「歇後語」系廣東話特有嘅文化之一，前半段為提示，讓對方推敲出真正嘅意思。平時我哋口中經常講嘅「牛皮燈籠」、「老貓燒須」、「阿茂整餅」嘅意思相信大家都耳熟能詳，並已成為大眾常用嘅四字詞語。

但系以下10個唔系咁常見嘅歇後語，你又估唔估到佢哋嘅真正意思？

1. 扁鼻佬戴眼鏡

意思：

無得頂，因扁鼻嘅人鼻樑難以頂起眼鏡。

例句：

隔離屋小明去咗牛津讀書呀，真系「扁鼻佬帶眼鏡」，無得頂！

2. 單眼佬睇老婆

意思：

一眼睇曬，因「單眼佬」只有「一眼」。

例句：

佢間屋有幾大呀，「單眼佬睇老婆」啫，一眼睇曬啦！

3. 孔夫子搬家

意思：

全部輸。因孔夫子多書籍，取「書」諧音「輸」。

例句：

阿強你可唔可以借錢比我呀？我尋日過咗大海玩，諗住過下手癮啫，點知「孔夫子搬家」，全部輸！

4. 賣布唔帶尺

意思：

存心不良。賣布嘅商販一般有尺，方便按客人買幾多碼來量度，但商販竟然無尺，即有心唔量度，取「量」諧音「良」，引申為「存心不良」。

例句：

個間舖黑店嚟架，根本就系「賣布唔帶尺」，居心不良！

5. 番鬼佬月餅

意思：

悶極。番鬼佬暗指用英文說月餅，月餅英文是Moon cake，取其諧音為「悶極」。

例句：

今日鋪頭都無客嘅，咁鬼靜，真系「番鬼佬月餅」咯！

6. 飛機打交

意思：

高竇。飛機一般喺高空飛行，而打交書面語可稱為「打鬥」，取「斗」諧音為「竇」。

例句：

聽講個明星好似「飛機打交」咁，好高竇！當正自己字宙第一國際大明星咁，又成日黑面，唔怪得無曬fans啦！

7. 跪地喂豬乸

意思：

睇錢份上。男兒膝下有黃金，如今又要「跪地」，又要做「喂豬乸」咁嘅苦差，當然系睇在錢嘅份上先會願意做。

例句：

鬼唔知份工惡頂咩，但呢排無工開，唯有「跪地喂豬乸」，頂硬上！

8. 老公荷包

意思：

膚淺，老公即「丈夫」，荷包中有錢，取「夫錢」諧音為「膚淺」。

例句：

好心你扮人咪咁「老公荷包」，真膚淺！

9. 老公撥扇

意思：

淒涼，老公幫妻子撥扇，妻子乘涼，取「妻涼」嘅諧音為「淒涼」。

例句：

聽講佢最近比老細省咗一大輪，真系「老公潑扇」，淒涼咯。

10. 南無佬跌落屎坑

意思：

無曬符。「南無佬」身上一般帶備「符咒」，但「跌落屎坑」後符咒就會濕曬，加上骯髒就唔可以用，因此取其意思「無曬符」。

例句：

今次佢公司咁蝕法，我諗佢老細真系「南無佬跌落屎坑」，無曬符咯。

轉載請註明來源：今天頭條