當我喺15歲嘅夏天聽到朋友一句：「我會嚟，不過我例遲」嘅時候，

小弟首次反思人生的意義。

唔通我嘅出生就係為咗等你？

定抑或你嘅輪迴轉世就係為咗要遲我？

我甚至研究過大英律法，睇下有冇一條法例叫「例遲」。

如是者過咗十年，「例遲」嘅法例冇出現，但「例遲」嘅現象持續惡化。

須知道「遲到」同「例遲」係兩個完全唔同嘅故事。

用得「遲到」，多數係有種「錯誤」同「歉意」嘅味道，而且必須帶有原因，係情非得已亦迫不得已。

最重要嘅係「遲到」嘅計法係「一次次」，即係雖然今次遲，但下次未必會再犯。

但「例遲」就唔同講法，同「例湯」一樣，煲好咗，無得你揀。

所謂「例遲」嘅完整對白就係「我例牌遲到架啦，係咁架喎。」

屬於「合理」、「正當」嘅行為，

唔需要理由原因，係理所當然亦不以為然。

最PK嘅係「例遲」代表住「每一次」，即係當佢一領悟到「例遲」，就永無準時。

呢種思想好危險，係佢啲朋友好危險。

「例遲」嘅人真係好爽，永遠免疫等位，你都唔會奢望叫佢Book位。

打邊爐佢連等水滾嘅時間都慳返，嚟到已經食得。

就算佢再遲啲，都有好心朋友夾定畀佢，或者留定嘢食。

等佢可以成個主角咁最後登場，閃亮整個商場。

陰公嘅係，當嗰條友「例遲」咗幾次，我哋嘅「奴隸」細胞會作出調整，漸漸習慣，最後覺得佢遲到係正常，係無罪嘅！

有次我問：「條友呢？未到？」

對面個朋友竟然答我：「未呀，佢例遲架嘛，做咩啫你？」

媽的，好似搞到我講錯嘢咁！

結果次次準時，今次遲到嘅小明畀人問候老母。

而次次例遲，偶爾早咗少少(都係遲)嘅黃仔畀人讚佢「人品好」。

點解個世界會咁樣架？難度守時都只是作賤自己嗎？

呢家都好啲，有部手提電話，大不了行住等、Hea住等。

不過一諗返起中一時代嘅往事，真係痛不欲生。

嗰時大家細個，朋友堆中有條友例遲，而嗰條友係冇電話架。

最Ｘ街嘅係，佢係例遲兩粒鐘。.

我同幾個朋友，喺銅鑼灣往上環嘅車頭，睇住60班車駛過，等足兩粒鐘。

人生之中，嗰日係我第一次因為等人等到想跳軌，

我顛到想用自殘嘅方式令條友內疚呀！

之後，我同自己講，要抱住If you can』t beat them，join them嘅理念，

一旦識到個朋友係例遲嘅，我一定會遲過佢！

大不了去到飲糖水先到！

呢啲人，一定要畀佢試下「等」嘅感覺，

先識得尊重啲「等佢」嘅朋友。

嚟呀！我唔會輸畀你哋架！！

facebook page

轉載請註明來源：今天頭條