋友，懂得肯定自己，才可以活得心安理得，是星二代，也是"got a good head on her shoulders"嘅聰明女。鏡頭後有禮，鏡頭前專業，其實欣宜你已蛻變了。
你瘦夠了嗎
自 03年以來，那段「全民監督」、跟著 Joyce一起緊張那幾十磅數字上落、讚她瘦咗又靚咗的時間，竟然是 Joyce的低潮：「我夾硬減肥，刻意剪短髮、打扮中性，就係為咗媒體唔好再話我自戀、自覺好靚、人又串……但咁樣諗冇錯吧？」公眾狹隘的審美眼光令她壓力爆錶，「很 annoying，鄭欣宜嘅存在價值唔係父母是誰、體重幾多，該由能力同內在去定義。我好嬲，出了三張唱片冇人講，淨係講我唔夠瘦、又肥番，或者話我一個人食三個飯盒……都唔係真嘅。」由 230磅減到 130磅，數字背後的委屈和抑壓到了臨界點， Joyce決定反彈，擁抱豐碩體形，「這是一個革命，告訴我要做番自己，不要再為別人而活，我寧願肥！人生短促，媽咪年輕便過了身，我更要將每一日活得開心，我想做嘅、唔會 hurt到人嘅，我都會去做。」問題源於心態， Joyce學曉了應對和協調：「 Everyone has good days and bad days right？」看開，就係咁簡單。
常說掛住肥姐，稱自己是「最幸福的寶寶」。
18歲的夏天，成功減到 150磅，鏡頭前笑得甜。
聲線獨特，攞獎是常識吧？得獎歌是《擁抱愛》。
同秋官慶祝父親節，珍惜當下。
擁抱愛
網上回顧 Joyce的 MV和 cover影片， rape、唱、跳俱有歌姬風采，新人獎、唱 K點爆女 Idol、至愛女 Idol、人氣搜尋大獎都攞過，難怪她投 100%信心的一票給自己：「聽我唱歌你可以瞌埋眼，感受赤裸裸嘅我。反而做戲我驚演繹出來嘅同別人想像嘅唔一樣。但我開始搵到拍戲嘅 fun，比如你去踢波，你會努力地去踢，完場時你會覺得 had fun，唔係嘻嘻哈哈嗰隻 fun。」明！大個女，要求趣味也更有層次。
為了「愛演」， Joyce去學演戲，希望演技進步。但為了一個別人的婚禮，她放棄了與不少前輩同台演舞台劇的機會：「人生咩最重要？係，工作要認真，要做到最好，但我絕不會缺席朋友嘅婚禮！可能家人少，友誼、愛情、家庭於我比任何嘢都更重要。如果問我要愛情定麵包……我寧願十個人去拮魚蛋，也比一個人去食鮑魚強。擁有更多，但冇人同你分享，其實冇意思。」果然鬼妹仔個性， work hard！也要有 life！
轉載請註明來源：今天頭條