以下內容全部真人真事，如有雷同，必屬巧合。歡迎對號入座。
之前睇到其他巴打d post，其實我都以為佢地係度吹水，心諗去旅行喎，邊會有d咁既人架（至於咩人，請繼續睇落去）。
好啦。唔勁up咁多
話說，小弟早幾個禮拜第一次去歐洲，心情既開心，又興奮。同行仲有2個女仔，2個男仔，一共5條友。
去到出發果晚，真係刺激過玩過山車，飛機11點20飛，有一條女（以「此女」代替）10點半先到，之後起飛前仲話「哎呀，我唔知夠唔夠錢呀，我去兌多小小錢先」
（係度補充小小，我地去2個星期，而佢先前已經兌左1500歐以上）
咁我諗，是但啦，女仔去到要買野，係有可能唔夠錢既，不過由於飛機就飛既關係，我話「你去到碌卡咪得，再唔係開個海外提款又得」
Hi！佢即刻西勁我臉。佢真係以為飛機會為左佢而延遲起飛
好啦。佢自己去兌完錢，諗住可以上機啦。Hi，佢突然彈句「可唔可以比我食枝煙先，坐10幾個鐘飛機，冇煙食好辛苦」出黎，果刻我真係想一巴一巴煎落佢塊臉度。
仲要比地勤d人打電話黎追，問我地係邊，全架機就差我地幾個。最後我地以9秒9既速度狗衝去登機口，上到飛機仲要受盡所有其他乘客既奇異目光。
（補充：此女第一次出國，個篋未去已經20kg，上限為23kg，我真係唔知佢可以買到d咩野返黎）
我地去歐洲最主要既目的其實係去柏林影展，不過我地提早左幾日先去布拉格玩，呢幾日我就唔多講啦，因為後面d野仲好睇。
去到柏林影展既第一日，由於其他fd有個pass可以唔洗錢入場睇戲，不過就要一早去排隊拎飛（6am），咁有一個fd就同我同此女講「我一陣返黎搵你地先帶你地出去，你地9點左右起身」後面佢whatsapp我，話要遲小小，咁我梗係訓耐d，到10點左右，佢再whatsapp我，話佢搞掂曬d野，返緊黎搵我地。咁我就即刻叫此女起身啦。點知，叫極都唔願起，而且明知佢d濕勁脾氣，又唔敢翻佢張被，唯有話「咁我去洗臉先，洗完返黎你真係要起，事關xxx已經返緊黎搵我地」佢話好。之後我洗完返黎叫佢，佢都繼續成條死魚咁訓係度。
心諗，依家黎度假咩，要訓就咪返屋企訓啦，做乜勁比成皮野黎訓
好啦，我個fd終於返到黎hostel，諗住帶我地出去啦，此女先願意起身（11點幾），之後佢同我地話「好快，比15分鐘我」我地心諗，是但啦，15分鐘，好快姐，等下囉。Hi，點知一等，等左成個鐘。此刻我先知，原來此女所謂既15分鐘係要以倍數黎計先等於真實要等既分鐘數
終於出到去買飛既地方（1點幾），此女話「下？點解咁早d戲已經賣曬呢一兩日既飛既？」我已經唔想再同佢講野，佢唔諗下係因為咩原因令到買唔到飛。因為個影展可以買埋幾日後d戲飛，之後佢就話「不過我地依家買曬之後要睇既戲既戲飛囉」我同另外個fd就話「咁你就框死曬自己d時間同行程囉，不如買到15號就算啦，之後果d會少d人睇，同埋你早d起身，唔好咁遲都應該買到」（果日12號）跟住佢話「唔得喎，你睇下d飛幾緊張，梗係買曬先啦，你遲小小買都已經冇飛買」佢完全冇諗過係因為自己遲起身而令到買唔到飛。
最終終於說服到佢買到15/16號既飛。好，之後我地求其入左間餐廳食野（2點幾）我同個fd半粒鐘食完，之後係度做咩？就係「等，寂寞到夜深」我地足足等左個幾兩個鐘先等佢食完餐飯，因乜事佢食咁耐？咪因為佢係食1啖禁半個鐘手機d fd。好野！多得佢，我地柏林既第一日咁就過左，食完餐飯已經就天黑，相信去過德國既人都知，日光既時間非常短暫，而乜都好似冇做過就過左，你話係咪好向左走向右走難得呢？
經過第一日既教訓，我決定跟另外2個fd玩，話曬，犧牲1個人好過犧牲2個人呀
（補充：我地同行有5個人，但係因為時間唔夾既關係，本身係我同個fd再加此女玩，另外2個fd自己玩）
後面幾日同此女一齊玩既fd就好似湊女咁湊足成個柏林之旅，真係辛苦曬
係度奉勸各位巴打同人去旅行之前，請預先做好「資料收集」，以免造成不必要的「損失」
講住咁多先，下回分解
轉載請註明來源：今天頭條