「各位，難得之後幾日放假，不如今晚出嚟玩通宵啦！」

「嚇…唔好啦，加完班攰到死呀，通頂一定頂唔順，再搵日啦。」

「唔洗預我，你哋放假啫，我聽朝仲要返工咯，下晝又約咗條女…」

「Sorry，我男友佢唔系咁想我出夜街…」

「走唔到啦，我老婆呢排心情麻麻。」

「喔，咁無計啦，再約咯…」

好記得，以前嘅我哋，總可以輕易搵到個理由出嚟同班朋友玩通宵。

好似兄弟A咁，突然發癲想搵聽眾聽下佢嘅追女威水史、

姐妹B又有感情煩惱、兄弟C純粹無聊想出嚟飲下嘢吹下水、

姐妹D見呢期好運，想搵齊腳出嚟打牌大殺四方、E又想乜乜乜…

但人大咗，就好似突然無咗呢枝歌仔唱咁。

由昔日求其搵個理由出嚟，變成因為各種理由無奈去拒絕。

當年公認花花公子，換女友好似換衫咁嘅兄弟A，

竟然系最快定性個個，前排先飲完佢餐喜酒，而家老婆大過天。

當年成日有感情煩惱，一個月叫苦一次嘅姐妹B，

亦都搵到一個真心愛佢嘅男友，對佢千依百順。

當年成日話無聊想搵嘢搞，夢想系一個人走遍世界嘅兄弟C，

而家搵到份有前途嘅工，識到個做護士月入成萬蚊嘅女友，

為咗將來層樓份首期，就快變成啤牌只積。

當年唔陪佢打足八圈都唔肯放人，體力好似無極限嘅嘅姐妹D，

而家反而系快攰個個…

至於E？其他人都唔出現咯，佢當然系等下次齊人嘅時候先嚟。

「再約啦，一系下星期咯？」

「下星期我唔得呀，要同男友去韓國旅行…」

「咁五一呢？」

「唔得，五一我同條女去泰國睇人妖呀，六一之後就得啦。」

「頂，六一之後都冇假放啦！」

「講下講下真繫到八月十五都約唔到…」

「咁就遲D再約睇下啦！」

原來，人嘅年紀系同朋友嘅見面次數成一個反比。

以前，大家幾乎系日日都見，多到數都懶得去數幾多次。

但而家，一年見面嘅次數可能一隻手都可以數得哂。

見面都已經少了，更何況玩通宵呢？

回想返，對上一次同朋友玩通宵，已經系大半年前嘅事。

仲要系因為某個中學同學就快要移民，先可以難得咁齊人。

個晚緊系玩得好盡興，但要數最深刻嘅，

肯定系其中兩個男友人攰到頂唔順，迫埋喺梳化瞓充滿基情嘅畫面。

「點解可以瞓到樣衰架？」

「真系老啦，平時呢個時間應該落街食個早餐，返嚟再打幾圈。」

「叫醒佢哋咯，都唔遲架。」

「咪住，緊系影低佢放上朋友圈先啦。」

「哈哈…好提議。」

盡情享受啦，仲可以無憂無慮同朋友玩通宵嘅時光……

文章來源: https://www.twgreatdaily.com/cat43/node881451

轉載請註明來源：今天頭條